舊年聖誕節響北京見「非誠勿擾」上畫，以為好悶既戲，後來見響大陸好收得，香港唔收得，覺得應該好睇喇，於是尋晚租左黎睇，無失望，有驚喜﹗
男主角其實幾可愛，仲好風趣，只係老左少少，同個靚字拉唔上任何關係，佢咁既條件搵老婆，係有d難度。戲裡面講佢見既幾個女人，都各有特色，亦好有娛樂性，而且有d仲好真實，加強左個戲既可觀性及娛樂性，亦豐富左成個戲。
女主角要求做男主角個女朋友，但條件係個心可以諗住另一個人，可愛坦白﹗我相信每個成年人都有好豐富既過去，掛住另一個人而唔俾老婆或者老公知既，可能佔90%，但女主角好認真咁講出黎，真係幾可愛﹗雖然話掛住啫，但我相信時間可以磨滅一切，當一個人同一個對自己好好既人一齊既時候，可能最初唔會去愛佢，但相處耐左就有感情架啦，就好似以前盲婚啞嫁時代咁，久而久之，只會愈黎愈愛架啫，如果時間過左去而呢位女主角只會抱住以前既一切唔放手只係佢唔愛自己囉﹗人大左就會知道愛情係一剎那既，感情至係永恆既﹗
另一套戲，又係以為唔好睇，不過都想睇吓講咩既，係「伊沙貝拉」。成個戲做得最好既係音樂同氣氛，金先生真係一個好人，佢除左幫d商業片配樂，仲會幫d無錢賺既劇團配樂，抵佢攞獎﹗
成個戲好有格調，拍得澳門好有風格，而梁小姐響呢個年紀可以演成咁，都算叻女，我一直覺得好識演戲既年青女演員係得一個，就係張柏芝，佢演第一部戲時，我已經覺得呢個妹妹好勁，而家多一個，就係梁洛斯，不過佢仲差左d緣，係觀眾緣，起碼我呢個觀眾總係覺得佢個樣三尖八角，唔係好順眼。
不過唔緊要啦，成張牆紙(長治)照住，識唔識做戲都無問題啦﹗
經妳推薦，好想看非誠勿擾，其實，今年去了兩次中國，發覺國內的人都幾爽，幾頂癮，而香港人好像悶了一點。
回覆刪除[版主回覆08/23/2009 07:53:00]其實都唔係因為住響邊個地方既人既，係人既性格啫﹗我相信第二d地方既人遇到我，都會話「香港人幾頂癮喎﹗」咁啦﹗哈哈﹗
蛇仔吾好笑我吾識嘢,吾明白成張牆紙照住,可吾可以解釋一下(指導),謝謝.
回覆刪除[版主回覆08/31/2009 23:13:00]梁小姐同李公子生左個仔你應該知架係咪，佢地個仔叫「長治」（牆紙），see？