減肥

我，好幸運，一直都無需要減肥，但係，有時懶左，都會發現個肚有小小凸，對大脾有dd粗左。

由九月開始，一直都好似好多野做，我做野又鍾意一氣呵成，所以有時就算餓住個肚都要做埋d野先。結果，到食野時就無咩胃口食，好多時求其立立雜雜咁食d野又當一餐。個幾月喇，到今日，我發現，就算做少左運動，都瘦左好多。

有d女人，減肥係佢地一生既事業，但係佢地從來無想過要平衡d（即係樣樣食少d）咁食野，當然亦唔願意去做運動做到有攰既感覺啦。其實，佢地有無見過窮人肥架？﹗有無見過d勞動人民肥架？﹗無見過又無途徑見？唔緊要。我作個比喻啦：

就當d肥脂係你d錢啦，你個身體係個銀包啦，你唔去搵錢，邊有錢放落銀包呢？（你唔食又點會有肥脂呀？﹗）你d錢放響銀包，唔用唔買野又點會無晒呢？（你唔做運動，無啦啦d肥脂又點會無晒唧？﹗）

但係，呢d減肥女人就總係唔明呢個道理，只係識得駛錢去做呢樣機個樣機，食呢樣丸個樣丸，然後又話人地d野無用。

其實，用最自然既方法就係最好既，大自然係最均衡既，根本唔駛食藥做機，除非真係因為有病而肥啦（真係會架，咁就要睇醫生喇﹗）。

＊＊講明先，如果你係女人，如果你係食藥做緊機減肥，我唔係話緊你呀吓﹗