澳門一天遊（下）

逛完住宅博物館，又再向美食進發，今次是豬扒包，位於路氹博物館旁邊的大排擋。

15蚊一個，好食﹗

食完入左去博物館過冷河，天氣實在太熱﹗再行過對面間天后廟影吓相。廟就影過好多喇，呢度d光線真係唔錯，可惜我呢條蛇技術有限，係影到咁樣唧﹗

下一站，紅窗街。乘巴士過去澳門半島，大三巴附近下車，很快便找到這條老街了。中午時分，很多店鋪都關門，相信晚上應該會很熱鬧的。

很有懷舊味道既廣告呀﹗

黎到呢條街，當然繼續食啦，今次係食翅，我仲食左個砂鍋翅，220蚊四個人分，勁多翅。添發記果然多人食，我地入左去之後就開始有人排隊喇﹗

之後，一行十人又去買手信，我買左一盒杏仁餅俾自己食，佢地大包細包，我同路人甲唯有等同睇啦﹗

買完手信就行左過去大三巴，大家決定去食禮記雪糕，但時間已經係六點幾，禮記收七點，大家都急急腳，結果經過全日最靚既瘋堂斜巷都無時間影吓相添﹗

呢款三文治雪糕夠晒經典，不過我無食，叫左個雪糕涼粉，因為想飲野。

點知舊雪糕鬼咁細舊。呢度既雪糕既味道好似以前細個食個d，好懷舊﹗

食完雪糕，佢地繼續去食義順雙皮奶，我地因為買唔到同一班船，所以走先，搭左架巴士去碼頭。

因為我用左上次個攝影比賽送既船票，要去上環上岸，所以我地去左我響香港個「中途宿舍」度瞓左一晚，第二日同路人甲繼續逛街。最弔詭既係呢日最後一餐都係去左牡丹樓，死未？﹗

第二日一起身就去左板前食個brunch喇，然後去旺角逛，再嘆多個tea，仲唔肥？