河源惠洲單車遊

2/2/2013
一早八點幾就到左落馬洲，約埋幾個朋友，揾到租左既客貨車，司機就車我地上河源。
原本預計十二點到河源食晏，但因為春運，路上好多車，而且好多車炒左，結果塞到兩點幾至有飯食。
嘩﹗今次兩日一夜食三餐，餐餐大魚大肉，鬼咁豐富﹗(掛住食無影相呀﹗)
結果，成四點至踩車，踩上萬綠湖(全廣東省最大既水庫)，我成大半年無認真踩過車，上斜真係有d索氣呀﹗但上萬綠湖條路係一條長命暗斜呢﹗
呢幅相只係剛開始，平路，無乜車，正﹗

入到萬綠湖，四點幾，天陰陰，景區差不多關門，無乜路可行，響度兜左一陣，見無乜前途，決定踩出城揾地方住。今日只踩左23公里，真係幾少﹗

本來想去住豪d浸温泉，但去到先知太貴，成七百幾人仔。終於呢晚去左楊村，128人仔，我間房好靜，但朋友話佢地d房好多卡拉ok聲，好嘈﹗

3/2/2013
又係一早起身，因為好早瞓，所以好精神，落街是但食d野，又開始踩車喇﹗
司機車我地去到可以踩車既位置，大家準備好晒，大約九點就開始喇﹗

尋日踩一大段暗斜，今日踩既大部分都係平路，朋友輕易就踩到時速廿七、廿八，我就要食住路人甲車尾既氣流至踩到廿三、廿四。今日主要沿東江踩。

踩左無幾耐就去到觀音閣鎮(睇完呢個路標之後就入小鎮喇)

鎮裡面有呢條綠道，不過我地今次唔係踩呢度

同村民一齊踩

新年臨近，經過既所有小鎮都好有新年氣氛

之後去到觀音閣，景色怡人呀﹗於是我地就響度咬蔗，周圍睇吓影吓相。休息左一大輪至再上路。


十二點幾，已經踩左五十公里，肚仔餓，去食農家菜，好好食，但要等足一個鐘至有得食，真係餓鬼死﹗

食飽，再踩多一陣，今次踩3號綠道，環境唔錯﹗

經過呢個小鎮，好多梅菜賣

踩到未夠三點，踩多左十公里，就已經要上車返去喇，因為已經去到多車地帶，而綠道又駁唔返馬路，唔可以有位置上車，所以今日好早收車﹗
今日踩左三個半鐘左右，踩左60公里，打破我既最高車速，最快時速係28公里，多數時間係23公里左右，真係未試過咁努力踩呀﹗爽﹗

趣事：
排隊過關返港時突然有個五歲左右排隔離條隊既細路搭訕。
細路：你（我朋友）條呔（單車呔）d紋冇晒喇，間唔中都要換下呔㗎!
我朋友：我冇錢喎。
細路：係啦，窮人係冇錢㗎喇。
我：哥哥呢條呔咁少紋至踩得快架!唔洗換。
細路：我地呢d街車車手唔洗用呢d呔都好快架喎。
我：你踩得咁快，咁有冇戴頭盔架?
細路：冇架，我踩得好快但唔會跌架。
我：點解呢?
細路：我架車有輔助轆架。