食多踩少既新會開平單車之旅

19/5-20/5，趁星期六日，一班朋友book左一架貨車，一架客車，一齊上新會開平飲飲食食，單車只踩左唔夠六十公里，脂肪積聚之旅呀﹗
星期六一早九點幾響深圳保稅區集合

十點正式開車，由於客車司機唔係好識路，結果我地一點至到達新會。朋友上次食過一間酒家，食物唔錯，所以今次都想再試。

真係幾好食架，大陸人蒸魚果然有一手，去到邊度食既魚都係蒸得咁滑既。燒鵝就味濃，同香港既味道有分別，幾好味﹗
食完個天就開始停雨喇，響深圳時藍天白雲，愈接近起步踩車既地方，個天就愈黑。
點知，一開始踩，就愈落愈大。
我地結果決定由新會既茶坑出發。

後來經過梁啟超故居同小鳥天堂，都係響外面望下就算喇﹗小鳥天堂已經無小鳥，地盤就有一個。

梁啟超呢，大家無咩興趣，時間又晏喇，咁就走啦，其實我都想睇吓架﹗

水戰完，個背脊就搞成咁喇﹗

因為起步時間太晏，兩點幾三點至正式出發，踩左大約三十公里，水戰左兩個幾鐘，五點半就收車喇，其實已經踩到去開平架喇，不過要趕食飯，都係坐車去酒店算喇﹗
我地住呢間「旅之家」都算平靚正啦，128人仔一間雙人房，最好野係個廁所沖涼位置夠大，成架單車都放得落去洗嘛﹗

我地踩完，佢又停雨喇，好彩我覺得水戰都幾好玩啫﹗雨後既開平潭江幾靚﹗

呢晚去左食飯既呢間食店唔多老實，雖然個飯幾好味，但係佢響郊外，我地臨走時都打晒烊，得返一兩枱客，d老鼠已經出黎執枱喇，所以我都唔建議大家去喇﹗

嘩﹗潭江個夜景都好得吓架﹗

第二日，大家各自去食早餐，九點半響大堂集合。

搞掂晒都成十點喇，開始踩車，目的地係碉樓。其實開平周圍都係碉樓，有d收好貴入場費，有d唔洗錢。我地當然係去d唔洗錢又好玩架啦﹗沿潭江邊一路踩，景色唔錯喎，響馬路踩既時候，出奇地，d司機係會讓路俾我地架﹗

第一站，去左對面江呢座潭江半島酒店，五星大酒店黎架，開平最大最靚架喎，哈哈，我幾年前黎探親，就係住呢度喇﹗
第二站，漩溪里，睇碉樓。途經呢間中學，幾鬼奢華呢﹗

漩溪里既碉樓，比起要付費既唔差好遠，只係無得內進囉﹗

第三站，南樓。又係無俾錢入去呀，得一座南樓，影張相算。

再踩多少少就到左赤坎古鎮喇，呢度好多路都係咁既綠色隧道，踩得好舒服架。

赤坎古鎮成日拍戲架，宜家拍緊「一代宗師」。呢度真係好多野好影架，可惜又係唔可以慢慢影啦﹗

影完一大輪，食埋個12蚊人仔一煲既黃膳飯，好味到呢，用柴火煮，豬油撈架﹗

買埋好夠薑既薑糖做手信，起程回家去。

又坐左三粒鐘車至返到深圳，坐火車返去lu。

兩日行程，連買手信，每人500人仔，可能平過響香港玩喎﹗好玩﹗
**特別鳴謝Annie Wong提供部份相片

今年寫去年旅程

出發去秘魯之前，我寫左篇稿去「中國旅遊」，之後就忘記得一乾二淨，返港之後並沒有檢查家裡最新一期的書刊，今早，路人甲告訴我昨晚收到「中國旅遊」的稿費單，方才發現稿件被刊登了。

五月號

原稿：(可能係篇幅所限，編輯幫我刪減左好多)

