佢一早同我食完早餐就坐車入東涌逸東村租單車踩去廸欣湖再折返。點解唔用自己車？我個架俾佢拆散左，未砌番，而且今日會玩到夜晚，泊咁耐車會好貴。
我地未踩過呢段路，唔係好識路，去個程又影吓相，又搵吓路，踩左三個鐘至到廸欣湖，返個程個半鐘就得喇﹗來回42km。
成段路都有幾次要抬單車架，你睇我幾辛苦﹗
未出海邊之前，有少少呢d單車徑踩吓架﹗
由呢堆雜草同油站中間既超窄神秘入口進入，就入到黎喇﹗
出到海邊喇，超靜，全程只見到一對男女踩，完全係「我地玩晒」。
途中又要搬車落橋底。呢度好低，中間個段要烏低身至行得。
過左地鐵廠，踩左一段馬路，黎到呢條「時光隧道」，裡面無燈，入到去咩都睇唔到，好有探險feel。
搵左一陣路，就黎到「鹿頸村」。百厭既路人甲話佢細個時黎玩到好夜，就響前面藍色間屋過夜，以前呢度成個海都係浮木，佢話響木上面跳黎跳去好好玩架。不過，對於我呢條無晒平衡力既蛇黎講，企響呢條浮木度已經有d難度喇，咪講話跳啦﹗
又搵左一陣路，踩左上好似公路咁既馬路上面，大貨車響側邊經過，我都唔理得咁多喇，條長命斜踩到我差d要落車推呀，不過我見響馬路度推單車會超級樣衰，所以頂晒佢。過左似公路既馬路後，就會入到廸士尼區，馬路鋪晒紅色，d樹好靚（仲好貴添呀）。無幾耐就到左廸欣湖喇﹗
就係呢d馬路喇，你咪睇佢暗斜暗斜，好長命架。
踩完還車，嘆個tea，再坐車入機場客運大樓T2，睇4D電影，Avatar，終於都買到飛喇，比3D多左d風、水、肥皂泡、煙，我唔鍾意佢張椅唔識郁，咁樣唔係幾4D。
入場前仲有展覽睇，呢個係30年代既經濟艙。
近代商務艙。
睇3D既大眼鏡加由頭食到尾既爆谷。
玩足一日，返到屋企已經要瞓喇﹗
沒有留言:
張貼留言