牛仔裙大變身

都唔記得幾時pack起左呢條牛仔裙打算掉左佢架喇，響學校執包袱既時候，俾我發現左佢，於是又攞左返屋企洗乾淨佢，做咩好呢？

呢個夏天流行賴屎褲，於是車條著吓啦﹗

好簡單，車埋個褲浪就搞掂喇。

咁剪走左個浪既布又點算好呢？呀，車個袋啦﹗

幾靚架，袋小小野，啱啱好。

藍色牛仔布加條原色皮繩，最good fit啦﹗

鈎個復古包包

十萬年前，我係識鈎野既(拿，唔係佬呀吓)，但係無鈎咁耐，真係一D都唔記得，好彩有朋友係鈎野達人，而我又資質聰敏，學左一個下晝已掌握到基本技巧，返屋企鈎鈎鈎喇﹗

鈎左幾個鐘，結果鈎左一個懷舊復古包包，仲未諗到裝咩好。

個樣舊到連我阿媽都唔唬呀﹗

嶺南山水畫班(第十七堂畫蘭花)

今次呢幅應該好易畫，但係畫左好耐，D色較極都唔係好啱咁。終於，老師話，D花OK，D葉可以深色D，係舊石太多墨位。不過，第一次畫石，我覺得OK架喇﹗

大刀刃早操

尋日路人甲放假，我地一早五點起身，差不多六點就出發去行大刀刃，連埋休息，足五個鐘，全程16KM，路人甲仲成朝話我行得慢，搞到佢行得好攰，如果行快D就會無咁攰。鬼咩﹗咁多落山路，好多仲係石仔路，係我弱項唔慢就奇喇﹗

由林村轉入AYP Camp site就會見到呢個牌，呢2600M上斜，只係車路咋(成條車路好多山泥傾瀉位，有D仲塞左條路，有好多響山上面碌落黎既石頭)，之後仲大把有得上呀﹗

行左一陣，見到日出呀，不過，今日煙霞大，普通靚，下面一排排既就係康樂園喇﹗

沿路好多蜘蛛網，仲有好多笑面蜘蛛，大大隻。路人甲一路都好忙咁「開路」。

呢日煙霞好大，無景，唯有睇吓植物啦﹗

無論平路、上山路、落山路，路人甲都行響我前面，經常影我辛苦上山既樣。

咩景都無，仲諗住上黎睇風景架嘛﹗

呢度係成個大刀刃山脊最險要既位置，所以加有圍欄，我就覺得佢好似野長城喇﹗

路人甲話試過行到上黎俾風吹到企唔穩架，但呢日就只有微風咋﹗

今日行既最高點比上次高，有566M，而且，總計上山路有九百幾米高，亦多過上次，但今次唔係太攰，可能做GYM真係有D用喎﹗

五口家3死女孩父母亡

「康泰旅行社一輛旅遊巴被挾持的事件後，保安局副局長黎棟國，凌晨時份與人質家屬乘坐包機抵達馬尼拉，早上先後到3間醫院，探望被挾持獲救的旅行團團友，包括一名下顎中槍的32歲女子，及安慰一家五口中3死兩傷的梁……」

昨天一早聽聞有旅行團被挾持，最初報導是韓國旅客，不久，新聞報導更正是康泰旅行社。最初知道事件的原因時，我還認為是件很易搞定的事，因為槍手的要求只是還他一個公道，要求復職。問題是容易解決的，連剛才在茶餐廳喝著奶茶的師奶都能說出很好的解決方法，為何菲律賓政府會令事情變成這個局面呢？這令我聯想到：一個國家不能強大起來，要靠輸出國民成為別人的工人，任人差使，真的是有原因的。

一個慘劇，可盡見當中的可恥、可敬、可悲、可憐、可憫。

一個人只為一己之利而莽顧他人性命，為達目的而不擇手段是為可恥﹗

最早獲釋的太太，臨危不亂，懂得使計多救一條小生命；趁亂撲出，企圖阻止槍手繼續殺人的先生，雖然最終命喪槍下，但他的勇敢比那班躲在巴士車輪旁的「特蠢部隊」更甚。這兩位雖一死一生，但行為皆可敬﹗

一個風景如畫的國度，在一班不知所謂的領導人領導下，國情經年不見起色，任何數得出的罪惡都可在菲律賓見到，而所謂特種部隊，實情連香港的普通警員都不如，無論手法和部署都絕不專業。我甚至懷疑有死者是被警方所殺呢﹗如此這般，怎會不覺可悲？

