去到新彊旅行，最遺憾的是沒有帶他的CD同行，想唱又記不得那麼多歌詞，坐在師傅的車內，很想很想唱一首完整的。
在巴音布魯克的草原上，一邊騎在馬背上，一邊大聲唱著amani，一個字：爽﹗
多謝給我們一個搖滾得有理想的少年時代﹗
2009年6月29日 星期一
再遊海水公園
前年同班1B去過一次海水公園之後，就無再去喇，其實海水公園一直都係賣飛佛，去極都唔會悶，不過，今次就無上次咁開心，因為我同今年班學生感情一般，於是佢地自己去玩，我就去睇我既目標：水母、熊貓。
一去到水母館，立即影相啦，d水母真係好靚呀﹗
新既熊貓館我唔係咁鍾意，都係舊果個好d。
除左大熊貓之外，仲有新成員，小熊貓，我覺得佢地似皖熊多d。
當然亦都有我最喜愛的海洋館啦﹗
呢個缸同真正既海底世界真係一模一樣呀﹗
仲有海星，如果可以俾d細路攞上手接觸下就更好喇﹗
草海龍，比海馬更有趣，響海底應該好難見到佢地，因為佢地保護功夫做得好好，真係好似一條水草呀﹗
獅子魚，太耐無見，連個名都唔記得左添﹗
鸚鵡螺，呢隻好大呀，平時響海度見到個d都係好細架咋﹗
花園鰻，好多花紋，一隻隻伸晒個頭出黎，超cute﹗
兩條唔同品種既鯊魚都咁friend？
除此之外，我當然一定有去睇海豹同海獅啦﹗不過d水好濁，影唔到佢地似魚雷既身軀。影個靚靚入口算啦﹗
響海洋劇場外面，我發現一幅好靚既馬賽克呀﹗
同事既厠所位，於是我就搵d花黎打發下時間啦﹗
仲有我細細個就好鍾意坐既纜車。
誤打誤撞，去到呢個叫海豚學堂既地方，近距離見下d可愛既海豚。
不過呢次無3D電影睇，維修緊，七月一號至開番；又無睇海洋劇場，佢3:30至有場，後來加開2:00場我又聽唔到；山下又做緊好多工程，無地方行；天氣又熱，企響度唔郁都出汗。
本來星期五學生又去迪迪尼，我有諗過向輔頭報名帶學生去架，咁，去齊兩個主題公園，集齊一套吖嘛，我都想做下集郵老師架嘛﹗不過，都係太熱，唔好喇﹗
2009年6月27日 星期六
香港巴基斯坦
舊年去完巴基斯坦就去左葵涌屏富徑食地道巴國野，估唔到今晚又攞住個電視遙控search緊有咩睇時，亞記有個「街頭風景」，於是睇下啦，原來係講住響葵涌屏富徑既巴基斯坦人。有時咩都要講緣份架，連睇電視都係﹗
其中內容講到「歧視」，好奇怪既係巴藉朋友都唔覺香港人歧視佢地，連工資特別低、知道佢地係巴國人就唔請，佢地都唔覺得香港人歧視佢地，我都話巴國朋友心理質素好好架啦，反而訪問香港人，我地就話有歧視情況。有位阿姐（仍響個間餐廳幫手既，我上次去食野時，仲以為佢係老闆娘添）講得好啱呀：香港人時時都歧視架啦，連自己香港人都歧視香港人，高學歷既歧視低學歷既﹗唉﹗人幾時先會平等呢﹗
呢條街好短好細，但係就聚居左一大班巴基斯坦人，成個小巴國一樣。節目裡面訪問左我地去食巴國野既穆斯林餐廳既老闆同伙計，又訪問左我地當日幫襯過既巴國雜貨店老闆（我仲認得佢地架）。
2009年6月26日 星期五
2009年6月23日 星期二
停課不停工，唔知做mug東
終於停課，比我估計早左，但係......真係淨係停課咋，即係學生唔洗返，老師繼續返工，返到七月十三號。
返黎做咩？我都唔知，仲要一點俾你出去食飯食到兩點半，四點至准放工。
我對於一d make sense既野好支持架，但係對於一d唔make sense既野又無得反抗，我心裡面一定係咁串字(例如：till, diu......註：老師都係人，呢d野個心諗下都得掛﹗)。
其實，如果有野未做晒既話，我相信老師一定會自動自覺返黎完成埋佢至放暑假，因為我相信我既同事都係專業既，有職業操守既，可惜.....只係有人無咁樣諗過我地，真遺憾﹗
每日返工唔知做mug東，我相信連九月要做既野，放暑假前就已經可以做晒喇﹗....呀﹗唔得，人地係都要八月至話你知教咩班教咩科，老師又可以響空檔時為未來既學年預備d咩呢？﹗可能係一個桔﹗﹗﹗﹗
2009年6月22日 星期一
呢d廣東話......