地道的土耳其浴

土耳其浴(hamam)，真的只有在土耳其才可以真真正正地體驗得到那特別的經歷，感受得到那種獨特的沐浴氣氛﹗

我這次到土耳其旅遊，試了兩次地道的土耳其浴，兩次都有難忘的經歷。

第一次，我在Urfa遊覽完Harran之後，要求當地的導遊帶我去地道的土耳其浴室。於是，他帶我到了一間相當地道，根本不會有遊客到訪的浴室。雖然這間並不是那種有幾百年歷史的浴室，但跟一班當地婦女一起入浴，肉帛相見，相當「有風味」，而且，這種地道的浴室比專為遊客而設的那些浴室，收費亦比較便宜。聽說，專為遊客而設的浴室裡，替你「捽老泥」的人可能會是男人，遊客亦要穿泳裝入浴。

這間浴室裡，沒有一位嬸嬸懂英文，我問了很久才知道價錢和有什麼服務。付款後，嬸嬸帶我到休息大堂的小房去更衣。最初，我仍用大毛巾把身體包得密密實實的，但當我一踏進澡堂，看見所有女人都是大大方方的半裸著，我就立即把毛巾甩掉了。

我從來沒有沖過土耳其浴，什麼也不懂，只懂看著那班光豬婦女傻笑。其中一位嬸嬸說(全部用身體語言)要先洗頭，但我並沒有帶任何清潔用品。嬸嬸突然叫我坐下，然後二話不說便替我洗起頭來。說真的，她的洗頭方法的確有點粗暴，但後來我才知道她並不是這裡的職員，她只是來洗澡的街坊罷了﹗她們雖然不懂英文，但全都十分和藹可親，不斷告訴我要怎樣留意水溫，焗蒸氣浴應焗多久，睡在哪兒最舒適﹗

我洗完頭，焗完蒸氣浴，就躺在那塊熱熱的雲石枱上休息，感覺很舒服啊﹗休息期間，看著職員替客人「捽老泥」，一條一條大大小小的，粗粗黑黑的「老泥」不停地從皮膚裡走出來，看得我目瞪口呆，心想，這位小姐一定很久沒有洗澡吧﹗終於到我了，職員往我身上一捽，一大條千年老泥就掛在我的身上，我剛才對那位小姐的想法立即消失得無形無踪。

期間，替我洗頭那位嬸嬸在休息室聊完天、抽過煙，又再次走進浴室來，跟洗澡的街坊繼續聊天，又邀請我替她按摩，而另一位年青媽媽就不斷送枇杷給我吃。對於土耳其人來說，到土耳其浴室是一個跟街坊朋友聯誼的好機會，媽媽還會在這裡替兒子挑選太太呢﹗

第二次，我在Canakale等車時，自己走去找浴室。這間浴室真的很古舊，已經有幾百年歷史，浴室裡有個像是太空艙的圓頂，一張四方的大雲石枱就在圓頂下面，跟平時看到的土耳其浴宣傳照片十分相似，非常有風味﹗

這次沒有第一次那麼多街坊，但我就可以靜靜地躺在雲石枱上，望著浴室那個圓頂，看著圓頂那排列整齊的玻璃窗透出的光線，整個造型和感覺都很科幻。這次令我最難忘的，就是那位替我「捽老泥」的無上裝嬸嬸。她一邊替我捽身，一邊不經意地，毫不介意地把胸前兩團肉往我面上送，真的又震撼，又尷尬呀﹗

真正踏足南美

25/3/2012
瞓完一晚機場，一早就要準備上機。
今日係英國「較快鐘」既日子，家姐一早提左我，但好奇怪，響機場揾極都唔見有notice，又無廣播，只係見到luggage storage提早左開門，先至確定真係快左一個鐘。
0730  到south terminal check in
1000  起飛喇，呢程去Madrid(機程兩小時)
1340(當地時間) 到左Madrid，以為轉機會好趕，但係架機delay到1530至起飛，呢程機要飛12個鐘，我地坐廉航aireuropa，無娛樂，平野，無辦法，上一程無野食添呀﹗
2100(當地時間) 到喇到喇，入境都算快，但係響行李帶度就等左成個鐘呀﹗
2240  出左機場已經見到一早book左既hostel既司機，大約半個鐘就由機場到左位於central既hostel Espana喇﹗

