沒有電視的日子第一天

he，塘心風暴阿林峰好低能果招﹗

唉﹗個電視前一排有d唔妥，間唔中會畫面模糊，有時又無野，呢個星期就已經模到好似響水底度睇咁喇﹗雖然我喜歡潛水，但係我唔鍾意咁樣睇電視喎﹗

於是請左原廠師傅黎檢查，唔檢由是可，一檢連畫面同聲都無埋，佢話係個膽有事，所以會咁樣。如果要整就要攞返廠整，最少二千幾蚊﹗

呢部野係我用過最短命既電視，得三年幾貨仔，仲萬幾蚊喎﹗佢係philips﹗

真係：買左飛利浦，生活唔會好﹗

鬼咩﹗又要買過，又無電視睇一排﹗其實我地都唔係成日用電視，每晚用佢兩三粒鐘咁大把，計起上黎，阿飛先生既時薪真係幾高：萬幾蚊除（四點幾乘３６５日）除三小時．．．．．．．

唉﹗雖然佢畫質好過sony，但係短命呢，有鬼用呀﹗

出發喇﹗

終於出發喇﹗

星期六就出發，決定去深圳坐飛機上烏魯木齊，然後有計劃地玩南北彊，但入到巴基斯坦就會同玩歴奇差唔多，因為手上資料有限，見步行步，回程機都未買呀﹗好好玩﹗

你嫌咩呀？補充版

老師嫌校長請食飯食得太孤寒；校長嫌老師食得太狼。

學生嫌GALANT變ALAN太有趣；老師嫌經常要為車身花痕貼貼紙太瘀皮。

老師嫌無能同事升職太早；無能同事嫌自己升職太遲。

老師嫌同事唔洗做又不斷升職太著數；升職同事嫌自己唔係副校太蝕底。

你嫌咩呀？

作為老師既你，會嫌d咩呢？

監考老師嫌監考時間太長；努力作答既考生嫌考試時間太短。

不負責任既老師嫌自己份人工太低；負責任既老師嫌不負責任既老師人工太高。

努力教學既老師嫌上課時間太短；懶惰既學生嫌上課時間太長。

面臨殺校既學校管理層嫌中一新生數量太少；EDB嫌Band１英中既中一新生數量太多。

負責查簿既主任嫌老師寫既評語太少；老師嫌主任既要求太多。

校長嫌學校既課外活動太少；老師嫌學校既課外活動太多。

家長嫌功課太少；學生嫌功課太多。

校董嫌校網內既老師相片太模糊；老師嫌校網內既老師相片太清楚。

老師嫌同事太young；學生嫌老師唔夠young。

家長嫌學校banding太低；老師嫌學生質素太曳。

相處高難度

其實，兩個人相處難度都幾高架，有時對方做既方法，自己唔認同，有時甚至唔明白對方點解要堅持，大家各持己見，要好融洽咁相處都要好有技巧架﹗好彩我同路人甲都有Ｄ唧﹗

話說我好憎Ｄ衫洗完之後俾雨淋濕，原因一黎污穢，二黎前功盡廢，要再洗過，所以逢親陰晴不定，又或者晾左衫要出街時，我都會收番Ｄ衫入簷下，唔會俾佢地繼續同陽光玩遊戲。但係．．．．．．．路人甲就超鍾意Ｄ衫晒完太陽之後果陣香味，於是乎試過幾次佢晾完衫就掛晒出去晒太陽啦，結果，都係淋濕收場。

個幾次，我發晒脾氣，起勢鬧。話晒俾佢聽我勁唔鍾意，講晒原因，但係佢都係好固執咁堅持，只係我鬧爆佢既時候，佢會唔出聲，唔駁咀，任我鬧﹗

今日，一起身時，陽光普照，個天係有Ｄ厚雲，但係就非常晒。路人甲好開心咁洗晒Ｄ衫掛晒出去，又拎晒Ｄ地氈上天臺晒。臨出街買野前，我提左佢有黑雲，不過佢話：「我係唔會放棄既﹗」

結果，出左去一個鐘，個天就響呢段時間raining cats and dogs，返到屋企，佢粒聲唔出上左天臺，搞好晒Ｄ野（仲落緊雨架），塊面黑過我隻鑊。我就無唔開心呀，因為預左啦嘛﹗

