唉，唔知講咩好

真係唔知講咩好。有人為左自己一啖氣，令到周圍嘅人做佢嘅陪葬品，今日知道有人怕某d位高權重嘅人對自己不利，於是又向一d好聽佢話嘅另一位高權重嘅人提意睇堂要錄影。幸好係optional嘅，否則我一定媽佢--累街坊。呢條友重大大聲話自己預左賣樓，大佬呀，成單野係佢一手搞出黎，佢賣樓就佢嘅事啦，但係而家係全部人俾佢累到要賣樓呀﹗但係佢仲係理直氣壯話自己好慘，我地呢d陪葬品就慘﹗聽講連d平時very nice嘅同事都不值佢嘅行為，仲話唔知佢有咩咁冤屈，要響個會度喊咁耐。唉，我地俾佢咁搞法，就真係喊得一句句啦。我無端端俾佢搞到做左「知名人士」，佢連唔好意思都無講過呀，真係無禮貌﹗﹗點解d人做野咁自私嘅呢？我本來諗住平平靜靜咁教多幾年先收工架嘛﹗我層樓仲有六年幾至供完呀﹗真係要諗下過兩年要轉行做咩先喇﹗唉﹗真係唔知講咩好喇﹗

後生仔的週記

星期一、二我都去左上堂，今日至返工。一上到課室，負責收功課嘅k同學拎住三本週記俾我：

k：「miss，呢三本係尋日未交嘅。」

我：「其他個d呢？」

k：「交晒俾阿sir喇。」

不久，H上到來課室。

k：「阿SIR，呢三本係尋日未交嘅。」

H：「咁，其他個d呢？」

k：「尋日同前日交晒俾你啦，阿sir。」(我後來響H檯面見到成疊簿放左響度)

H：「交晒俾我？哦﹗(好明顯，H又唔記得收過週記啦) 」

根據H俾我嘅資料，仲有兩本未交，但係根據我數簿嘅數據，係仲有4本未交。由頭睇一次d簿，我已經知道又係個兩個衰人無交。於是我同H講，叫佢唔好信晒d學生，佢地d野唔準架，最好自己數一數d簿啦。結果響唔知幾時嘅某個空間我聽到H鬧K同學：

H：「你已經好多次無清楚數齊D簿呀，收左同學D簿就要數清楚，寫清楚有邊個無交，D簿收到亂晒龍，你要我俾你收，你就要負責d，你再係咁我就唔俾你收架喇，........」

嘩，我一聽即刻想笑，咁似我想ma阿H嘅對白嘅。又令我諗起旅行日佢著住個件衫，完完全全咁表現左H嘅特徵、特性同特點，因為衫上面印住：OUT OF ORDER，佢真係了解自己。

晏d嘅時候，當我改緊簿時，我更發現佢上次改週記時，改漏左一本。唉﹗呢d都小事啦，我有時都會，大約七、八年一次咁啦﹗

另外，我班有個學生成日唔返學，今日H打電話搵個學生又搵唔到，於是H同我講。

H：「我今日又搵唔到C同學喇，唉，佢成日都係咁，呢次又幾日喇，尋日同前日都無返呀。」

我：「唔係，佢前日有返，係尋日同今日無返。」

H：「吓，係咩？」

我：「唔係你點名架咩？我兩日無返工，你無點名咩？」

H：「吓？呀﹗我唔記得左佢星期一有返呀。」

我雖然兩日無返工，但阿H都唔洗咁考我架，好彩我係打醒十二分精神返工嘅人黎唧，否則又俾佢玩一野。三日搵唔到個學生就要做野嘛。唉﹗

家頭作動喇

今日收到一疊某課外活動嘅通告，要我派俾我班一d學生，原本都諗住派架喇，但後來又收到個課外活動負責老師(即家頭)嘅一張list，要我幫佢收埋回條。嘩﹗派都係舉手之勞，收埋回條就好過份啦。於是，我張成疊野放左響佢檯面。放學時，我見到佢，就交代一聲啦：