温馨提示：
1. 機場兌換US-sol, 2.55，到市內兌換較好(1 sol大約等如HKD3)
2. hostel Espana雙人房私家廁一房一晚60sol，位置很好，好近plaza mayor

26/3/2012
我地住既房下面就係roof garden，一早已經俾下面d雀嘈醒，個roof garden好似動物園咁架﹗

我地響度食左個6 sol既早餐，一邊同路人甲skype，一邊食住個唔係好豐富既早餐，一邊聽住d雀呱呱叫﹗

呢間hostel好得意，成間博物館咁架﹗

個門口就靚到我呢d死窮鬼到埗當晚落的士時叫左出黎：唔係嘛，咁平但咁靚？

響hostel玩左一輪影相之後，終於都山發喇﹗條街真係好有南美特色架﹗

哈哈，捷古華拉係耶穌呀﹗搞笑﹗原來秘魯既塗鴉都好得架喎﹗

行左個轉角就盲中中咁入左間gallary(casa rimac)，係相展黎既﹗

仲有好多當年佢地內戰既相片，令我呢條對南美無咩認識又唔響出發前温吓書先既小蛇獲益良多呀﹗

經過皇宮時，剛巧換班(大約係1200左右，次次呢個時間經過都係換緊班)

利馬既大教堂呀，今日唔入去住

之後行左好遠去巴士公司問價錢，再響Av. Inca Garcilazo De La Vega等巴士去Miraflores，坐左成個鐘至到，不過，架巴士播住好王家衛既音樂，坐耐d都無問題﹗去Miraflores既目的係去揾間agency，睇吓去Nazca睇Nazca lines既真實價錢，點知去到時先知道佢搬走左，咁就唔理咁多咯，醫左個肚先﹗
我地去左超市買左燒雞，olives同埋野飲，去love park開餐﹗

love park係一個響海邊山上既公園，唔係好大，點解要黎呢？原因係佢係一個A貨Gaudi既公園(正貨)

沿住山上面既小徑，好舒服咁慢慢行，好快就行到黎呢座燈塔喇﹗

行完之後，我地坐返巴士，打算去magic water circuit，點知落左車去到門口至知今日唔開，好彩呢度係返lima central既中途位置，無浪費左時間。過幾日再黎過﹗ 

我地上左巴士之後，我發現全架小巴既人都望住我兩人，點解呢？響幾秒之後謎底就解開左喇：架巴士好多人，我地上左車之後就企左響門口位，坐響我地周圍既人好熱心咁用流利既西班牙文、有限既英文同埋身體語言同我地講要收好部相機，佢地比我地仲緊張。其實黎之前都知道呢度治安唔好，今日第一日響度玩，日頭都仲有少少驚，因為hostel叫我地唔好行出個安全區，嘩﹗有安全區喎，即係有好唔安全既地區啦︳但係我地唔聽話，行到無雷公咁遠，都好似好安全咁，夜晚都唔記得左要小心d呢回事咯﹗
有個男仔仲 講，我地落車個度係：very very very very very dangerous﹗哈哈，佢真係好cute咁用左幾個very架﹗佢問我地洗唔洗陪我地落車去安全區，當時我都仲有少少懷疑佢既動機，但係原來佢係同女朋友去拍拖，咁佢真係擔心我地既安全架，原來都要行幾遠吓先至行到plaza mayor。
由搭飛機開始，我已經覺得秘魯人真係好友善，好肯幫人，今日之後，我幾乎每日都感覺到佢地既熱情，尤其是響利馬﹗

Plaza Mayor既Lima Catedral夜景﹗


温馨提示：
1. Lima central 至Miraflores既當地巴士   1.5sol
2. Love Park無入場費