有時，我地唔係咁容易改變對方既諗法，咁唯有改變自己去遷就下囉﹗既然對方明知自己遇到咁既事時係會好唔開心既，但係都唔肯遷就時，佢未必係唔鍚自己或者唔尊重自己，只係佢都有佢堅持既時候啫，咁咪改變下自己既立場囉﹗嘩﹗對成世架喎﹗

今次咁等佢受下囉﹗哈﹗宜家又陽光普照喇，死未﹗

邪惡軸心全撤退

話說校內有一個邪惡軸心，無論邊方面都好邪惡，例如：成日唔返工、hold會當日唔返工、單單打打(對個panel head)、唔合作、搞小圈子、工作馬虎了事、不負責任......石sir係其中一名成員。

學期尾，所有野都要有個了結架，咁石sir果科有條街數未找，係石sir負責既，但係佢遲遲都唔搞掂佢。last day前三日(last day係星期一)，雀斑媽媽打電話俾佢，叫佢記得要搞掂條數：

雀：「你星期一一定要俾到條數校務處呀﹗否則出唔切支票，你要俾左先呀，條數拖咁耐都唔找俾人唔係幾好啦﹗」

石：「星期一我會唔舒服，應該返唔到。係校務處唔找數姐，又唔係我話要book車既，我唔會俾錢架﹗」(咩唔舒服會預先知呀？我才疏學淺，只知道M黎肚痛可以預知唧，但係佢係男人黎架喎﹗)

雀：「唔好咁啦，你返啦﹗你返啦﹗你唔俾張單校務處，人地鬼知你用過車要找數呢？」

石：「我盡量啦。」

雀：「你d野未搞掂，又唔返工，石sir，做男人唔好做到咁。」

石：「得啦，得啦，我都話左盡量咯﹗」

(平時只會讚人既雀斑媽媽都鬧既人，我相信一定係人中之渣，渣中之滓喇﹗)

星期一，石sir真係有返工(我相信佢係因為知道學校預備左d coupon俾離職既同事，所以佢返，主要係收jetso)，但係就同雀斑媽媽講：「咪搞掂左囉，又叫我返，我有野做架嘛﹗」

工，係一定要返，係一個負責任既成年人基本要做既野，要人「矮」1  至返工？咩人黎架？

結業禮完左，下晝d同事終於可以放工，終於可以放半晝，但係石sir果科要響下晝開科務會議，但係一班邪惡軸心成員全體缺席，咩世界？

好彩佢地辭晒職，否則我地學校一定殺硬﹗

連校工都不如？

中一收生當天，有位當值老師病左，另一位見義勇為既老師就主動同佢調左當值時間，等佢可以休息下。當日，阿石sir係後備老師，所以當其他老師知道有同事病左就話叫石sir黎當值，等同事唔使調黎調去。

同事A：「山姐，不如叫阿石sir黎當值啦﹗」

山姐(收生負責人)：「.......」

同事B：「叫阿石sir黎咪即係趕客，d程序咁複雜，佢邊度會明吖﹗」

同事C：「咁都要叫佢黎啦，佢一係唔返工，一返工就係睇報紙聽歌，咩都唔做﹗」

同事B：「係啦，叫佢黎看影印機啦，free個校工出黎，校工都有野做架嘛﹗」

死唔死吖，做老師做到響同事眼中連校工都不如﹗都係自己攞黎既﹗

新好過舊

我呢d二打六，通常響試後活動時都會比人地得閒，可以坐定定做埋之前唔想掂既paper work，點知，今年特別忙（但我仍然係二打六一名），無一晝係可以好安樂咁坐低做野，結果到宜家都仲有野未交，真出奇，係紀錄黎架，未試過嘛﹗

本來放三點半，但係日日都放五六點，好彩，老細非常咁好人，有日我無duty（終於得閒喇），問佢可唔可以請日假去攞visa，因為真係無一日去得到，放假之後攞又驚有咩e郁攞唔到就趕唔切。

佢開頭好似有d為難，我以為衰硬啦，點知佢諗左三秒話：「你地攞special leave啦。」我聽到，做左個反應：「唔係紅白二事至攞得架咩？」（我d直線反應又黎喇，人地俾你咪多謝然後走頭囉，仲問，白痴）佢話：「hey，是但啦﹗」

