「國境之南．港島之西」港西一日遊

06／10／2012
呢日路人甲去左踩山路車，所以我就打算自己去漫遊，咁同個朋友講起，佢又有興趣，所以就有女伴遊喇﹗
我地約左九點響上環食早餐，但一個唔覺意食（其實係傾）到十一點至去坐電車入西環，點知一路都好塞車，去到堅尼地城總站時已經十二點喇﹗

由呢度開始向域多利街方向行，大概行廿分鐘（經過左廢物轉運站個路口再行多少少）就會去到西環鐘聲泳棚喇﹗途經呢間聖公會既牧民中心，之後行多幾步就有個路口，行入去就係巴士總站，你可以選擇行入去，一路行到盡頭上樓梯再向西行，都可以行到去泳棚既。如果坐巴士，例如101， 104，5等，都係響呢個巴士站落車既。

過左巴士站無幾遠，對面馬路有間廟，當日無開，但重點係下一幅圖。

門口旁邊有呢個塗鴉，認得係邊個嗎？

呢度就係我地要去既第一個目的地喇﹗以前有竹棚圍住，無宜家咁大浪，好多人黎游水架﹗

我地都留左好耐至走呀，仲見到呢隻張保仔號添﹗

之後沿路行返出去，但去到過左廢物轉運站之後有條樓梯，行落去就會見到個球場，裡面就有呢個英國人為左畫出維多利亞城界限既界碑喇﹗

行出海邊見到隻咁大隻既船，望左一陣，又行返入去小街度。

行無幾耐就係巴士總站，旁邊有呢個東華痘局既碑。

對面就係域多利亞公眾殮房喇，前幾日十一海難，呢度就人山人海喇，願死者安息﹗

行返去電車總站後，沿海邊行，好舒服呀﹗

呢位露宿者就係我位朋友喇﹗

一路行返去卑路乍街，見到呢位盲公馮，真係第一次見呢種玩意，聽就聽得多喇﹗

向東行，見到呢度，再向東行多幾歩就會見到防空洞個門口。

即係呢度喇﹗

跟住，我地行返轉頭，響街坊褔利會旁就係李寶龍路，就係我地要去既叧一個大目的地喇﹗

途經太白臺（都係李寶龍既物業，因為李白係佢偶像，所以佢呢頭個三個物業（太白臺、菁蓮臺、桃李臺）都以同李白有關既名稱命名）

太白臺內好寧靜

呢幢樓係七十年代呢﹗



內部

行返去李寶龍路向上行，就會見到呢個牌

行過呢條靚靚樓梯就係魯班廟喇﹗









呢間廟唔係好大，但石雕幾靚，我地行左一陣，影左一陣相，就由呢個路牌旁既小路上薄扶林道

行上少少可以影埋廟既後面，好靚喎﹗

行上薄扶林道既目的就係要去香港大學喇，講真，以前返學成日經，但就真係未入過去

見到有新人影婚紗相

仲有個細路響陸佑堂飈車喎







又入左去馮平山博物館行左陣

美術館d畫幾好睇呀﹗

沿般咸道行落去西邊街，見到呢座救恩堂之後，就會見到有間紅磚屋，就係西區社區中心（前物係贊育醫院），入面條樓梯好靚架﹗

側門入會見到佢

睇完晒今日既目的地，打算走，經過呢個浴室，又走入去睇吓，好有趣，重有呢d浴室喎，見到個阿婆啱啱沖完咋﹗



六點半，回家去﹗