嶺南派山水畫（第六堂畫水仙）

上一堂去左玩，請左假，所以呢堂係第六堂。

今堂有d難，要先勾出外型再加色，畫左一堂先畫好一張。

老師既評語係：顏色幾好，不過太整齊，d線條唔夠放﹗

非常值得一睇既攝影展

今日諗住去中央圖書館打書釘，點知一落車就見到地庫有個攝影展，走入去睇吓啦，唔睇由自可，一睇果然好大收穫，值得一去。

張張都好有睇頭，呢d先至係攝影展嘛﹗（場內不准攝影）

展覽中，最多既主題係霞蒲，（好可惜上次我去時天氣唔好，影唔到d咩﹗）另外，有越南阿婆啦，鳥啦，運動攝影啦，梯田啦……而最唔好睇既係人像同creative（我個人認為啦）。

展覽中最好野既係有導賞員邊講邊睇，而每個導賞員講既內容都唔同，今日我跟左1．5個（睇左兩個幾鐘，趕住走喇﹗），學到好多野。d導賞員都係猛人，好有經驗，免費代錢入你袋，真係想聽完再聽，好正﹗

後話：

睇完之後，有個諗法－－九成九既相都用photoshop搞過晒，咁洗咩影呀？有d仲係大執特執既添，「我接受唔到囉」﹗尤其是d電腦合成相，我好唔鍾意。如果張相有少少野唔ok，執少少係需要既，但係加個人加隻狗加個漁網刪走棵樹咁，叫影相咩？﹗不如話係執相比賽啦﹗

有d人話，以前d黑房技術都係執相啫，但係我覺得宜家d執相技巧易學易精，同黑房技術係兩碼子既事。

我仍然深信，按下快門既一刻就應該決定左張相係點既做法。

蘋果批

路人甲由尋晚到今朝心情都唔靚，於是今日整左個懶人蘋果批俾佢食，呢d鬼佬野，佢最like架喇﹗

點解係「懶人蘋果批」？因為，個皮係現成既，個餡得蘋果、jam同糖囉。

現成批皮：

蘋果切片：

鋪好批面：

焗至金黃色：

仲整多兩款，一共三個不同甜度俾大老爺揀：

不過，呢種皮既反式脂肪好勁，多食無益﹗

到左呢個年紀......

上年開始，我開現多左好多乾紋，似乎係去完新彊風乾左所致，於是買呢樣揸買個樣揸，又去吓做d免費facial試吓，結果出事喇﹗

去左Borghese試完之後，本來走人架喇，佢又sell我買course啦，我老老實實咁話我其實唔做facial既，但佢吸引我既地方係，我買佢d野，放響度，我得閒就去，佢有儀器幫我做，效果會好好多。結果，買左，好貴，貴到可以買一部單反，用成世，或者買支靚鏡頭，保吓值﹗

後來做左幾次，佢次次都響度sell野，我覺得好煩，成日好怕會心軟成日買野。尋晚，終於的起心肝去攞返所有野，自己響屋企做。

但係，尋晚播既「星期二檔案」d專家同醫生都話：實驗証明一支政府俾病人既保濕cream同一d幾百蚊既cream既效果無咩分別﹗吓......

但係我好認同節目裡面有個女人既講法：到左我地呢個年紀，有能力既話，貴d都想試吓架啦﹗

我希望我會繼續好明智咁試囉﹗

 

 

自學口金

睇人地d blog，見好多人整口金，但我一直都無去深水埗買黎整，咁啱搣匙華姐去左個私人小組學整，我就順便搭佢買一set材料番黎整吓，睇吓咩野係「口金」啦﹗

一set ＄50，明知係貴，不過方便就算啦，而且第一次做，唔知頭唔知路，一set過，實ok啦﹗

尋日，一得閒就整一得閒就整，頭頭尾尾都整左成兩個鐘至搞掂，全人手製作，不含機器幫忙﹗

其中一面：

另一面：

裡面：

好耐無做過手作仔，發現手腳慢左，d針步又肉酸左，唉﹗

嶺南派山水畫（第四堂畫金苞蝦衣）

踏入第四堂，有個無見過既助教今日指正我既錯處，開口第一句就係：「你係咪新架？」我答佢：「第四堂算唔算新呢？」然後佢好仔細咁教。

今堂畫左兩幅，佢話第二幅已經進步左好多，我心諗：「係老師開頭講得唔清楚，我跟錯左啫。」後來我話下堂我要請假，佢好誇咁：「吓？你請假？我咪無得教你？」好彩佢係女人，否則我會以為佢睇中我添﹗

