國際漫遊協會 ＂遺。美相展＂

本來對呢個相展既期望就唔大，尋日睇完之後，仲要係失望添﹗我呢條蛇唔識影相，但就好識批評，我同路人甲一路睇我一路批，路人甲話小心影張相果個人聽到呀，哈，聽到咪益佢囉，唔好話學到野，而係聽吓人地有咩睇法，去上堂學影相都係想俾老師評吓d相架咋(雖然我都無學過)，收佢錢添呀﹗

第一，d相晒得唔好，好多相都暗左。

第二，好多張都無趣味，好普通。

唔識野扮晒野既蛇仔批評如下(唔想逐張影，只影左本小冊子咋)：

左頁上：隻船遮左個太陽倒影，影既位置唔好。左頁左：我估作者想影埋樹葉做相框，但咁就就唔到個建築物，宜家睇唔晒個建築物，唔完整，應該張相應該橫倒，直倒亦令水太多。左頁右：呢張我幾鍾意架，張相玩線條，亦有個女仔做主體，幾好。右頁上：雖然有條白線做引領線，但係座山太細，裡面既教堂亦唔清楚，成張相都好普通。右頁左：雖然呢張有隻船做吓主體，但岸邊d屋同個岸亦交待得唔清楚，我個人覺得橫倒影多少少岸上既景物會完整d，不過，個景非常一般囉﹗右頁右：景，普通；主體，無特色，背景令佢唔突出，收埋佢算啦。

左頁上：兩個主要建築物色彩都咁勁，但重疊左，唔掂。左頁左：普通到爆。左頁下：影倒影咩，又唔係，前景影果兩個人咩，又太暗，影建築物咩，無特色。右頁上：又係天地平分，地面顏色唔夠豐富但佔左半張相，咁都入圍？右頁左：呢張好有poster feel，ok架﹗右頁右：無比例，感受唔到條瀑布有幾壯觀，而且景色一般。

左頁上：postcard相一張。左頁中：如果係影個影既話，作者個位置應該向左移，宜家都唔知佢影咩。左頁下`：呢張幾好架，但差個主體，放番個人上去就好晒喇﹗右頁上，又係天地平分，仲無咩景添。右頁左同右頁右：呢d都會係我唔俾人睇既失敗snap shot囉，個塔右下角個黑影做咩架？﹗

左頁上：普通。左頁中、下同右頁上：都係無特色既postcard相，左頁下有兩個人做比例，但就唔突出，要搵先見到。右頁中：有比例，有動感，主體清晰，唔錯。(作者成日講攝影講座架，一定有番d水準既)右頁下：山景太多，唔能夠俾讀者感受到「冰」既震撼感，而且隻船同冰撞左色。

左頁上：究竟d經幡定雪山係主角呀？兩頭唔到岸。左頁中：有咩特別呀？左頁下：主要係d光線做得好，但整張相就空洞左d喇。右頁上：做咩呀？影人，人唔清楚，影建築物，太細太遠，構圖，無美感，失敗。右頁左：好普通既街景，但用黑白影神秘女人，即刻提高番個觀賞度。右頁右：能夠有層次咁影出山景重重，構圖同用色都幾好，不過，如果黑影減少，用橫倒影埋左邊既山勢就更加好喇。

左頁上：呢張係我既，係我覺得好普通既一張相，只係好如實咁「現場佈導」，亦想突出藍天藍水，無特別。左頁中：普通。左頁下：城牆後既景物佈局凌亂，城牆上既圖案亦無特色，可以收埋。右頁上：天空佔去太多，神山山峰太細，裁過佢啦。右頁左：本來個idea幾有趣，但係個人連個頭都唔見左，個佛佔太小位置，未算好理想。右頁右：咩都無，算啦﹗

左頁上：有速度，有氣氛，好。左頁中：優勢係航拍，三個氣球令相片變得有趣味，唔錯。左頁下：呢張係路人甲影既，有放射性線條，有主體點綴，幾好。右頁上：能夠拍出張家界既特色，構圖亦好好。右頁左：本來由個窿度影出去係令相片變得有趣既方法之一，但窿外面既景物無特色，就點影都無特色啦。右頁右：亂，無主題。想表達咩呀？

左頁上：左右黑位太多，作者既然都裁相咯，裁埋佢啦，不過，景色唔係特別靚，成個歐洲都係咁架啦，睇完唔知係邊度係呢張相失敗之處。左頁中：成個建築物有一半背左光，雖然前景有少少花花襯番，但都係普通料。左頁下：你睇到咩呀？右頁上：主體放到正中，仲俾側邊個建築物投下陰影位，你話得唔得吖？﹗右頁中：小B都影到啦。右頁下：佢個名叫「掌握之下」，主題唔夠明顯，唔睇個名直頭想叫大會收番起佢。

上：我個人覺得唔錯。中及下：side氣。

上：幾好呀，有構圖有氣氛。中：又係平分天地，仲係直倒，同之前講既批評一樣啦。下：構圖亂，紅果樹同地上既樹仔交疊左，唔知主題係咩，想表達d咩。

以上相片都係影呢本書仔架咋。現場有得派。

估唔到ITA既宣傳做得唔錯，好多媒體都有佈導，所以有好多人去睇。