新春大旅行

除左以前必定要參加既家教會旅行外，我未試過真金白銀俾錢去呢d一日遊既旅行既，不過，今次陪老爸老媽去，家姐細佬又一家大細咁高興，我當然唔介意去吓啦﹗
響九龍塘上車後，第一站去大埔三門仔馬屎洲地質公園。雖然天陰，但都ok喎，唔晒又唔熱。

響碼頭上快艇去馬屎洲個尾，然後行返黎呢度

唔知點解可以唔洗著救生衣喎，架艇又開得快，真係幾驚架，響外國坐果d我唔驚呀，因為著晒救生衣，天氣又熱，萬一跌左落海最多咪浮住等人救，呢度又凍又無救生衣，我老爸老媽跌左落去都唔知點算呀﹗

以前都黎過馬屎洲，不過無行過黎呢面，d石都好靚架，值得一到呀﹗

仲有個非法撒骨灰場，環境唔錯呀﹗

第二站，去沙田食乳鴿，咪就係龍華囉，又大隻又好味，以前黎食過飯，不過未食過乳鴿，原來真係幾好味喎﹗
第三站，錦田紅磚屋，上網睇過，知道係個跳蚤市場，以前有打算黎行吓架，不過又不了了之囉，但係呢日係年初五，好多鋪頭都未開門。

第四站，錦田石崗俱樂部，又係以前黎過架喇，果次係平日，無乜人，我同路人甲摘士多啤梨不知幾過癮，今日就人山人海喇﹗

得半個鐘響度玩，邊夠玩呀，所以我唔鍾意跟團囉，走馬看花，叫做黎過咁囉。
不過，呢日既目的唔係旅遊，係家庭日，所以都ok架喇﹗