一條友西貢漫遊

返左幾日工，未開學已經諗緊幾時先放暑假，死未？﹗

趁星期三路人甲day off，佢去黃石玩sailing，我自問玩唔到laser，又唔想自己租隻topper，佢又要顧住我，於是決定跟佢車入黃石然後漫遊……

行程如下：

第一站，黃石水上活動中心，一咁早就到，人地返工都未返到呀﹗我其實行左個圈，好寧靜﹗

第二站，黃石燒烤場涼亭。因為想坐船，但係要1035先有船開，於是坐響涼亭睇埋本slumdog millionaire。可能有人話我低B，做咩坐公園，但係我又好鍾意呢個行為喎﹗個涼亭超涼爽，坐到我唔願走﹗

第三站，黃石碼頭至馬料水船河，為時兩個鐘，會途經高流灣、荔枝莊、深涌、塔門等地。其實大部分地方以前都去過，今日又得自己一條友，所以坐下船睇吓風景算喇﹗

每個碼頭都總有個燈塔，呢個響黃石碼頭既，都算最乾淨靚仔喇﹗

咪睇佢好似好爽，個日得一兩級風，悶呀﹗

望住呢個救生圈諗：如果真係跌鬼左落去，佢應該救我唔到，隻船開得咁快，仲無咩人坐添﹗

塔門，小漁村一個。

蝦艇，好似響汪洋大海咁，其實……

沿途都係簡單既三種顏色：白、藍、綠。

老人與燈塔，似乎好夾，都好有孤獨feel。

警察，咪走﹗

第四站，馬料水搭車去西貢。因為要等埋路人甲有下場，仲要俾d野人，所以都係響西貢等路人甲好d。

行去大學火車站途中，見到吐露港公路咁直，影番張先﹗

第五站，lunch。好快趣又入到西貢喇，我揀左呢間SAI食個lunch，就響碼頭側邊。

叫左個海南雞飯加杯青檸梳打，一坐就兩個鐘，食吓又睇吓本slumdog，結果飯好好食，書好好睇，全部睇晒食晒﹗好飽﹗

第六站，西貢市遊蕩。

首先當然係去望吓d船家賣野啦。

然後去吓呢間從未踏足過既天后宮，超乎想像咁現代化，sorry, not my cup of tea!

亂行，行左黎居屋後面個停船區。講開又講，呢個居屋「風水」唔錯呀（不過我唔信風水架，哈），滿記個老闆開滿記時，就係住呢度架（係我個friend既鄰居），宜家去到杭州玩都見到滿記，真誇﹗

生曬魷魚，正﹗

終站，麥記等路人甲，完成半天一條友亂咁行。繼續有下場：路人甲瘋狂購物日，可惜，全部睇唔啱又或者無碼，哈哈﹗