讀愛The Reader

剛看完「讀愛」，令我諗番起讀書時幫盲人輔導會做義工－朗讀書本，製成錄音帶。我做左義工之後先發現，原來我朗讀出聲既話，讀完後我根本唔知自己讀左咩內容，讀過好多次都係咁，後來終於知道呢個可能真係我自己個腦同對耳唔協調掛。今日睇新聞，有個義工朗讀左過萬既時數，佢既錄音帶就算不停咁播，都可以播500日。勁呀﹗其實如果我唔係有咁既問題，我都幾鍾意做呢種義工架，自己睇之餘仲可以方便到好多盲人，仲可以博覽群書添﹗

套戲個男女主角都因為衝破唔到自己既心魔，所以一個要坐左廿年監，一個內疚左半世。好多人都有介意自己既地方，讀書時有個同學一定唔會叫同學上佢屋企玩，因為佢覺得自己住公屋好無面（其實係得一個同學知佢住公屋，知點解佢唔叫同學上去玩，哈，呢個同學就講晒俾我地聽，真係所謂「若要人不知，一d都唔可以講人知」呀﹗）、有個同學就唔鍾意人地問佢父母做咩既，因為佢父母係倒垃圾既，佢覺得好瘀。不過，我覺得Hanna（女主角）坐監都幾好吖，佢橫掂都係一支公無朋友無親人，每日咪返工放工，坐監仲俾佢有好多時間睇書學寫字。

成套戲無咩感動位，不過題材幾特別，Kate做得好，唔知係咪要佢同個男主角睇起上黎年齡差距要大呢，Kate d妝化得比實際老，三十六歲點會咁樣呀？四十二三歲已經好似阿婆咁。

下一套想睇既係……

開季第一潛（水底）

第二潛有野睇喇，首先，影下人先。（我係紫色人）

睇d相都知d水有幾清啦，不過，落左咁多日雨，預左喇﹗睇下水母、海葵、蝦仔同eel先。

上水。

潛完tea一tea，身心暢快﹗

開季第一潛（水面）

唉﹗舊年考完個潛水牌，本來話聖誕節去菲律賓考埋個高級牌，點知去左北京學滑雪，一路都無再落水。早幾日，端午節，潛下龍舟水啦﹗都好架喇，四點幾上晒水，換晒衫先黎落雨，個天算俾足面啦﹗

一連落左幾日大雨，都知唔方水清架喇，叫做同班潛友聚下啦，成年無見。

早上潛點係火石洲，水既能見度，學潛友米高哥話斎：「外國d DM黎到，以為我地香港人咁特別，fun dive走去潛屎渠添﹗」

唉﹗check野check到雙下扒都走埋出黎添﹗（坐響度果個呀……我呀﹗）

大家都忙住著野，快d落水﹗

排隊落水喇，企左邊梯果個係我呀，成年無潛，驚緊呀﹗

跳緊落水個位係我呀，驚到差d連mask都唔記得禁住就想跳落水喇，好彩旁邊有人提我﹗

落左水喇，發現件BC有條出氣喉好似有少少漏，但係d DM話無問題，於是繼續。

件BC不斷打脹左又漏，打脤左又漏，搞到我個「水面恐懼症」又黎喇﹗快d落去啦﹗

落之前，留倩影﹗（最前果個係我呀﹗）

都話第一潛能見度係0．5米呀，所以就算落到10米都係咩都影唔到﹗

於是下晝去左橋咀，食完飯吹左陣水，響船頭吹吹風，雖然陰天，但係都晒紅左呀﹗

第二潛，落水。等緊，今次唔驚喇﹗

都係等緊，眼望望﹗

到我喇﹗

著好蛙鞋，企個靚位先。

黏土蛋糕

黏土學會上星期整蛋糕，雖然一早已經識做，但係都走去玩下﹗

人地整一個，我就整左四個。呢個係唧花邊既蛋糕。

由上面望落去，哎呀，邊邊乾左d，有裂紋。

呢個係用左天使蛋糕個邊滑一滑既意念既蛋糕。仲整左磁石做底添﹗

另一個角度都幾好﹗

呢個只唧花邊響頂邊，再鋪滿生果。

另一個角度睇下先。

最後呢個最細，堆滿生果，d學生好鍾意呢個。

由上面睇下先。

呢幾片黃色桃狀物體，係導師送既，呢個個邊係有橫紋既。

玻璃畫

另一個示範係玻璃畫，就係響個玻璃樽上面鬼畫符。

例如：畫玫瑰啦﹗

例如：畫個花圃啦﹗

例如：海上星空加孤獨的小艇啦﹗

個蓋加塊布碎，靚好多架﹗

黎個近鏡。

我屋企其實有個舊雪櫃係用黎放玻璃樽既，因為舊玻璃樽仲好有用架，掉左去又增加堆田區既壓力，留起黎遲d用，幾好﹗

仲可以響膠片上畫畫，再移到玻璃上。我就畫左個女仔好鍾意既melody俾佢地睇喇﹗

廢紙再用

呢排教緊學生做緊d環保既手作仔，我示範左一個好簡單既，等佢地覺得容易做先，然後俾d書佢地睇下抄考下，再叫佢地又諗下有咩可以做。呢個係咩示範呢﹗

就係memo pad喇﹗

做法超簡單，首先cut齊d廢紙，然後搵條橡根紮住個頂部，再響最頂位置塗上白膠漿，等佢乾左之後，攞走條橡根，就成為一本memo pad喇﹗如果想靚d，可以響紙上面印d圖案，咁咪開心d囉﹗

其實我仲做左另一個memo pad架，不過唔記得影相。就係用保鮮紙盒個條卡紙同鋁片做cutter同個頂，再用d靚既雜誌紙貼靚d卡紙位，完成之後就可以張d廢紙逐張逐張cut（撕）出黎喇﹗好實用架﹗

拮拮felt wool

朋友新house（係真正既house）入伙，我地一班友仔走去佢屋企度玩，打搞佢一輪之餘，其中一個朋友仲帶埋一大包felt wool黎俾我地玩，於是我用左大概三個鐘，拮左呢兩件小手工。

第一件，菠蘿包

第二件，北極熊

第一次玩，我自己都覺得似模似樣啦﹗我都幾滿意﹗