毛毛袋

好耐好耐無車過野，今日諗諗吓，冬天無冬天袋用喎，我又有塊毛毛布，不如車個袋用吓啦﹗於是求求其其咁剪左個四方形，是是但但咁車埋左一齊，揾條唔用既布腰帶做肩帶，唔洗一個鐘，馬虎地完成。

 

燕麥曲奇

由英國返黎之後，整過一次曲奇俾路人甲食，佢話好味，仲帶左一d返公司請同事食。
今日路人甲去聽講座，我唔洗煮飯，於是又整多次曲奇，今次加多左d材料，希望更加好味啦﹗

呢個曲奇最好既地方係：好易整，又好味﹗
1. 將125克牛油+1湯匙糖膠+2/3杯黃糖叮溶。
2. 將2杯燕麥+1杯麵粉+1茶匙梳打粉拌勻，可以加入果仁之類既材料。(我今次加埋朱古力粉+提子乾+果皮+合桃)
3. 將(1)倒入(2)裡面，視乎濕度加入奶，搓成粉團，160C焗14分鐘。

幾幅回歸後的畫

由英國返黎之後，繼續有去上堂學畫畫，不過返到屋企就無咩心機做功課，有時又無交功課，只係畫左呢幾幅：

老師話呢張幾好，我都覺得係比較好既一幅

山水，我好少畫，呢幅畫左好耐，仲係唔係好得

路人甲話我畫angry bird，睇吓隻公雞就知啦﹗

竹，可以係好易畫，但又可以好難畫既，真係畫得唔好，都唔知點畫好

紫藤，畫得最好應該係右邊既兩枝樹枝囉﹗
字就更加懶得寫，只係寫左呢張：

比我想像中好，但都係唔掂﹗

甜薯班戟卷

路人甲喜歡食番薯，也喜歡食pancake，所以呢個甜品啱晒﹗

1. 番薯切薄片蒸15分鐘，趁熱壓爛，加入2湯匙煉奶和1湯匙牛油。
2. 班戟皮：120克麵粉+1湯匙黃砂糖+2隻蛋+300毫升奶+1湯匙溶化牛油，拌勻。
3. 煎好班戟皮，將餡料放在班戟皮上，捲起，以少許粉漿收口，將收口處向下，略煎。

可以在上面加糖膠，好味﹗

旅居

以前經常聽人說「旅居」，覺得好勁，怎樣可以不上班然後選個城市去住一下呢？不過，原來可以好簡單，當你沒有包袱，沒什麼要掛心，你便可以大大方方的去旅居。

這次到英國，都可以勉強的說自己去了一次「旅居」吧﹗

以前到過英國一次，只是到南面玩，英國給我的感覺是很親切的，因為很多事物都跟香港的很相似，但就因為這樣，又少了一分旅行的感覺。今次，去了較多的地方，但還是喜愛倫敦。曾經聽過有朋友說：「毎到一個地方，我會第一時間逃離市區。」我知道大自然好，但市區也有市區的可愛之處。倫敦真是一個目不暇給的大都市，無論什麼季節來，無論來過多少次，無論跟誰來，它都會給你不同的新鮮感。今次是我第二次到倫敦，加上上一次的遊玩地點，我幾乎玩過了所有遊客必到的地方，當然，還有很多地方可以參觀，而我也真的有很多地方打算去玩的，郤被一些事阻住了。也許，這就成了我日後再到這城市的原因了。

英國給我最深的印象是變幻莫測的天氣，一早起來看見藍天白雲，於是滿心歡喜的去洗面準備外出，洗完後郤是烏雲密佈，然後時晴時雨，真的有點令人氣餒。

以前去旅行，只是走馬看花，時間過去了，然後學懂多一點了，會得深入的去對每個地方認識多一點，現在，我知道「住過那兒」和「到過那兒」的體會實在有很大的差別。

今次本來是去探家姐一家，讓家姐病癒後去一去旅行，玩一下，又可以在她家住一住，照顧一下她。誰知，她強如昔，壯如牛，跟沒病的人沒分別，於是，她開車玩了千多公里，她要煮飯，我由她煮，反正我煮得未必好吃，結果我只是飯來張口，食完洗兩隻碗就又混了一頓飯吃了。當然，剪草除weeds的工作我仍是很樂意幫手做的。

可惜，這次「旅居」可能是最後一次了。包袱變大了，掛心的事多了。

回饋

去柬埔寨玩已經係兩三年前既事喇，去完之後，我將我響吳哥遇到既tuktuk車司機既資料放左上forum，因為我覺得佢係一個好司機，好野要同大家分享，佢做得好就更加要幫吓佢。結果出乎我意料之外，個post 出左之後，佢好生意到不得了，其實我只係幫佢開左個頭，如果佢唔係好既話，d人都唔會不斷咁響forum度讚佢，令佢愈來愈多生意啦﹗所以，係天助自助者﹗
但係，好搞笑地，佢當左我係佢恩人咁，成日寫email黎多謝我，又叫我再去，包我食住行，最近仲話已經夠錢買地，打算起屋喇﹗雖然我唔係真係幫到佢，但我都替佢開心。
最近有兩個好朋友去柬埔寨玩，我當然叫呢位司機接待佢地啦，點知佢只收我既朋友半價，朋友用完佢既服務之後，覺得好滿意，俾左比半價多既錢佢，佢竟然攞住d錢去買左張大畫俾我，大到我都唔知放邊到好，而我既朋友就毎人有一張較小既，人人開心。
Thank you very much, Mao!

最後兩天倫敦遊

回港已兩個月，今日至有心情寫埋個英國blog。

1/10/2011，又係星期六，八磅搭火車出倫敦，今日目的地係白金漢宮，去到至知要排隊攞左時間先，其實之前上網睇過，係可以預約既，不過要俾錢，所以我打算出黎排隊，排左一個鐘，約到1430，於是行左去National Gallery睇野。真係好多好畫睇﹗

睇到够鐘，又行返去白金漢宮，途中又見到站崗既兵哥

睇左成兩個鐘，唔俾影相，只有呢張。真係值得一睇，今次仲有王子大婚王妃既婚紗睇，好靚﹗

睇完之後又行返去National Gallery再睇過，當然係行第二條路啦，呢度俾我好英國既感覺。

響National Gallery門口咁多個表演者之中，我最鍾意呢個

行完之後，下一個目的地係響Regent Street既National Geographic shop，經過呢個Piccadilly Circus，之前經過好多次，都無影返張相。

National Geographic shop，朝聖﹗

2/10/2011，今日打算行到腳軟為止，第一站係呢到：

又見到拍戲喇﹗

下一站：Museum of London，好多人都唔會去，但係我覺得幾好睇，仲可以了解多d倫敦。

英國既天氣時晴時陰，有太陽就好好享受吓喇﹗

最後，去多次大英博物館，睇埋上次未睇完既野﹗

本來打算8號同9號去多兩日倫敦，因為仲有好多野未睇完，但係有事發生左，令我坐左響屋企一個星期，邊度都無去，10號上機返港。