後生仔一日七單

1. 早幾日我通知H，逢Day 6同佢調看飯。早兩日我怕佢以為連朝早點名都調埋，於是專登提佢：淨係同佢調lunch，其他不變。講左就以為佢記得啦。今日，Day 6，一早返到去想攞點名簿，唔見左，我知一定係佢又「以為」係佢點名啦﹗去到操場時，我問佢：「你今日想點名呀？」佢仲話緊：「今日同你調嘛﹗」結果，我用眼神話佢知佢又做錯事喇。學生幾日都俾副校捉頭髮長，佢竟然唔知，到我話佢知，叫佢打電話俾家長時，佢先瞓醒，仲醒到識得響副校面前去「關心」個學生添。證明佢真係瞓醒左喇﹗

2.我整好既新座位表，俾左佢睇，佢又唔記得拎上課室同學生調位(問佢點解唔拎，佢好似d學生咁答法：「我諗住分兩次拎呀嘛，等陣經過教員室先入去拎囉)；之前同佢講左要學生做周記，佢又係唔記得。結果又係我跟手尾(拎座位表上課室，叫學生提佢響佢堂/lunch調位；寫埋黑板叫學生做周記，兼提佢派周記簿)。

3. 我早幾日收到班相同訂購表，俾左H睇，一去無回頭。今日經過佢個位，心血來潮，諗住搵出黎俾學生訂啦，點知響佢檯面果堆「垃圾」我搵到：

A.十世之前佢應該俾我既回條(呢D小事啦)；

B.上個月我搵極都搵唔到既班會單，我仲以為自己唔見左添，搵餐死；

C.課外活動組俾佢，有關我班學生參加什麼活動既資料。(後來，佢好巴閉咁同我講話張紙上面打錯左既班長資料已經同同事講左<有鬼用咩，班長資料係訓導組負責架>。之但係人地print張野俾你，貪玩咩，梗係要你同d學生對下d資料啱唔啱，以便印成績表啦。)於是，我又要「吩咐」佢去同學生對下。阿仔，你幾時先至帶個腦返工呀？﹗

D.我本來想搵既野。

當然，佢只係張A-D堆放響檯上亂如廢墟既雜物裡面，講真，今日愈搵愈多野搵到既時候，真係有D執到寶既心情架，陰公﹗

4. 我上堂時，我班D學生向我投訴上H堂時，有同學蝦佢，我問佢點解唔同H講，學生話講左，但係阿sir唔理。結果，我響我堂幫佢執手尾。

5. 今日已經係下學期既第一日，但係另一個DT sir話我知H話今日跟上學期分班。哈，我唔知，學生又唔知。H唔通知學生(大佬，班主任講多句照顧下D學生都得啩)。結果？我預備左上堂既野，就最好跟下學期既分班方法啦，否則，打天才波呀？我又通知左學生今日係上我堂。可憐呢位DT sir就慘d，佢以為H身為科主任會同我聯絡，所以學生仲有習作未完成呀，DT sir要放學上多兩堂同d學生做功課囉﹗

6. 健康早餐日今日lunch要交表，負責人放學時見到我，話仲未收到我班張表，我咪搵H囉，佢居然放張表響檯都唔死去交俾人，要人追我。我今朝俾張表佢時，知道佢唔識睇表上面既中文指引架喇(佢根本唔會睇)，專登提佢一定要lunch或之前交。結果又係咁。

7. H都知自己衰，放學後黎同我猛背金句：「唔好意思呀...唔好意思呀....」

我：「你次次同我講呢句都無用架，點樣改善先得架？」

H：「我真係已經好盡力去記住要做既野架喇，但係我一時間真係處理唔到咁多野呀﹗」

我：「咁，“智障賽”係咪阿mr.A搵你做內閣架？」

H：「係呀﹗」

我：「你明知自己忙，又處理唔到咁多野，仲應承佢？」

H：「我係唔會托人手踭架﹗」

我：「(DIU)咁你宜家同托我手踭有咩分別呀，你咩都唔記得，咩都係我跟手尾﹗」(火都黎埋)

H無言。DO...................Certify.(我呀)

後生仔激到我手震

就算仲有好多野未做完都好啦，我都要發洩一下，因為我俾H激到夾住麵既手震到麵都跌埋﹗

今朝一早，學生排隊時你問佢佢問你咁話今日個講座呢樣個果樣，咁我就問下佢地咩事啦。原來佢地唔知今日係唔係有個講座，又唔知幾點開始幾點完。我根本唔知咩講座，問H，佢話：「有講座咩？唔知喎﹗」

我今日本來唔係監我班考試，但我之前見佢地答卷好馬虎，所以呢兩日都同同事調左。咁上到班房就好好彩咁有個學生有講座張資料，我先可以提佢地幾點要響邊度聽講座，但其他資料我就真係咩都唔知喇﹗(但就好now搞)

