三個傻婆去旅行

今次呢個旅行既發生完全係因為三個中學同學兩年前發口痕話要一齊去旅行，但個期就度左兩年，宜家至度到三日，而原因就係其中一個係超級大忙人。雖然去得三日，但都好期待三個中學死黨可以一齊去吓旅行。響左揀右揀之後，終於決定去曼谷，package連稅每位HKD3666，應該係我去旅行以來平均每日成本最高架喇﹗不過，朋友喎，無計啦﹗

31/8，我地坐夜晚十一點四十分既香港航空，但就遲左成個鐘至上得機，結果遲左一小時十分鐘到。我兩位朋友仔就鬧到死，又話佢地服務唔好，但我呢個去慣乞兒式旅行法既死窮鬼，已經俾各大航空公司訓練到百毒不侵架喇，對於遲一個鐘，我已經唔覺得佢遲左架喇﹗

坐的士去酒店(今次住Plaza athenee bangkok a royal meridien hotel, 五星級架)只係三十分鐘，可能係夜啦(零晨三點幾)，無點塞車，收費300銖。

check in 之後，瞓得落床都四點半喇(即係香港五點半)，眼瞓到爆。

個廁所比我想像中細，但都有齊淋浴同浸浴

間房亦唔算大，可能之前去過住d大陸三四線城市既酒店，真係好大，不過呢度係曼谷，唔同既﹗

1/9，瞓到九點半至起身，十點至落去食早餐。嘩﹗好豐富既早餐呀﹗真係食過咁多間，呢間算好多選擇，但阻於禮貌，無影相，只影左自己既其中一碟。

呢支係泰國維他奶，幾好飲喎﹗

食飽，去游左一陣水，個泳池呢，睇相就好似好大，但其實好鬼細，不過都算舒服架﹗無帶相機無景睇﹗

我地間房望出去既景，出面條天橋就係BTS站喇﹗

游完水沖埋涼，一點正，出發，目的地：翟道翟。
我地酒店好近Phloen Chit站，行去都係三五分鐘。坐BTS去翟道翟都只係十幾廿分鐘就到(Mo Chit站)。
一出站，人多到呢﹗﹗﹗我地響呢度行到六點半，散盡家財至走。我比較鐘意行呢d平民d既市集，佢地有性格d。

雪條呀，好有趣呀﹗

我地行到四點至識肚餓，只因早餐太豐富啦，於是響呢度d檔口食左碗麵，好味喎﹗

呢個賣拉茶既哥仔，一邊拉一邊轉圈，好似好enjoy咁﹗

呢d就係我今日既收穫，唔算多。

離開翟道翟都係一個問題，去坐BTS就好迫人，而且要排隊買票，坐到去Silom站，仲要行一段路至去到食泰菜既餐廳。於是坐tuk tuk，個司機一開價要500銖，我地還到350銖，就費事再殺價喇﹗不過真係坐左35分鐘至到，都係遠。

今晚食既呢間泰菜叫Bann Khanitha，好食，只係4700銖一餐(每位HKD350)，我覺得好抵呀﹗

呢個包葉既小食唔知叫咩名，似乎係送既，好好食﹗

生蝦，好大隻，正到不得了﹗

叫左半支香檳，800銖，ok喎﹗

呢碟係我至愛，併盆，1000銖，好食到唔停得口呀﹗
仲有芒果糯米飯，都只係110銖，平過機場﹗

好好環境架，係house黎架﹗

食飽返酒店，但遇著個唔識路既的士司機(可能佢只係唔識英文)，搞左一輪，終於都係坐BTS返酒店。

返到去，第一件事當然係隊益力多啦﹗一pack六支五種味﹗(36銖)

瞓得黎都一點喇﹗

2/9，今日八點半就起身，九點落去食早餐，係每日最期待既時間。但係最遺憾既係呢日無食到帶子蝦麵，第二朝想食已經變左燒鵝麵喇﹗

食飽，今日去做gym，其實個gym算好多野玩，但食飽左，真係hea住咁做吓就算喇﹗
十二點，又出發，今日去Chidlom既Central World & Zen行吓，不過，都係一d大商場，好似響香港行街咁，無咩特別﹗響Chidlom站有間橙色既Super Rich，兌換率超好(應該係見過咁多間，包括香港百年，呢間最高，HKD1兌3.99B)

呢件衫既兩隻袖都有一隻熊仔架﹗
我地經過Boots時，又入左去掃貨，好平，仲買一送一呀，我個朋友仔話仲平過佢平時響美國買呀﹗後來去到機場想話買多兩支，但貴左又無買一送一喇﹗

路經四面佛。
之後去埋Siam，呢個響siam discovery既小店有個咁既魚缸，好得意﹗

六點十五分，去到Asoke站等去按摩既專車去按摩。呢間叫Coran既按摩店，中等價錢，好似我地今日book既3小時包scrubbing, wax, oil massage, herbal massage，做緊特價，2000銖，阿姐好夠力，環境都好好。遺憾既係今次無時間做埋泰式按摩。

按完返酒店放低d野，坐左架貴tuktuk，因為其實好近，佢收我地150銖，不過，夜媽媽，費事講價喇﹗
然後我地由酒店行去Nana站既夜市醫肚，呢度好似廟街咁，無咩特別亦買唔到野，最特別係見到呢檔曱甴同蟲。

食左個車仔麵，再食埋呢個串燒，好食喎﹗

嘩﹗好大條魚呀﹗

3/9，又係八點半起身，食完早餐做左一陣gym就已經十二點，要check out喇﹗
響酒店門口坐的士出機場，司機車我地行toll way，我地已經俾左70銖路費，後來落車時既車錢係390銖，朋友仔俾左500銖個司機，佢竟然唔找錢喎，如果係我俾錢，我實問佢攞返然後鬧爆佢。
入左禁區之後，又千方百計用埋d零錢啦﹗我地無買手信，本來諗住響機場買d，但黎到一睇，貨品唔太吸引，價錢仲貴到不得了，各位親友，唔好意思喇﹗
今次班機雖然遲左起飛，但竟然早左十分鐘land，好野，又speeding，間間航空公司都有呢個絕技架﹗
返到香港已經係夜晚七點幾喇﹗
三日曼谷之旅就此玩完﹗