你咁大膽？﹗

今次去巴基斯坦，聽得最多的反應係：你咁大膽？﹗其實，今次唔係最大膽，最大膽果次，要算第一次去旅行喇﹗

話說當年讀緊中學，參加一d聯校活動時，識左幾個男仔(都乖既﹗)，其中一個話諗住放暑假去北京旅行(佢大過我，中七暑假大把時間)，因為佢有個舊同學係由北京黎既，可以帶我地玩，佢問我有無興趣。我當然係好有興趣啦，但係我老豆唔俾呢﹗

好衰唔衰，我記得我老豆某一晚曾經講過話：「年青人要去下旅行，日本呀，大陸呀，呢d地方又安全又可以大開眼界，見識下好﹗」

結過，我呢d咁聽話既，就梗係用番佢呢段「發人深省」既對白黎同佢「據理力爭」啦﹗結果，佢吹我唔脹，無我辦法，要簽發permit，證明我唔係「偷渡出境」。

咁樣，我就同左三個素未謀面加一個傾過幾次電話既「朋友」去左北京加杭州，一共十六日，用左$1600左右，簡直經典呀﹗

我地搭左三十幾個鐘無冷氣既火車上北京，一到埗，立即搵住既地方啦，結果搵到無雷公咁遠，地鐵坐到去蘋果園，仲要行十幾分鐘，只因為要平﹗一入房，唔理自己姓咩，一於沖個靚涼先啦﹗(三十幾個鐘無沖喎，宜家就無所謂，但係想當年就頂唔順啦﹗)點知，佢每日只響指定時間提供兩三個鐘熱水，於是我就沖左個冰水浴(北京係用地下水既，凍死無命賠﹗)，咁就賴野喇---立即發燒又得，慢慢發燒都得，得左﹗

每日響日上三竿之後，我就開始發燒，直至太陽西下為止。呢個情況維持左幾日至完，好彩當時年青力壯，發住燒都係咁玩﹗

仲記得當年一個西瓜只賣三毫子，第一次響中間劏開個西瓜就用匙羮黎食，捧住個西瓜時，一路話：「響屋企邊有半個西瓜一條友食晒呀﹗無可能既事，響北京發生左喇﹗」開心到呢~~~~~

記得行頤和園時，見到西太后條石船，簡直想講粗口，真係大開眼界，亦都第一次感受到原來中史書裡面果D唔係故仔黎架，真係存在響呢個世界上面架﹗(宜家d小朋友就話成日遊學啫，果時邊有同學去旅行架﹗)

所謂「讀萬卷書不如行萬里路」，好彩當年有去呢個旅行，否則，唔會有咁多難忘既記憶﹗宜家仲可以憑呢d記憶，證實我已經患左老人痴呆症啦，否則，邊會記得d咁久遠既事吖﹗