做野睇野只有表層的後生仔

今日諗住無驚無險，又到五點，後生仔今日算激得我少啦，舒舒服服返歸啦﹗臨走前，我填好十幾份學生提名表，諗住叫H過目，無問題就填番學生六年級時嘅操行分上去，就可以交表啦﹗誰知H問我點先可以知道學生六年級嘅操行分，我真係想點佢逐間學校打去問架喇﹗

學期頭收過一次，上個星期佢派過一次俾學生貼相之後又收多一次嘅「學生概況記錄表」已填左學生呢個資料啦，你話佢做野係咪好表面呀？﹗好心收左學生d野番黎，係咁宜都望下係咩呀﹗何況佢唔係第一年響呢度做班主任啦﹗9月1日叫學生填嘅「你好﹗我很高興認識你」寫左好多學生嘅資料，佢問都無問過我攞黎睇呀﹗﹗﹗我根據呢份野，俾左d post 學生去做，響上次兩個鐘嘅面談時，我話過佢無睇份野，但結果佢都係無興趣睇。

佢日日行黎行去，好似好忙咁，但係為自己班又做左d咩呢？幾乎所有班中大小事務我已跟進晒，連學生要買文具、洗潔精、tissue、棋類、甚至乎燈籠，我都買 / 安排學生去買左，佢個腦同個心放左幾多落黎呢？﹗

講番份提名表，我都費事同佢商量咁多，一黎佢d標準嚇死人，二黎教得佢黎我都做好晒啦，咪浪費我d青春啦(無架啦嘛﹗)。只係叫佢填番個操行分啫，究竟佢個腦裝d咩呢？

我響呢度都係第二年做班主任咋﹗真係好想填番份「你好(野)﹗我(好)很高興認識你」俾佢呀=.=