玩轉土耳其浴室

土耳其浴(hamam)，真係只有響土耳其至可以感受得到喇﹗

 

今次，我試左兩次，兩次都好local。

 

第一次，響Urfa，去完Harran之後，要求車我地去玩既導遊介紹沖local土耳其浴既地方，帶我地去。於是，佢帶左我地去hostel附近既浴室，雖然唔係D幾百年歷史既浴室，但相當local，收費亦比較平。

 

Local同遊客去既土耳其浴有咩分別？大概係遊客去既浴室中，幫你捽老泥既可能會係男人啦，沖既方法會是但D囉﹗不過，我兩次都幫襯local既。

 

第二次，係響Canakale等車時，自己走去搵黎沖既，呢間就真係好舊，有幾百年歷史果D，有個太空艙圓頂響正張雲石豬肉枱上面果隻，非常有風味﹗

 

第一次沖，咩鬼野都唔知，d阿嬸又無個識英文，搞左好耐至搞清楚幾錢一次，包d咩。好喇，俾完錢要除衫喇，個休息大堂有幾間房仔，大家各自入房脫啦，除剩條底褲，開頭大家都用大毛巾包實，但一行到入浴室，個個女人都係半裸，我地都立即除左條毛巾。

 

最初，大家都唔知要做咩，咁有個阿嬸話(全部用身體語言)要洗頭先，我地又無洗頭水喎﹗咁果位阿嬸就叫我地逐個坐低，佢幫我地洗頭。講真，佢既洗法係有d粗暴架，但係後來先至知道佢唔係staff黎架，佢係黎沖涼既街坊黎架﹗

 

我地一個一個焗完sauna，洗完頭，就瞓響張雲石豬肉枱上面休息，塊雲石熱熱地，幾舒服架，不過，瞓之前就要沖一沖走枱上面d老泥先。休息期間，個staff就逐個幫我地捽老泥，睇住人地俾阿姐一捽就一大條千年老泥掛左響個身度，都幾搞笑。

 

期間，洗頭阿姐響出面個休息室吹完水、煲完煙，又走返入黎，同d沖涼街坊再吹過水，又叫我幫番佢按摩，而另一位年青媽媽就不斷送枇杷我食，食完一粒又一粒。佢地雖然唔識英文，但係全部都好nice好helpful，不斷話我地知水溫要點，焗sauna要焗幾耐，可以瞓邊度休息，哈﹗我地又似乎溝通無障礙喎﹗

 

輪到我俾阿嬸捽老泥喇，當然又係一身都係黑媽媽一大條一大條既老泥啦﹗就響呢個時候，洗頭阿嬸指吓我d friends既胸，然後雙手將自己果兩條胸前巨型木瓜攞起，再一鬆手，「瞪呀﹗」兩團肉又掉番響胸前，示意點解我地個胸咁細，笑死左我。

 

跟住，佢又響度跳蒙古舞咁fing膊頭，搞到胸前兩團肉又再左搖右擺。最後，佢問我地點解身上面咁多毛(除左頭髮之外既所有毛呀，係邊d？自己諗啦﹗)，好肉酸，應該要剃晒佢﹗(佢地真係剃晒架﹗)

 

第二次沖，無咁多街坊，但係可以瞓響雲石枱上面望住浴室個圓頂，d光線同造型都好科幻，超過癮﹗而最難忘既就係：無上裝既捽老泥阿姐幫我捽心口時，俾左一啖38G奶我，嘩﹗好震撼呀﹗

 

呢次我地試埋soap massage，捽完老泥後，阿姐會幫我地查番梘，然後按大約十分鐘，跟住，我地就可以行去四周既水盆度自己淋水沖涼同埋休息喇﹗

 

*土耳其浴既沖涼時段有限制既，女人既時間短d，大約係上晝12點至下晝5點左右，男人既時間就係其餘既時間。有d浴室係男女分開既，無時間既限制，但係室內既陳設就極度「貧富宴」喇﹗男人果邊又有裝飾又有傢私，女人果邊得d長木橷，鬼咁簡陋。我入過男人果邊之後先至知，真係全世界都係男女不公架﹗

 

對於土耳其女人黎講，去沖土耳其浴係一個同街坊朋友吹水relax既機會，好似話d阿媽仲會響沖涼時幫阿仔揀老婆添喎﹗

 

第一間有locker仔，可以放貴重野；第二間連換衫房門都無得鎖，又無locker，各安天命喇﹗