Assembly集結號

本來對呢套戲無咩印象，只係戰爭片，大陸拍既，係咁多喇﹗尋日去租碟，無咩戲好租，而「集結號」就有blu-ray，所以租黎睇下。響對套戲一d資料都無睇過既情況下租左番屋企，結果......喜出望外﹗

我一直都好鍾意睇戰爭片，印象最深刻既係saving private Ryan，場面好震撼，真既一樣(其實我未去過戰場，真係唔知戰場係點，但係覺得佢拍得好真實﹗)，但原來「集結號」係更加迫真，更加震撼，更有現場感。槍林彈雨就一定有架啦，但係突如其來既炸彈，炸到士兵分開兩截，斷肢隨處可見，導師使用手搖機拍攝，令觀眾更似置身戰場之中，唯一覺得不夠好既係音響，如果呢方面都加強一d，會好睇好多﹗

除左戰爭場面外，戲裡面更加講到「義」同「信」--而家d人愈黎愈少既野呀﹗都話「仗義每是屠狗輩」架啦，面對死亡，人人都怕，但係一d無讀過書既士兵，為左完成任務，明知送死都繼續，雖然有d唔情願，但係為左「義」，撐到底﹗上司下過命令：聽唔到集結號(號聲，命令士兵可徹退)，就算死晒都要繼續。而男主角亦相信呢位上司(其實又係朋友)，結果，上司被迫徹退而掉底男主角成隊人，無吹過集結號，男主角亦真係打到全隊人死晒，呢個就係信同義既表現啦﹗

男主角後來不惜一切要搵番四十幾個同伴既屍體，要幫佢地求番個「烈士」名份，對同伴對自己都要有個交代，其實為左同伴亦為左自己﹗片未最終都聽到集結號，但係四十幾個士兵係響個墓裡面聽，幾悲涼﹗

每次睇完戰爭片之後，都係同一個諗法：打仗根本就係唔值得，尤其是打內戰﹗