三日南澳上山下海踩車之旅

 

17/5/2013--19/5/2013
三日既不斷上山落山既深圳單車之旅圓滿結束。陰天雨天好好天、好好味既餸菜、住古城古宅、發掘台灣式民宿街、踩入行車隧道、着住單車衫走落海游水，今次通通都試齊，大滿足！
17/5係佛誕，我地一行五人約好九點響太和火車站等，原本係有十人行既，但有五位朋友見天氣唔好所以無黎，但我都係果句啦：去到就好天架喇，一場黎到，唔會好差既。
未開車，我己諗住落雨都踩架喇，除非落狗屎架啫﹗

雖然今日係假期，但過關都唔太難，算幾快。

我地響羅湖過關之後經沿河南路--延芳路--盤山公路--深沙路--深鹽路--海鮮街--鹽田港--大梅沙(午餐，上次食海鮮果間)--小梅沙--鹽葵路--玫瑰海岸--深葵路--坪南路--白石崗--葵北路--下村--金沙大道--坪西路--海濱北路--海濱南路--南澳(住富民路南天閣酒店)
今日共踩左6小時，70公里，上坡610米，下坡590米。

由羅湖踩左無幾耐就見到呢d怪獸車喇﹗

盤山公路山頂，我第一次踩呢度，比想像中短，好快就踩到上頂喇﹗

山腳就係沙頭角喇，去油站入下油先﹗

離開油站無耐就開始落雨喇，我地避左一陣雨就決定濕住踩喇﹗

今次同上次黎既路一樣，踩深鹽路既馬路有個好處，就係可以避雨。

啱啱過左海鮮街就有呢條新路，上次都未有，今次踩呢條路，舒服好多。其實d雨已經唔係好大，落吓又停吓，ok喎﹗

天雨路滑，d高手就踩囉，我都係推吓車上呢條樓梯算喇﹗

雨中大梅沙

開始進入大鵬半島喇﹗

坪西路，已經無落雨好耐架喇﹗

就黎去到今日既終點，見到今日既第一線陽光呀﹗懶到爆既蛇仔，好少踩咁多斜路，好彩比想像中無咁攰﹗

1730，去到南澳，揾到住宿(富民路南天閣酒店，原價280標間，310三人間，講價後：每間250，新淨，乾淨，阿姐有禮貌)，酒店門口幾開揚，仲可以睇日落。

之後，沖個靚涼，就行過隔離揾食喇，呢間d小菜都ok喎，但海鮮就貴到不得了﹗

18/5，今日打算響南澳周圍踩吓
南西路--西涌哨站--新東路--高嶺(午餐)--桔釣沙灣--楊梅坑(游水)--新東路--新大路--同富路--銀灘大道--較場尾--大鵬古城(住古城客棧)
今日共踩左5小時，60公里，上坡600米，下坡500米。

今日竟然係去左飲早茶，好街坊既一間茶居，就響酒店後面街。

今日一開車就去附近既碼頭八吓先，原來呢個碼頭係坐觀光船既，50蚊人仔去鹽田港，船程半小時。

之後本來諗住去西涌呢個中國八大海灘睇吓有幾巴閉，點知入去要收錢，唯有....走﹗

結果踩左上山頂，個閘後面就係哨站，掘頭路。
本來諗住去埋東涌，但問左路人，原來東涌好似西涌，咁大家都決定唔去喇﹗
爬返上3公里好斜既上坡路，向楊梅坑進發。

西涌海灘

上完3公里，金過海下。好彩之後既斜路少好多咋。

中途開始好天，又上斜，水飲得七七八八，3蚊支細水都要買啦﹗

新東路呢條藍色綠道超好踩﹗

高嶺農家菜，又係好好食喎﹗

響高嶺食過農家菜之後，踩冇幾遠就去到楊梅坑，嘩﹗水清沙幼呀﹗

踩到黎呢度，個太陽又猛左好多喇﹗我地沿向馬灣既單車路踩，揀左個唔收錢既小灘落水浸吓，真係涼到冇朋友呀﹗蛇仔保持一貫污漕本色，無泳衣無得沖身都照落水。

玩完一輪，我地本來打算去較場尾呢個台灣式民宿區揾房，但真係估佢唔到咁多間民宿都會無房，有d房十分鐘前話有，轉個頭返去就無左喇﹗仲話要早一個月訂至會有房喎，咁下次請早喇﹗

結果踩多兩步去附近既大鵬古城揾住宿，最後一間，住呢間本來真係民宅既屋，兩層，五個人住晒，480蚊一晚，可惜成晚俾蚊咬，冷氣又唔夠凍﹗

最搞笑係第二朝一早有個阿婆黎拍門，話屋主香港個仔結婚，要入黎拜祖先，但係屋主一家人都唔響度架喎，得呢個叫黃婆既鄰居黎幫手拜神咋喎。後來黎多兩個幫手，又品神又燒香又放炮竹，好好傾，但唔俾影相。

古城內唯一一間客棧

settle好，就出去食飯，古城內既餐廳，呢間真係好食呀﹗

農家菜，好味﹗全部係響香港食唔到既餸菜。

食完個靚飯，去食埋個糖水先。

今日似乎人人都踩到有d攰喇﹗

19/5，今日要返香港咯﹗
今日路線：東山寺--大亞灣核電站門口--鵬飛路--迭福山隧道--雷公山隧道--(17/5原路返回羅湖)
今日共踩：5.5小時，60公里，上坡500米，下坡530米。

今日先響古城踩吓

糧倉

哨站

古城附近就係東山寺，都好大間架，我地只響門口影左相就走喇﹗

下一站，核電站，可惜去到門口唔俾入。

之後，我地去到金沙大道同迎賓路個迴旋處時，因為整路，封左一邊路，但係我地諗住時間仲早，可以試吓踩上葵南路，去葵北路，但係原來行唔到，結果入左坪西路，咁啱響隧道口，大家諗緊行唔行得隧道時，兩個公安經過，我地問左路之後，佢叫我地入隧道，咁就照踩啦﹗

咁樣行法，就慳返金沙大道同葵北路一大段上落斜喇﹗
今日太陽好猛，好熱，大家踩到去大梅沙麥當奴食晏時已經熱到死左。

好天既大梅沙，超多人呀﹗

麥當奴食晏

返到深圳市，竟然見到呢個老翻Guell Park，係繼秘魯之後另一個翻版。

其實大陸d綠道鋪呢d磚都幾奇怪，震到不斷要企響度踩，否則個pat開花呀﹗

踩到上盤山公路山頂，大家都好似踩完一樣，因為所有難踩既路都踩晒喇﹗


三日只係用左三百蚊人仔，又食又踩又玩又瞓，抵玩到賴屎啦﹗
特別鳴謝路人甲，幫我車埋行李，又做埋帶路。