新環保產品

點解呢件野係環保產品？

話就我二家姐買左條三百幾蚊既褲俾我老豆，但係長左少少，於是我就幫佢改短佢啦，剪左個兩塊每塊得個吋零既褲腳出黎之後，覺得d布料確實係幾靚（減左價都三百幾蚊就梗係靚野啦），結果我唔捨得掉左佢，諗起我老豆成日用電腦，咁就車多兩行線，整左個wrist cushion俾佢囉﹗仲繡埋佢個英文名，阿David，（佢好潮架，有blog，有email address，有玩msn，有埋skype，識download歌同網上遊戲，咪以為佢好後生呀，７４歲喇﹗）諗住一套兩件實好開心啦，點知佢話：「呢d野我一早用過啦，唔係幾好用﹗」唉﹗咁珍藏把啦老豆，無咩人有我d手作仔架﹗

大帽山

每年年初三都會同路人甲Ｄ舊同學去飲茶然後行山，今次行大帽山，真係非常大霧﹗

前面呢個係月光？唔係啦，係大帽山個大golf呀﹗

有霧海睇添呀﹗

好彩日落時份仲睇到少少彩霞。

食得太豪

由上個星期二開始，幾乎日日食好野，一個星期就已經食左四餐都有龍蝦、翅同斑。成個禮拜係咁食，除左會肥之外，仲有d過意唔去，因為呢個世界真係仲有好多人食得唔飽架﹗

呢種食法，真係幾奢侈呀﹗（但係，仲有幾餐等住我，唔去又唔得，要同自己say個sorry呀﹗）

有一餐響尖沙咀食，食完去攞車，響露天停車場見個景咁靚，又有隻遊輪泊岸，於是影低佢先﹗

有好野食，有靚景，有車揸，雖然只係普通市民一個，但係我真係覺得做香港人，真係比好多人幸福。

「知足常樂」，希望多d香港人明白啦﹗

好似今晚同枱一個唔係好熟既親戚（唔熟又一齊食飯？有所不知，我家係大家族，年初一坐埋食飯既人有七八十人，有位坐已經好有地位架喇﹗）用一個好藐視既眼神bear住隻雞，話：「冰鮮架？﹗」佢個女問佢要唔要件雞，佢又bear住隻雞，好決絕咁話：「唔要。」

冰鮮都係雞啫，香港既新鮮雞同冰鮮雞都係無雞味架啦，洗唔洗食得咁巴閉呀﹗

上次佢已經響食排翅時一路食一路話間酒樓俾d垃圾佢食，食到個樣藐咀藐舌咁。我當時真係好想話佢聽，呢個世界有好多人根本無見過排翅，根本唔知呢d咁豪既食物係咩黎架。

有得食時，積下口德啦，師奶﹗

Everybody, Happy Chinese New Year!

白泥日落

有日放weekday，走左去元朗田中食日本野，仍然係好好味﹗

下晝黎食，無咁多人，d lunch set仲好抵食添﹗

食完行左一輪，開車去白泥，但係因為時間預得唔係咁好，只係睇左一陣咋﹗

日落連環慢拍：

呢日潮漲，無「白泥」﹗

同場加映：月光光。

兩處好介紹

早排分別同路人甲同埋同事去左兩個幾舒服既地方食飯：

一）佐敦YMCA(消防局對面個間）

你睇，好似酒店咁，仲有中午既陽光添﹗

野食唔差架，一個three course meal都係八十幾蚊咋。

二）大埔吐露港科學園

其實呢度係普通canteen黎，只不過佢有個露天area，可以坐得好舒服咁食，野食都OK啦﹗星期六日仲有得barbecue添﹗

塱原

前幾日去左塱原，個位貌似鄧達X既導賞員都無做好功課就黎做導賞，問佢咩都靠估，差Ｄ想講埋佢個份。

唔知點解周地放既大古炮。

呢頭Ｄ建築物大都係五幾六幾年架喇﹗

五姓祠。導賞員哥哥連香港五大姓氏提都唔提下，可能佢覺得我地知啦，你又知唔知呢？

已荒廢左既學校。

呢個係姓彭既祠，都係唔知點解。

客家村既祠堂。

江夏又點解係姓黃呢？導賞員哥哥又係講到唔湯唔水咁。

呢個樹頭勁呀，幾鬼大呀﹗

Brownie生日蛋糕

上次整完個brownie放左d相上黎，家姐就話生日要個咁既蛋糕，結果，前日焗左一個俾佢，意料之外，成班百彈斎主，今次竟然話好食，連阿姐夫都唔出聲，無又呢樣又個樣咁彈我d蛋糕。

今次呢個好重又好大個，八吋架﹗

聖誕薑餅人

聖誕節前，雀斑媽媽想我整Ｄ薑餅人俾佢個女，結果極左呢幾個，人唔人，餅唔餅既野：

北京之旅·注意事項

(1)旅遊書

去北京之前，做左個指定動作，就係去圖書館借旅遊書(通常都係路人甲做既)。我地好少買旅遊書，因為去完一次唔會再去，就算去都係好耐之後既事，到時本書又唔update喇﹗

今次發現有個出版社出d旅遊書唔錯，易用、清楚、有用，佢就係「正文社出版」。上次去日本都係用佢，估唔到佢本本都有唔錯既水準。

(2)寒衣

之前去過幾次凍既地方，發現最凍往往係對腳，咁出發前就去尋找溫暖的厚褲啦，結果搵到bossini有條厚綿褲，$199，打多對絲襪做底，就算響北京零下五六度都非常ok，抵買﹗

(3)IC卡

呢張係北京既八達通，買左就唔洗次次搭地鐵買票，而且搭公車係有折既，一蚊車費變四毫，最抵係來回密雲個兩程，原價十四五蚊既車費，只收左五個幾。而且，北京地方好大，行過隔離條街都分分鐘要十幾分鐘，四毫子搭一兩個站，慳番d腳骨力行景點。響返工放工時段，每個站都有d嬸嬸維持秩序，唔識路可以隨便問，佢會教你最好既路線去到目的地。

有利就梗有弊啦，要退番張卡，攞番二十蚊按金，就只有復興門站同地面既公交站(可能有排搵，地鐵站穩陣d)，我都見過有人響地鐵站話幫人退卡，可能有著數架，起碼慳番d時間啦﹗

(4)出租車

搭左兩三次，發現d司機似乎唔識路，要我地俾埋張地圖佢睇，甚至我地攞住張地圖一路教佢點行，佢地就算已經去到目的地，都未必知你想搵既地方，最好袋定張卡片，等佢真係唔知點行時，佢自己打電話去你要去既旅館或者商店度問。

(5)衛生間

北京周圍都有衛生間，唔洗俾錢既衛生環境好過要俾錢既，除非好急，否則俾錢仲唔著數﹗

(6)包車

包車去景點，如果係來回車，記住問佢停車場費係咪另收。我地由密雲包車去司馬台長城時就係一時大意唔記得問，結果同個司機嘈起上黎(個時我先發現自己既普通話極流利，因為要鬧爆佢嘛﹗)。