虛虛假假

今日開左個會，會上有同事叫我講吓我之前同佢地分享嘅分班方法。我本來都無諗住講架喇，因為D高層一定唔會同意，但係D同事想我提出吓，咁我亦無所謂。

結果，我講完之後，同我地同枱嘅高層攞咪講完一番反對嘅說話之後，放底支咪就立刻離開左間房。坐我同圍D同事立即同我講：「呀﹗佢去厠所姐﹗」車﹗我好真心咁講，預左佢唔buy啦，佢有咩反應我呢D見慣「不可思意的真人真事」嘅蛇，又點會介意呀﹗佢後來返黎仲搬埋枱面自己D野走左去第二張枱添。作為一個高層，如果佢用呢D身體語言去表達不滿，我個人覺得，手法好低；如果佢唔係不滿而係因為其他原因要出去一分半分鐘，就仲唔知掟﹗點解？既然無不滿，就唔好做到人地以為你好不滿，令人感覺你好激動，一開始就掟咪無計傾啦，呢D係人際關係嘅大忌。

後來，另一組個阿頭又話咁分班會label左D學生，又話我地唔可以採取放棄學生嘅政策，又話佢地呢界會一直升上去讀中六，成績唔可以唔理。我唔知呢位阿sir會考嘅聆聽合唔合格呢？﹗呀﹗佢呢個年紀，當時應該無聆聽呢part。Sorry。成績好而入好班，呢D唔係labelling咩，根本D學生一讀書就已經俾人label左架啦。有錢讀直資，無錢讀公立；成績好入band1，成績唔好入band3；中一要考分班試，高分入好班，低分入籮底班。label唔label，睇你點present俾D學生同家長聽嘅姐，鬼叫你話佢知「你係籮底呀」。Sir，我有讀書架，有野叫做「積極歧視」，唔知阿sir有無讀過呢﹗Then，就係為左其他想讀書嘅同學可以上到堂，亦為左減低班搞事嘅學生嘅破壞力，又為左D同事來年好過D，所以我地級D同事先覺得需要攞出黎傾。

結果，我聽到呢位阿SIR話呢個呢個留班嘅，睇吓勸唔勸到佢地走啦。呢D唔係放棄個學生咩？(其實呢D說話成日都響教員室出現架啦)之後又有老師想拯救一個想離開衰班但成績又入唔到84強嘅乖學生，呢D咪就係我地唔想再出現嘅情況囉﹗有D學生真係讀得無咁叻，但佢地「有機會聽書」嘅話，D成績可能無咁差，唔讀又有破壞力嘅同學根本就響到拖低緊成班嘅成績。

高層話，以前試過類似嘅分班方法，但係D同事話點解要佢地去教呢D班，嘈哂﹗哈﹗呢D咪要你D高層諗吓嘅地方囉，你份人工包左架喎﹗今年如果實行，根本同當年唔一樣。今年呢班只會係十三四人，易控制好多，當然要好多野配合啦﹗

唉﹗為學校好至提出姐，黎「返工」嘅同事就真係你話點咪點囉，最緊要唔好搞到我﹗阿高層SIR，唔好唔聽下屬意見，大家唔出聲任你舞，間學校未必有前途架﹗