如果響香港既遊客區或到大陸旅行，你可能會遇到以下情況，為免失禮內地同胞，我地預習下先：
正宗潮洲菜 …
客人：'伙計, 有咩好介紹呀?!'
伙計：〝食老鼠拼盤啦，有老鼠蛋、老鼠腸、老鼠豬耳，但冇老鼠鵝〞.............(滷水拼盤)
桑拿入面 …
骨妹:[Sen 山,你蝕唔蝕飯？] ................(先生你食唔食飯)
男客人:[??.......]
骨妹:[sen山, 射個精嗎?] ..............( 先生, 寫個 drink嗎 ?)
男客人:[err.......]( 面都紅晒)
骨妹:[ sen山, 要唔要做雀仔按摩呀？按完仲可以除…].................( 腳低按摩 …… 鎚 ……)
深圳麥當勞 …
港客：〝唔該一個豬柳漢堡。'
店員：〝要蛋呀。〞
港客：〝唔要蛋喇唔該！〞
店員好勞氣：〝你要蛋呀！〞
港客開始勞氣：〝我唔要蛋喇，我淨係要豬柳漢堡咋！〞
店員更勞氣：〝要蛋一蛋呀，要蛋十分鐘呀 …… 〞
入境處 …
遊客：'要睇新款證定畜牲證呀?' ...............( 身份證定出生證 ?)
巴士站…
遊客：〝Sen山唔該，請問你有冇生痔瘡呀？.............(有冇散紙唱)
街道上 …
遊客: [請問侏儒村係邊?] .............(G2000)
數碼通 …
遊客: [ 呢個管睇到雷電嗎?]
售貨員: [唔怕, 好安全的…]
遊客: [ 無雷電顯示功能嗎?!]......................... (來電顯示 )
售貨員:[ 手機唔駛用避雷針的~]
遊客:[ 咁我部手機可唔可以出煙先? ]..................... (trade in）
豐澤電器 …
A遊客：〝請問呢部電視機有冇電視框呀？〞.................(Discount)
售貨員：〝當然有啦。〞
A 遊客：〝咁電視框幾多錢呀？'
售貨員：' 唔好意思要成架買，冇得要個電視框!'
B遊客：'請問忍忍支係ben？另外呢度有冇死守間？〞
...................﹝影印機、洗手間﹞
髮型屋 …
髮型師：[ 小姐想點剪呀?]
小姐：[師父，同我剪得神似D !]
髮型師：[己經好神似嫁喇]
小姐：[唔係神似，係要有神似! !] ...................(要有層次 )
髮型師：[小姐想做D咩顏色呀?]
小姐：[我想做森林色!] ...............(深藍色 )
髮型師：[森林?? ]
小姐：[係呀~]
----------------------------------------------------------------------------------------------------------------------------------
其實係個同事send俾我既email黎既，一邊睇一邊笑到標眼淚
，為我苦悶既paper work平添萬分歡笑﹗
2009年6月21日 星期日
亞視間中的驚喜
早排睇「馬騮同學會」，謝雪心俾三姑問：「你響亞記無人睇架喎﹗有癮咩？」另一集，三姑訪問張家輝，呢位出爐影帝話：「響亞視死命咁做，但係無人睇，連阿媽睇睇下都轉埋台，唔知做黎做咩﹗」聽到都覺無奈。有時，工作除左為出糧之外，俾人肯定都係好重要既﹗
今晚，得閒無事睇電視，雖然有好多個台，但係拎住個搖控，都以為自己打緊機，禁黎禁去都係無個節目「可觀」，結果停左響亞記，睇左半集「香港亂up」。
雖然佢係老番香港電台「頭條新聞」，但係一班亞記藝員好落力咁去扮d名人，一d都唔馬虎，最得既係盧海鵬扮孫公，無咩特別化妝道具，但都扮得好神似，果然係高手。內容呢，都係講一d時事啦，但係一d都唔悶，仲場場會心微笑，整體黎講：好睇﹗如果無左d無聊既background effect，就一定更好。
亞記，間唔中都有好多新鮮又有創意既驚喜，總好過無記，見亞記個節目反應好就照跟，無d創意﹗
亞記，雖然無財無勢，但d諗橋既同演出既（製作無份呀），都認真去做，值得一讚﹗
2009年6月15日 星期一
2009年6月10日 星期三
你有權幫我做決定咩？
今日返到學校，見到九成既同事都著左黑色衫，細問之下原來係有人發起要挽留某同事，要求其他同事著黑色衫。
著黑色衫？背後理念我唔明白，亦唔好深究，我淨係知無任何人(發起人/負責通知同事既人)通知過我(我相信我d好朋友同事係以為有人通知左我而無話我知)。
我今日一返到教員室，同事即係叫我你求奇搵件黑色衫著啦﹗我當時既答案係：「我唔會理佢架。」點解？既然無人通知我，即係唔需要我咁做啦，人地唔要我玩呢個遊戲，我點解要做幫凶呀？而且，我尊重呢位辭職既同事既決定，點解宜家要好似要脅佢咁唧﹗
後來，知道原來有人認為我唔會著黑色衫，所以唔通知我。我唔知點解佢可以幫我做決定，如果係認為上次我同辭職同事既誤會既話，我可以話佢知，一件事還一件事，佢地真係咁諗我就實在太幼稚喇﹗
今日九成既同事都著左黑色衫，咁我無著，d唔知情既同事唔知會唔會以為我又試唔合作呢？唔知會唔會以為我好唔妥個位辭職既同事呢？雖然我一直都唔認為人言可畏，雖然就算有人通知我，我都未必會著黑色衫，但係，如果有人通知我既話，起碼係我選擇俾人覺得我唔合作，係我選擇俾人以為我好想辭職既同事離開，係我選擇俾人覺得我唔妥個位辭職同事.........，但宜家係我監生俾人屈左﹗
當大部分人都知發生咩事既時候，我唔覺得俾人isolate就假既﹗你話呢d咁既環境仲點可以好開心咁留低呀？﹗
我等，等到應該走既時候，我會頭也不回﹗
2009年6月8日 星期一
一天歐遊其實係.....