考完問番個負責同事，原來張通告係佢地自己發俾學生既，而個位同事亦一早同H講晒詳細既資料(但係佢一直無同我講，令我咩都唔知，成朝就響度搵人同問人)，仲俾左一疊單張佢。

結果響講座前十五分鐘，我見到H喇，於是問佢：

我：「你等陣有咩做呀？」

H：「十點半上1B班房囉。」

我：「你知唔知上去做咩呀？」

H：「......」

我：「咁你上去做咩呀？」

H：「唔知係咪學務果D野呢？......好似係看住D學生.....呀...好似係監堂..唔...幫下手囉...我諗...」

我：「知唔知有無野要拎上去呀？」

H：「呢疊野囉。」

我：「知唔知疊野係咩黎架？」

H：「D單張呀，小冊子呀。」

我：「咩內容呀？」

H：「.......好似係急救咁囉。」

我：「等陣咪係急救講座囉。」

H：「係咩？我真係唔知喎。」

我：「負責既同事已經同你講過兩三次喇。咁你根本唔知上去做咩，你上去會做D咩呢？又唔通知學生，如果唔係我調左監堂，D學生走晒啦﹗」

H：「唔好意思呀。」(金句又出喇)

**後話：

H根本唔會理D學生問咩講座，佢監完堂問都無問過我有關呢件事，就好似學生無問過佢一樣。仲有，D學生考咩佢都唔知架，第二節學生考英文口試，佢就稔住上去監堂呀，看學生呀，但係做咩要佢上去幫手看著D學生呢，佢又唔知喎，咁即是人到，個心同個腦未必到，都唔知響課室同D學生做咩，咁佢上去會有咩好做呀？﹗結果，講座完左之後，我問番D學生，佢地話，個個都響度嘈，根本無人聽。究竟H係咪廢架？(無疑，呢個答案係好肯定既)

本來我想上去睇住D學生，但係H本來就無同我講架啦，即係唔洗我幫手啦，咁我咪響開始既時候上一上去睇下D學生有無到齊，就無眼睇H喇﹗

唉﹗我究竟幾時會有驚恐症或者抑鬱症或者焦慮症呢？我要問後生仔賠番幾多俾我呢？究竟我死先定佢死先呢？聽日先至係下學期既第一日，點捱呢？

可以用麻包袋解決呢個煩惱嗎？我發現我開始有狂躁症既徵狀喇﹗

 

 

 

後生仔的準則

H的準則實在令我費解。前幾日，我寫好晒D操行分，然後俾H過目。H俾番我嘅意見係C同學係一個好乖嘅學生，應該唔只B+，佢想俾A-。OK，H教我班主科，佢見學生嘅時間多我好多(但佢理學生嘅時間少我好多)，信佢啦，我改。

過左一日，中一班主任全部一齊開中一分享會，有老師話我班D學生差左好多，其中C同學仲成日瞓。H竟然好開心咁答：「係呀，係呀，我都見到呀。」YIU，咁又話個學生乖到攞A-，宜家又咁講，見到又唔問下個學生咩事會瞓，於是我同H講：「既然你見到，不如你跟吓啦。」佢「餓」完一聱就算。過左一陣，我見佢仲唔寫低響自己本「年青痴呆工作提示事件簿」裡面(H唔寫低，即是話佢唔會記得，即是話佢唔會做野)，於是我再講多次：「C同學你係需要同佢傾吓架，你寫低未呀？」H才急急寫低，似足我地D學生。

**註：平時又唔理D學生，開會時就識得用萬分之一秒搶住話俾D同事知我班學生D近況，真係好想「中」佢呀

後生仔奇人奇事

話說H教的科目每學期都要有四次全級性的小測，但身為中一級負責人的H，竟然讓自己做出以下這樣的一件事。

H負責其中一次小測，但他用「太忙，趕不及出卷」的理由，把該次小測延期。在考試前三天，有同事入分時猛然發現只有三次小測分數，調查過後，知道原來是H沒有準備該次小測。於是，初中負責人在放學時生怕H會跑了去，一早已在木工室外等候H。H面對初中負責人的質問，只回答「自己太忙，沒出卷，未考」。初中負責人在半反眼的情況下，命令H必須在考試前讓全級學生完成該次小測。結果，出現了一幕「H發茅出卷事件」。學生終於在考試前一天的午飯時間於班房內完成了該小測。但.....