呢d老細咪有人情味囉，好過有d，我打電話返去請病假，話肚痾，佢問候都無一句就話：『你教家政架喎，食到肚痾？』」白痴兼無人性，醫生都會病啦﹗好彩呢d不知所謂既老細已經走左。

宜家呢個老細都係一d旅行精黎架，一講去旅行就唔停得，佢仲教我去教協買全年旅遊保險，真係好鬼抵喎﹗

雖然同佢無咩交往，但聽d同事講佢d處事方法，好reasonable，又唔會好似以前個女校長咁，鍾意聽是非。希望佢真係一個好老細啦﹗

＊尋日睇報紙，有間官校個女校長退休，有個請緊假既miss走返去搞串個party，我睇個校長都唔方好人啦，否則個miss都唔會唔要面咁去嘈啦﹗可能呢個校長就係官校四朵金花之一呀，同我地以前個朵金花一樣咁樣做校長架﹗不過，我地果個好彩d，退休時都仲有一幫擦鞋仔同佢搞party，又無一個老師去搞串佢個party。

希望新校長好過舊果d（注意：係d，係眾數）啦。

影響生計喎

上星期四係學校中一收生既日子，我同小嬌姐都要當值。

小嬌姐好緊張學校收到幾多學生，更緊張既係有幾多學生黎註冊，佢成日追問d同事有幾多個黎左，然後拋低一句：「你知啦，影響生計吖嘛﹗」

但係小嬌平時返工既表現都好影響生計架喎，又唔見佢做好d？

可能佢自己都知道自己既表現影響生計既—收生唔夠時，佢可能係第一個俾人裁囉﹗

自由

在朋友的blog看了她對自己生活得不夠自由而有點抱怨，於是留下回應如下：

「對於小朋友來說，他們似乎沒有自由，全操控在父母手中，但父母的出發點往往又是為了他們著想；對於不成熟的人，自由是危險的；對於不負責任的人，自由會造成沉痛的後果；對於沒節制的人，自由等同濫藥。

自由是自己的想法，一個長困於家照顧孩子的母親，也可以覺得自己很自由，因為她愛她的孩子，愛她的家；一個可以到處去玩的男人亦可以認為自己沒自由，因為財政大權落在太太手。

但，每個人都應該在某程度上有自由選擇自己的生活，既然使用了選擇的自由，便應該對這個選擇負一點責任。現在就算覺得生活得不夠自由，都是當初自己有自由的抉擇。

簡單的說：選擇了便不要嫌棄﹗開心點，正面點面對自己選的生活吧﹗」

發表於此，是希望各位覺得自己活得不夠自由的人反省一下，你是否真的沒自由或不夠自由呢？

＊我認識一些內地朋友，他們活的地方就真的讓我覺得他們沒自由了（詳情不便說太多）。

１８＋２２

去完camp，我例牌會同路人甲講：「我好攰。」

而佢亦都例牌彈番一句：「你估你仲細咩﹗」

今次，佢彈俾我果句係：「你估你仲係十八廿二咩﹗」

我唯有自說自話：「梗係唔係啦，我係就黎十八加廿二呀，死佬﹗」

心裡面果句係：「咁大年紀仲要我捱，仲未叫我收山返屋企嘆世界，係你既問題呀﹗哼﹏」

不過，講真果句，同d學生去camp係樂趣黎既，好過成日響學校同佢地講規矩啦﹗

一桿入洞

個晚camp，同班學生玩pictionary，有個學生畫左個圖，有支球桿，有個地洞，佢個partner估唔到，咁我地咪幫下手囉。其中有人估「一桿入洞」，負責畫果個點晒頭，負責估果個都仲係唔明，估唔到，直至夠鐘，畫果個俾佢激死左，磡頭埋牆，我地就得一句對白唧：「哥爾夫球呀死蠢﹗唔通羽毛球咩？」

到呢一刻，我終於知道呢個學生成績咁差既原因喇，謎底終於解開喇，原因係：死蠢﹗

唉﹗呢個病仲係無得醫架添，佢真可憐﹗