我：「我見你d通告又要派又要收，我諗你自己一手一腳好d，所以俾番你呀。」

家頭：「你就咁放左響我檯面......」

我：「係呀，我搵左你好多次都搵唔到，咪放響你檯面囉﹗」

家頭：「哦，無所謂啦，派幾張紙都唔肯幫手，唔緊要啦，舉手之勞都唔肯就唔緊要嘅。」

我(頂，我開始冒煙)：「哦，派就無所謂，又要收埋回條就不如你自己一手一腳做喇。」

家頭(佢竟然示意叫我冷靜d，哈.....哈.....，家頭叫我冷靜d呀，有無說服力呀？)：「唔係呀，你唔幫我派我又多一重功夫呀﹗你唔收回條都唔緊要，咪我自己收番囉，不過宜家我就多左野做啦。不過呢，比較好嘅做法係，你唔想幫手可以同我講，你放響我檯面....」

我(小，費事同d癲人糾纏呀)：「其實比較好嘅做法係你自己個課外活動嘅野就應該係你自己做番，學校有40個課外活動，個個都要班主任幫手收回條，我地咪好唔得閒。痴線(呢兩隻字差d講埋架喇)」

後生仔連實習老師都不如

事件一：

響個幾兩個禮拜前，我編好左學生嘅新座位表，然後叫後生仔印個靚版出黎。幾日後，佢同我講話無學生d英文名，想整埋英文名落去。無咪去問英文老師囉，咁你同我講，即係想我問啦，好啦。又幾日後，佢話我知佢未整好，原因係英文老師無俾佢。無俾你你唔識追架咩。好啦，我再搵英文老師啦，結果一日之內，我攞到個有英文名嘅班相，過埋膠，cut好晒，俾番後生仔，叫佢盡快做好個座位表啦。後來，佢又話自己好忙，做唔切，咁我見今日又要講旅行規則，又要講秩序比賽，都無時間調位，放佢一馬啦，我話可以下星期一先調啦。但係我真係唔係好明，整個座位表要幾耐呢？

今日早會後，我上到班房，發現d位仍然係考試d位，費事花時間同佢地放回原位，咪話第三堂上H sir果堂，阿sir會同佢地調位囉。我見咁突然，後生仔實做唔到喇，費事d同事無座位表睇，咪自己響電腦度整好，印好，過埋膠，排好相，貼好，包埋包書膠。「叮」一聲先至用左唔洗半個鐘時間，究竟我要求後生仔響咁多日裡面，抽半個鐘出黎做個座位表，係咪太過份呢？我真係要自我檢討下喇，唉﹗

事件二：

上個月中，輪到後生仔收週記。今日我要派週記，因為下星期一輪到我改。咁，後生仔就放左疊週記響班房啦，我一攞上手就本能地數簿啦。全班34人，得30本。佢第一時間就又呢個果個無返.......，日日都唔返咩，我都費事同佢講。結果我用左一分鐘咁耐呀，先至check到邊四個無交呀。成分鐘喎，唔怪得後生仔查唔到嘅，呀，錯，佢係無發現過疊簿得30本。我mark低係邊四個無交啦，然後要後生仔星期一同我跟進啦(我好擔心呀，我星期一、二要上course，我兩日無理我個班，唔知會俾後生仔搞到咩樣呀)：

我：「我check到呢四個無交，你......跟番啦。」

H：「我個日叫阿XX學生幫我收，我又信左佢，以為齊啦，所以唔知佢地無文呀。」

我：「咁你收左簿唔數架咩，佢收人工定你收呀？細路黎架咋。你日日都有數學堂，好容易就check到邊個無交啦，而家佢地成兩個星期無交功課都無人知呀，以後係咪做唔做功課都得呀？如果我無發現，佢地又過關啦。(diu)」

我好懷疑佢d數學功課有無收齊過。

之所以我話佢連實習老師都不如，係因為今次黎實習嘅G老師實在主動、醒目、肯做、盡責、有帶腦袋返工。G老師未畢業已經響好多方面都做得比H出色好多條街喇，咩係唔可以做，咩係應該做嘅，人地都清楚過H呀。真係唔知點解佢咁都搵到工呀。

