去得太遲的浮羅交怡（第一、二天）

去得太遲既原因唔係因為佢太靚，令我後悔咁遲至去，而係因為我已經去左比佢更靚既類似地方，佢令我出乎意外地有少少失望，而且，以前佢好似係個好hit既旅遊勝地，宜家先去，見到既係佢已經不再興盛既一面，感覺有d破落。

15／2

一早出發去深圳坐airasia，準時起飛，準時到達，四個小時既機程，睇吓書又過左喇﹗

去到吉隆坡LCCT(low cost carrier terminal)入境，好多人，排長龍，搞到四點幾至坐低食野﹗hea吓hea吓，1945起飛，2030到左浮羅交怡。

一出閘就有好多租車既counter，我地揀左一架850cc，棍波，細車，MYR50（大約＄130）一日，超平，應該好過搭的士。租車手續勁求其，比起租單車更兒戲。租單車都話試吓個brake，睇吓架車既真身，踩兩腳試一試，呢度租車，只係問你有無牌，係咁兒睇吓個證，對都唔對吓passport，行出機場，指住一架車，就話係你架喇，然後，你就可以開車走喇﹗

我地住kuah town，如果你當浮羅交怡係一個四方形，kuah就係響右下角，附近有eagle square, ferry terminal, legend park，而對出海面就係palau dayang bunting geoforest park。

我地間酒店（Bay View Hotel ）係一座市內罕有既高樓大廈，五百蚊港紙一晚，又大又舒服，不過，當我去過Cenang Beach果邊同了解左個地形之後，我有少少後悔，雖然……呢間都好好﹗

由酒店房望向kuah town一景

樓下係night market，不過好靜，我地食左少少野就返房休息喇﹗

16／2

我地今日既行程係揸住架車，繞島一周，去到邊玩到邊。

第一站：legend park。

呢個應該係無咩人會去既景點，但係真係幾舒服架﹗

而且幾靚

第二站：eagle square。

佢就係響legend park旁邊，無咩特別，鷹係呢度既代表，都到一到啦﹗

第三站：北上，jetty Kilim。

Kilim係條河名，呢度出去可以睇bat cave, crocodile cave, eagle feeding等，不過，千祈唔好響呢度join，好貴，去Tanjung Rhu Beach度平一半（MYR90一位）。我地兩邊都無幫襯，因為打算遲兩日去扒kayak，都會響呢度附近，而且我地對呢d cave無咩興趣。

第四站：Tanjung Rhu Beach。

呢度聲稱係全島最靚既海灘，望，係好靚架，但落左水就知d水唔清。呢度係個島既右上角，處於河口，水唔清係自然既事。不過，我地都游左一輪。

又響海灘邊食吓野，坐露天小hut（左邊汽車旁）超舒服。

第五站：black sand beach。

佢係響Tanjung Rhu Beach去cable car（即係島既左上角）既途中既，呢度唔適合游水，不過d沙真係有d係黑色架﹗

第六站：cable car。

可惜，去到至知佢維修，明明上網睇過，都睇唔到佢唔開，天意﹗好彩，有車，好彩，順路唧﹗咁就響oriental village（同cable car同一個位置）度行左一陣啦。

第七站：Cenang Beach。

呢度有好多beach villa，好似泰國既布吉Patong Beach，好有假日氣氛。位於島既左下角，去島既右下角既kuah要半個鐘車程。機場就響附近。

我地無玩parasailing，好多年前已經玩過，覺得無咩特別。我地響度行吓，食吓野，影吓相，好舒服咁度過左兩三個鐘。（呢度八點至黑齊架）

響呢度睇日落真係幾靚架﹗

不過，當攞佢同長灘島比較，呢度水唔夠清，沙唔夠幼。

天黑後，返酒店，車程半小時。