全港最好游既泳池

一直都搵緊一個無咩人游、池水清潔、方便就腳、收費便宜、唔會見到學生、更加唔會俾學生見到然後大叫miss既泳池，今日我終於搵到喇﹗

為左以上條件，我試過去朋友屋苑游，結果覺得太細或太多人；亦試過揸車去「附近」既camp site，覺得唔錯，好多時都無咩人游，但係得25米，有時會有d青少年響度玩捉；去過一次區內公共泳池，但係好後悔，仲俾阿婆鬧：駛唔駛蛙到咁大呀？

今晚開完個基本上唔多需要開既會之後，就急急腳走去游喇，因為我同路人甲發現左個勁好既新大陸。

呢個池有免費泊車，size係標準池，入場費十蚊，我地已經去過兩次（不過唔係游水），都見個池既泳客長期處於少過十個人既狀態，今晚都係，池水非常清潔，撞到學生既機會接近零，游完仲可以響上面間餐廳食個三十蚊有找但味道絕對唔差既晚飯。

所以，我今晚游左一千米，響好多人眼中真係小兒科，廿個塘之嘛，但我就已經係好少有咁有mood又有咁好既場地俾我游到咁多架喇。

呢個池可以講係全港最好既泳池呀﹗（只係對於我咋吓）