星期日路人甲難得有假期，佢提議去深圳或者澳門行下，但係我覺得香港有d好有feel既行都未行，我就反建議去中上環。
其實唔知點解，我好鍾意去中上環，好多時放假都會去下，今次我同路人甲都話要行d以前未行過既街。
星期日我地一早六點幾起身，為左延續旅行feel，我地搭車(唔揸車)出去中環。第一站：最近上演如同糖心風暴一樣既舊式茶樓--蓮香樓。行去蓮香樓期間，經過陸羽，剛剛肥佬黎行出黎上自己架車，佢好高大但係有d老態龍鐘咁﹗
好鍾意呢隻茶杯，好好玩﹗呢度可以搭枱，呢日我地呢張枱一共有四個parties。
阿姐一出，即俾人圍，人潮散去至見到佢。
話左係舊式茶居，當然正正中間要有條樓梯啦，門口梗有檔報紙檔架﹗
飲完茶，仲係九點幾，於是開始中上環遊遊蕩蕩之旅。
基本上，我地係行孫中山古蹟文物徑，但係間唔中又捐入去d橫街度，呢日真係去左好多未落過腳既地方，例如：醫學博物館、樓梯街(以前返學時，日日經過都無落過車去行下)、政府總部(經過)、美國領事館(經過)、禮賓府(小門個邊未去過)、終審法院.......
行左一陣就見到呢隻fly，佢係homeless外面既裝飾，同上一頁見到既氣喉裝飾係同一間叫homeless既概念店既。
我係一個超鍾意影pattern既傻人，所以星期二睇鬼佬台既home「世界很美有賴你」真係睇得好鬼開心，可惜個晚好眼瞓。其實仲影左好多架，放唔到咁多啦﹗
呢d橫街査實好有趣﹗
原本無諗住行咩咩徑，點知行下行下都係行緊呢條「孫中山史蹟徑」。
呢條叫咩街呢？用通勝既方法拼音就會知道喇﹗答案係：Bridges street. 呢個街市超經典，應該係七十年代既街市，同灣仔街市應該同期既。響裡面影左好多黑白相呀﹗街市後面仲有個無咩設施既室內兒童遊樂場，我都係第一次黎d咁奇怪既遊樂場，如果我係細路，我阿媽帶我黎玩，應該係我曳喇﹗
街市旁邊有一條舊樓街，睇d告示都應該好快拆喇﹗係去趁早喇﹗
都行左摩囉街，雖然行過好多次，但係仲係好多野影。行摩囉街就梗入去文武廟行一轉，一入去見到呢個妹妹一路企響度猛咁細細聲叫：「daddy、媽咪.......」，周圍d人又好似睇佢唔到咁，我第一個反應係：「唔通係鬼﹗」不過唔理係人定鬼啦，一於影左先，後尾佢阿爸黎接番佢走，我睇住佢行出去廟外面，鬼咁猛太陽，應該係人lu啩﹗
跟住就去左醫學博物館，十蚊入場，睇野之餘亦可以任影，室內好有舊屋風味，而且無咩遊客，一個字：正﹗
不得不提個lunch，呢間響Stanley街既monster burger，好食過好多好貴既burger shop，一個餐四十幾蚊，轉埋做沙冰都係六十蚊左右，牛肉嫩，juicy，香，菜新鮮，唯一唔好就係d位唔夠舒服。由於路人甲係burger狂，所以我都食過唔少burger店既burger架﹗
食完行左去堅道，天主教教會座堂，經動植物公園一路行番落中環，再去H&M戰鬥，七點至搭車走，一個中上環我地都可以好新奇咁玩左十一個鐘，真神奇，唔怪得人地去旅行玩三日都話悶既新加坡，我地玩左四日都話唔夠喉啦﹗
訂閱：
文章 (Atom)