放學時，同個學左好耐吓既同學仔一齊走，佢話：「原來你第四堂學咋，你好叻呀，學得好好呀﹗」我拿拿聲多謝都黎唔切啦﹗

查實，咩叫好，咩叫唔好，我一d都唔識分，未學之前，連咩係嶺南派既畫都唔知，只係問過個修fine art既朋友仔：「喂，我要學國畫，邊種最適合入門？」然後連睇都無睇過咩係嶺南派就報左名喇﹗真係求其得好緊要﹗

今堂學畫「金苞蝦衣」：

U magazine今期又登左我既稿喇﹗緬甸﹗

去完緬甸返黎休息左一大輪先搞個blog，期間都有寫吓野，打算send去U magazine。send左之後又等左三幾個星期，今期終於登左喇，David哥又有禮物收喇﹗（上次份禮物送左俾路人甲，今次輪到我老豆阿David哥喇）

原文：

雖然香港人並不熱衷於前往緬甸旅遊，有些人甚至不知道緬甸的地理位置，對它的認知只局限於「昂山素姬」，但我卻被它獨特的人文風貌所吸引，用了十天到彼邦去感受感受﹗

緬甸是個佛教國家，每個孩子到了大約十歲都必須「首次出家」，而一生中的出家次數則由他們自己決定，所以，在緬甸隨處都可以見到僧人。他們每天晨早便赤著腳、拿著砵、圍著袈裟在街上化緣；閒來又走到街上跟遊客暢談一番，一方面為了練習外語，另一方面則想多了解世界各地的情況。

以往，緬甸是個封閉的國家，這雖然影響了國家的經濟發展，但卻保留了緬甸獨特的傳統文化。就人民的外觀而言，緬甸人無論男女老幼都喜歡把香木粉塗在臉上。據說，香木粉有防曬、防皺紋、防蚊和保濕等美容效用，怪不得連外國美容用品也不敵香木粉，令緬甸人對它不捨不棄。除此之外，緬甸的天氣炎熱，市民都喜愛穿清爽涼快的傳統服裝—沙龍。一塊薄薄的棉布，圍在腰間打個小結便成了沙龍，外型雖然似長裙，但緬甸男人都不介意穿著它上街去。緬甸男人除了喜愛穿「裙子」外，更喜愛紋身，不要以為這些「紋身男」有什麼特殊背景，其實紋身只是一種美的象徵而已。緬甸人還有另一種特殊風貌，就是只穿「拖鞋」。在緬甸境內，所有廟宇範圍都不准參拜者穿鞋，而緬甸人每天都會到不同的廟宇參拜，因此，「拖鞋」便成為他們最佳的選擇了。對於遊客來說，赤著腳在寬廣的廟宇內四處走，真的是一種有趣的體驗呢﹗

另外，緬甸人民對遊客特別熱情有禮。每當我們走在街上，總有人跑過來跟我們寒暄。在鄉村裡，他們就表現得更熱情了，又邀請我們到家裡坐，又勺飯，又遞茶，縱然大家言語不通，但你卻一定能夠感受到他們那種喜悅和情真﹗

緬甸，雖然不是什麼著名的旅遊勝地，但它總會給你一種驚喜。

嶺南派山水畫(第三堂畫雞冠花)

今堂畫雞冠花，好難，都唔知實物係點。

今堂主要學畫葉，成幅野畫完之後，不禁好大聲咁講左句：「嘩﹗都唔知自己畫咩？﹗」然後俾阿老師睇啦，我要佢話我知邊度畫得唔好，佢講完一輪之後，阿助教就話：「第三堂咋喎，想畫成點呀？﹗」阿老師聽完好奇怪咁望住我：「我以為你學左好耐添，第三堂好好架喇﹗」

唉﹗你地話呢？

緬甸雜碎(續)

對於旅行，我視為一個project，不單止去睇去玩，仲要因為去過而要知得更多。上次去柬埔寨時因為無時間，所以無咩睇過資料就出發，結果個project有d遺憾。今次點都要借本書黎睇吓究竟緬甸係點既，呢本書講左好多資料俾我知，令我對緬甸認識多左好多。

有朋友會覺得我有多動症，有d認為我有亞氏保加症，有d覺得我去旅行係攞苦黎辛。但係，我就係咁架喇，咩症都好啦，開心就得啦﹗

補番d阿豬幫我影既相先：

睇吓我跳得幾開心。

我仲會周街瞓。

又會玩鬼d小僧人。

亦會無聊自娛。

當然會撩d細路玩。

辛苦既行動都唔怕。

咁我當然有好hea既時候啦。呢度係我最鍾意既Buledi，瞓響呢度等日落，真係一流﹗

雖然畏高，但我都會盡量爬高，死未？﹗

呢個look令好多緬甸人指指點點，可能係幅鏡太行啦﹗

獨立紀念碑

呢度幾grand架﹗

緬甸--Inle lake(3)

續......

