旅友

我去旅行好多時都會同一D唔係好熟，甚至唔識既人一齊去，有時係因為怕悶，有時係因為大家可share一下途中使費，有時幾個人去又會開心D，可以食多D唔同款式既食物，有時兩個女仔去，係因為搵唔到更多既腳。

但，無論如何，每個旅友都係獨特既，各有各既性格，都幾有趣架﹗

人年紀愈黎愈大，接觸既人多左，見既奇怪野奇怪左，就愈黎愈無所謂，旅友呢，更加係唔會對佢要求高，而且我家陣練成百變功，遇到玩得就玩盡佢，遇到唔鍾意玩既，我咪影相睇風景囉，其實好少要求人地係點點點，只會有時覺得唔明點解人地咁樣咁樣，不過，(我)都好少玩得唔開心架喇﹗只有人地玩得唔開心或者唔鍾意我某D做法又唔出聲，但係就自己唔高興囉﹗

今次去旅行，到目前為止都玩得好開心，因為我明白每個人都有自己既性格，人地係點樣都無所謂，將就吓，坦白D就得啦﹗一個團隊去玩，最緊要一齊玩得開心，就算旅行時影相影黎攞獎，睇名勝古跡睇到賺晒，都不及同旅友玩得開心重要。

人係旅途中最重要既，同一個名勝，今年去同十年後去都係可能差唔多，但係同咩人去個效果就差得遠喇﹗所以，一班人去旅行，可以合拍又一齊玩得埋係好緊要既。

今次黎土耳其，真係歷年來最唔洗操勞既旅行，真係要多謝設計旅程、上網訂野、又買埋車飛、仲同酒店周旋既旅友，佢地無投訴又大方，真係我既學習榜樣。