其實，我真係唔應該係咁數佢d野嘅，但係又真係太多「奇人異事」呀，唔記錄低，我怕我遺漏左一兩件就遺憾啦﹗

奇人奇語

今日開左個「大石壓死蟹」嘅會，本來我唔鍾意咁高調，開呢d會通常都唔出聲架，但係個會個主持人真係實在太過份：講大話、扯貓尾、唔尊重同事、要求同事做唔願意嘅事、夾硬俾位d賤精上......，於是我都忍唔住口發言。但係，又點吖，佢係你老細，你一係唔做，一係唔好理佢囉。我又唔會咁傻為d無謂人而唔做，結果我都係保持一貫嘅作風---你有你賤，我睬你都傻。基督徒我就見唔少，賤成咁嘅，都睇怕唔會有喇，佢仲周圍話俾人知自己係基督徒，又引用聖經，又成日話什麼仁義道德，其實最無果個係佢﹗

唉，等我記低今日精句，等自己開心吓啦：

開會期間，有人提出話老細之前無講過某句說話，老細發現自己無辦法再兜，就話：「我當時無講啫，但係我心意係咁諗呀﹗」

我發現我當時嘅生理反應真係好大，無論口、耳窿、鼻窿甚或係坐住嘅地方都同一時間發出好大但又無人聽到嘅「啤」一聲。

唉﹗唔通真係「國之將亡，必有妖孽」?!

後生仔教極唔聽

上星期五我班有個學生出事，我和H處理了這事，但其實中途H話要去食飯，因為lunch到佢睇飯，佢想食左先。算啦，人地要食飯，唔通唔俾咩，咪由佢去囉。之後佢要上堂，又話唔知點樣忙忙忙，放工時唔見我，就當今日咩事都無發生過咁，收工﹗我唔忙？我食左個包咋，下晝又要陪個學生見反黑，結果就唔記得打電話通知個家長有關於學生響學校發生嘅事啦。後來，我返到屋企，突然醒起，就好辛苦咁叫個同事教我上websams查個學生電話，再同阿家長詳談左半個鐘。雖然我曾經諗過打電話問H有無學生電話同佢有無打過電話通知個家長，但我深信深到200%佢一定無，所以自己打啦。結果，真係無。從9月1日起，我已知道：我記得的，佢未必記得，我唔記得的，佢一定唔記得，所以我要好清醒，否則隨時俾佢冼一鑊。今日又再次證實我有遠見啦。不過都係把鬼。

今日已經係星期三，訓導老師尋日請左病假，今朝一早我就問佢點處罰個學生，因為我知一個病人唔會好清醒，而H永遠比病人更唔清醒。小息時，訓導老師、受害老師、我和H一起討論怎處罰個學生，H竟然又再問我：「呀，你個日打左電話未呀？」我XGFDRDGFDYFYXYZ你，上次已經試過係咁，不聞不問，當無事發生，然後challen住我無打電話俾學生家長，今次又係咁﹗結果，我空堂時走去話佢知我好唔高興，佢竟然推說：「咁你都要體諒下我忙呀。」

我：「我唔忙？我忙到飯都未食呀。結果我唔記得打電話俾個家長啦，我返到屋企醒起都打左至瞓呀﹗」

H：「咁我以為你一手一腳跟左，就打埋電話呀。咁啦，你要我打就寫低俾我啦。」

我夠以為呢班得一個班主任啦：「我講過，你唔係我學生，我都唔想咁樣同你傾，出黎做野主動d啦，我無義務要提你做野架，而且個學生嘅事我地兩個都有責任去處理，應該係互相提點，而唔係以為我做左，就唔關你事。咁我同個學生傾完，你都問下呀，星期五見我唔到，尋日見到我啦，你點解唔了解下呢？仲響同事面前問我有無打電話通知家長。你唔打都可以提下我啫，結果我真係唔記得呀，如果我真係無打，咁點呢？」

H：「咁咪今日我打番囉。」

我處於半死(激死)狀態：「今日星期三喇，個家長分分鐘就係咁樣話我地喎。你點知個學生呢幾日有咩野呀。個學生有情緒病你唔係唔知架啦。我唔同你講，總之以後你半班我半班，邊個學生有咩頭暈身興，打交犯事就邊個處理啦。」

我返到埋位時發現自己隻手響度震，從來未試過俾同grade嘅同事搞到我咁高「興」呀﹗本來都唔想同佢分得咁清楚，其實我都唔怕做，但係做完仲要俾人串and好似唔關佢事咁，就係唔得﹗