我地又去左睇呢d長頸族。因為聽人講佢地係被賣豬仔黎到呢度既，而且生活得好似囚犯咁，所以本來無打算睇既，但係船伕唔識英文，佢車我地去邊就去邊，終於都黎到呢度見到佢地。

但係，佢地話係自己黎呢度搵工做既，本來係住響緬甸北部既，為左搵多d錢養家，佢地自己走黎呢度。而且，我見佢地既生活都幾好，佢地都幾開心呀﹗

一舊咁既銅圈都幾重架，d長頸族為左靚，不惜將d咁重既銅圈放響頸上面，導致脊骨出現問題，真係奇怪既風俗。不過，條頸唔夠長又嫁唔出，點揀呀？等如中國既「三吋金蓮」一樣，都係為左要嫁得好﹗﹗

途中見到呢個小僧人響度又跑又叫，原來佢正追住d鵝之類既動物，用石頭打佢地，唉﹗都話太易成為僧人，就唔係個個都係真正既僧人架啦﹗

最後，我地去到湖中心等日落，日落並非最靚，但環境好舒服﹗

等得無聊，唯有自拍同玩囉﹗

返回guesthouse之後，已入黑喇，無咩做，於是攞支電筒出guesthouse門口玩寫字，嘩﹗唔玩唔知原來我d空間感好成咁喎﹗

因為本來十二點既機，宜家取消左，我地被賣左俾另一間航空公司，於是第二朝一早我地就離開Inle lake喇，呢個景係響guesthouse間餐廳望出去影既，連間廟都無時間去。

返到仰光，搵到兩個女仔share的士，去左航空公司幫阿豬攞返張機票錢，點知搞左一輪都係要返香港至可以搞手續，為左張機票都搞左幾多時間呀，響Mandalay時上網印番張flight coupon出黎都搞左好耐，全因呢度d網絡真係慢到呢......

去完航空公司，搵黎搵去，終於搵到呢間Winner Hotel，US20，舒服﹗

於是，因為頂唔順出面好熱，我地都係留左響酒店成日，休息一下。

呢個就係我畫番當日響Inle lake踩單車既圖喇﹗記住要響學校旁邊既小路轉入去，先至會去到水鄉架。

7/4/10，準時1030到左曼谷機場，因為曼谷形勢緊張，所以我地都係留左響機場，食吓野，行吓，我又買左本"The Kite Runner"黎睇，時間好快就過左，又到左上機既時候喇﹗

話時話，真係覺得曼谷機場幾靚喎﹗

緬甸--Inle lake(2)

5/4/10，0600已經俾出面條河道既船既摩打嘈醒，於是就早d起身食早餐喇﹗

0800，我地尋日約左隻船遊湖，k12000一隻，包一日，算好抵玩啦。因為我地間guesthouse出面就係碼頭，所以好方便。

我地間guesthouse響Inle lake北面，要出左水道至去到個湖，出緊水道時，見到有水牛準備去返工，橫過緊水道。

去到湖中喇，就已經見到好多漁夫，佢地最特別既地方係漁夫用一隻腳去划船既，只有緬甸呢度先能夠見到咁既絕技。我相信佢地用腳既原因係方便打魚，因為佢地打魚既方法係放個籠入水裡面，跟住用支义既水裡面篤篤吓咁捉魚。

今日第一站係去一個地道既菜市場，Kaung Daing市場，而既地圖上面寫住floating market既，只係做戲俾遊客睇既，呢度呢d先係真正既市場。

離開時，見到位阿叔響度用部好原始既機器切葉，呢d係牛既糧食黎架。

跟住再上船，繼續行程。呢d人響湖底打撈d泥上船，然後會送返去floating farmland做耕作泥同埋肥料，因為湖底泥係好肥沃既。

呢d就係floating farmland喇，我都試過企上去，真係浮得起架，不過如果大力d踩呢，佢又會沉喎。

上晝係沖涼既時間，又見到一班細路做光豬戰士，睇見佢地就開心喇﹗

跟住去左Nan Pan睇銀器工場，當然啦，d銀器吸引唔到我，反而隻貓就好過癮﹗

後去左In Paw Kone睇織布工場，佢地有一種布係用蓮莖裡面既纖維織既，好特別，d布係冬暖夏涼既，賣布既人話。

然後去左銅工場。

睇埋製煙，佢地d煙係用葉包住既。

仲有做傘啦，呢位姐姐響度整緊傘紙。

又去左Nga Phe Chaung，呢度又叫做貓跳寺，因為有d貓仔響度，又會有人引佢地跳圈，所以有咁既名，但係其他時間呢，d貓唯一會做既野就係「死睡」。

待續......