小測當天一早，我其實知道有小測，但似乎沒有任何人告訴我要用午飯時間或其他資料，於是我扮傻問H

我：「你今日lunch有無野俾佢地做呀？」

H：「佢地今日小測嘛﹗」

我：「下？我唔知嘅？無人話我知喎。」

H：「係呀係呀，今日小測呀。」

我：「學生同其他班主任知唔知呀？」

H：「知晒喇，全部都知，科任老師、所有班主任、全部學生都知。」

我：「我唔知嘅？」

H：「Um.....我諗住我會上去嘛。」

我：「你會上黎都通知我一聲吖，我咩都唔知。」(去死吧，我叫自己)

偷笑

今日出去做gym時，響火車睇有線，見到單新聞話個浸大學生呃病假。鏡頭影住個後生仔步出法庭即刻用9秒9跑左去，而佢側邊就有個托住部攝影機嘅攝影師同佢一齊跑，情況就好似陸運會短跑孚衝線咁。結果我忍唔住，「bu」一聲笑左出黎，好彩唔係好大聲唧。

呢d後生仔就真係把鬼啦(同我日日見住果個差唔多)，有學唔返，仲偽造醫生紙，跑得咁快，身體咁好，阿茂都懷疑你啦﹗

後生仔新年沒進步(續)

第四日，放學時訓導主任話我班有學生第七堂作弊，有D學生上堂時周圍走，全部宜家留緊堂。咁我就走去問清楚個老師咩事啦(問完仲勞氣，有時間再寫)，再話俾就坐響隔離打緊電腦既H知啦，然後諗住同佢一齊去「找學生誨氣」啦，點知搵到D學生出黎時，佢又唔見左，原來繼續響一牆之隔既教員室電腦位度聽住我鬧人，哈﹗我唯有入去同佢講話我想留佢地堂留耐D，俾D野佢地做，等佢地唔好以為無事，我有事要趕住走(其實我無事架，不過見H對件事似乎打算唔理，所以我至同佢講話我趕住走囉)，點知......

H：「其實我趕住出卷，我只可以間唔中出去睇下佢地，我諗留到五點啦。」

我：「(心諗：後日都考試啦，仲出咩卷呀.....<呢單奇妙的出卷事件--待續>；留堂班都留到四點九啦，留多三個字？)都留啦，不如留耐D啦，我諗六點好嘛？」

H：「會唔會太晏呀？學生最遲要五點離開學校喎。」

我：「(心諗：小，你又成日留學生到六七點響個DT室度「做野」﹗)咁宜家罰佢地嘛﹗」

H：「咁五點半啦﹗」

我：「OK,你可唔可以俾到野佢地做呀﹗」

H：「其實我宜家好忙，.......呀......咁.......」

我：「我俾啦。」

結果，我唔放心交低D學生俾H，我無走，陪班學生響走廊度成粒鐘，佢真係間唔中出一出黎兩秒。哈﹗到結案陳詞時，佢就出黎喇﹗結果五點九先放D學生走。

至於後生仔點解要出卷？下回分解。

後生仔新年沒進步

以為新一年後生仔會有進步啦，確實，第一日返工，佢竟然仲記得約左學生家長，等我仲高興左一陣。點知......

第二日，交旅行費用的死線到了，佢又要我催佢，佢至肯俾返d回條我同埋去交錢。

佢仲話：「我尋晚出時間表出到八點呀﹗」我聽完第一個反應係：「痴筋，剛剛放完假都話d野趕成咁，咪即是話自己放假唔做好d野囉(梗係啦，scout大露營佢實有去啦)，既然知道自己搞唔切呀，放假咁多時間，點解唔做好至返工呢？﹗仲有，做到八點好出奇咩，係你好少做到過左放工時間姐。」

放假前收聖誕聯歡會d錢時，我提左佢話班會費已經無晒喇，叫佢一次過收埋，費事搵野黎做，佢又話費事收多學生十蚊，好似一次過收好多錢咁，好啦，咁下次收班會費唔好煩我就得啦，哈，佢大大聲話到時佢收，今日佢竟然忘記左(忘記係佢既特色)，叫我去收喎。我話知你記唔記得啦，一句：「班會費你收。」收線轉頭即走，費事理佢。

其實，收班會費都仲有段古呀：

學期初佢收錢收到亂晒，結果我用左兩粒鐘幫佢計，多左二百幾蚊。但最近英文老師話我班的英文補習班尚欠三百蚊未交。即是係，可能係，後生仔學期初找多左錢俾學生，或者，收少左學生錢，咁點呢？後生仔有日黎話我知呢件事(其實英文老師一早已話我知，我又睇下後生仔點做姐)：

H：「.......咁我諗住收班會費啦。」

我：「好，都無晒啦，要收喇。咁上次你收多左個$237蚊，我已經買左D禮物俾學生，無晒架喇。」

H：「$237?唔係$28X咩?」

我：「我有mark架，你自己睇啦﹗」

H：「咁班會費都係貼十幾蚊姐。」

我：「咩呀？你收少錢就梗係你貼啦，有咩理由要學生貼呀，個D係學生錢黎架。」

H：「......」用手指住自己果個O字型既咀，仲加對龍眼都無咁圓咁大既眼。

我：「梗係啦(心個句：係咪人黎架)」