六個家庭開開心心去旅行，竟然換來家破人亡的結果，根本無人會想到。海嘯、地震、水災、泥石流……是天災，無人有能力阻止，遇上了，只好嘆句「命也」﹗但，這種人禍是絕對可以阻止的，慘劇是無理由會發生的，受害人抱著滿懷疑問離去，無端送命，可憐﹗小孩失去父母、妻子失去丈夫、丈夫失去妻子、父母失去子女、各人失去完整的家庭，有小朋友變成孤兒，可憐之極﹗

整個慘劇，無論是任何一方，我都覺得可憫。只有抱著憐憫（任何一方）之心去看這件事，感覺才不至那麼悲痛﹗

各位遇難的香港人，安息吧﹗

嶺南派山水畫（第十六堂畫螳螂）

老師今堂話：你畫啱晒，係d色唔夠，隻野大左d，翼長左少少。

啱晒都無話靚，即係啱就啱喇，不過硬係唔夠好？

蛇與豬的對話

雀斑媽媽一家、蛇、豬，同埋一班朋友仔去食飯，豬見雀斑媽媽個囡囡d頭髮好攣，就問：「囡囡，你爸爸媽媽一定係攣架喇﹗」

蛇：「吓？你點知人地攣呀？」

其他朋友：「係囉，攣點生阿囡囡呀？」

豬：「吓？」

蛇：「你睇佢咁短，點知佢攣呀？」(指住阿爸爸d頭髮)

阿爸爸真慘，又俾人話攣，又俾人話短﹗

搵到你喇﹗

一直都好有興趣去一轉朝聖之旅，即係：埃及、以色列、約旦。雖然我係基督徒，但絕對係一個好鬼懶既基督徒，近呢兩年仲對宗教有d懷疑，所以，我覺得去行一轉係有意義既。如果去呢幾個地方而腦裡面又無一d宗教同歷史既根底，就會變成一次無根之旅，無得著，所以，當我知道有朋友會響今個月去呢幾個地方，而教會仲搞左幾次旅行前既課程，我去左聽呀，不過，實在太眼瞓喇，咩都聽唔入耳，而且，個講座既步伐都有d慢，所以只去左一次（而且我都無時間再去）。

前日，去圖書館睇書，一個唔覺意俾我搵到呢本好正既書：中國浸信會神學院出版，鄭佐生著，尋找祂鄉的意義。

書裡面有齊晒我想知想問既野，好吸引，睇完知道好多唔知既野，內容唔單只講歷史、地理、宗教故事，仲介紹好多有趣既當地資訊，同好多響聖經經常出現既字眼。就算唔係教徒，當通識書黎睇，都好有趣味架﹗

不過，都唔知幾時至有機會去lu﹗

嶺南派山水畫（第十五堂畫胡姬）

唉﹗今日一開始畫就俾阿肋教嚇窒左，我只畫左一塊瓣，佢叫話唔好畫咁細喎，咁我咪以為自己畫得細囉，於是畫大d，阿老師經過又話唔好咁大，結果朵花畫到唔人唔鬼，古古怪怪。最後，畫隻大黃蜂時，塊墊底布唔平，搞到隻野有一邊翼彎左，唉﹗要畫多兩次至得喇﹗

九龍坑晨運

路人甲下左命令要我操fit d，於是，尋日一早六點幾就出發，經太和新華安里上山，行左足足1小時20分鐘不停既上山路。路人甲經常行住等我，又影我辛苦上山既樣衰狀態。我全程以龜速上山，鬼咩，足足半年無行過山，坐左咁耐，對腳都無晒力喇﹗

呢段山路係練上樓梯既好地方，上次上神山之前，路人甲都叫我上黎行番轉，預行一下，不過無時間，結果搞到今日先黎。其實之前都行過一小段架，行到去康樂園就離場喇，無今次咁甘﹗

俯瞰康樂園﹗

山上好風光，不過，一早七點幾個太陽已經好毒喇﹗

前面係粉嶺上水，山後係大陸lu﹗

呢段都路係最甘呀﹗

落山行番去元嶺，咪以為落山好舒服，條路斜到不得了，阿路人甲先生上次一條友黎呢段踩單車，係踩上山喎，哈哈，咁斜，我行上山都辛苦啦，何況踩單車上山？變態﹗

今日晨操，1小時20分鐘爬升440米高，全程12．5公里長，3小時15分鐘完成，唉﹗好差，差d俾阿路人甲肥我呀﹗聽講話下次仲甘喎，死火喇﹗

今年宜家至開操？

自從12月去完神山之後，基本上係無真正運動過，但唔運真係唔得，對大肶啫喱化，byebye肉出晒黎，於是，今日開操。

同同事食完lunch吹完水就行左去體育館個健身室做gym，13蚊一個鐘，抵玩啦﹗不過，一個鐘就算死命做都係唔多夠喉架﹗

做完之後，個太陽仲係勁一勁咁，於是行落一層去圖書館打書釘，睇書仲耐過做gym，哈，見個太陽就收工，我急急腳搏老命係咁行，身水身汗行左半個鐘。

點解要開操？路人甲下既命令，要操番起先帶我去玩，操唔起就佢自己去玩，咁，死人都操fit佢啦，有得玩喎﹗

Mrs. Chan's Cookies

上次整cookies，路人甲又呢又路，嫌三嫌四，又話幾時至有Mrs. Field's果d曲奇食。咁四出張羅，終於搵到Mrs. Field's Cookies既食譜，今日又終於可以做吓實驗睇吓個食譜得唔得，做出黎似唔似樣喇﹗

身水身汗，搞左一輪：

一個食譜既分量整到三十個，加足路人甲至愛既提子乾同朱古力粒。

路人甲一早知我今日會整cookies，因為我推左佢去游水既邀請，佢返到黎見到，無咩反應，換好衫食一件：「好似樣喎﹗有八九成似呀﹗」食完又再攞過，突然大聲講：「嘩﹗(我以為有咩唔妥啦)好好食呀﹗」

不過，我覺得甜左少少。仲有，呢d咁多牛油咁多糖既野食，其實真係唔係好想整俾路人甲食架，一d都唔健康，但係佢又鬼咁鍾意食，間唔中都要整吓交吓功課既﹗

多謝晒blog友Anita個食譜﹗

2012、it's complicated、不敗雄心、潛行凶間、CIA光碟離奇失竊案

呢兩個星期睇左五套戲，一路都唔得閒打返d紀錄添，今日終於有時間坐定定搞吓喇﹗

2012

話說瑪雅人既年歷會去到2012年12月某日(我已經唔記得左邊日喇)會終結，然後可能會重新黎過，即係話，地球會毀滅再重生。各國領袖開會決定造方舟，俾所有有錢佬同有貢獻既人上去避難，而方舟就由中國製造。

一路睇，一路覺得套戲好流，包括劇情、特技同演員，應該係一套B級片，不過，當中都有d啟發。宜家地球災難頻生，又水災又火災又地震，連大到成個國家咁大型既冰川都漂浮出海喇，地球沒日？唔好話無可能，我地咁渺小，知道幾多呀？可能唔洗等到2012，可能聽日就係喇老友，仲唔快d同老婆仔女阿媽老豆開心吓？

中國製造？哈﹗好現實喎，中國宜家係地球村既最大工廠區，而臨急臨忙話要造方舟，只有中國能做到啦，點解？我都唔識解，我一直覺得中國政府係萬能架，無野係做唔到既，當然，包括所有正面同負面野囉﹗

而有錢有命呢樣野，不嬲都係架啦，無得拗﹗咁點先係有貢獻呀？同主辦單位有交情既人咪有貢獻囉，無論地球邊個角落，無論已發展或發展中既地方，不嬲都係咁架啦，你唔覺咩？﹗

It's complicated

睇佢，係因為梅麗史翠普，我以前唔鍾意睇佢，但睇過「穿prada的惡魔後」，鍾意左，後來睇埋「Julie & Julia」，真係佩服，演咩都好得。今次佢做返自己既年紀，同老公離左婚十年，老公仔細老婆嫩，竟然覺得有壓力，仲竟然想搵返糟糠，再續前緣，賤到爆﹗佢唔諗吓當日個老婆一個帶住三個，仔女細，老婆無事業，佢無理吓對d仔女既影響，拍吓屁股就走去同個靚女結婚生仔，家陣又想玩多次同樣既劇本，哈，好多男人都係咁架，自私，係男人既專長嘛﹗

套戲入面全部都係「老人家」，但劇情好，演員演得好，香港就唔會有老細俾錢開呢d戲喇，香港人唔鍾意睇皺既皮架嘛﹗

好戲一齣，仲有唔少笑位，非常輕鬆惹人好感，似個鄰家的女孩﹗

不敗雄心invictus

講述南非黑人總統曼德拉出獄並當選總統，整個南非就係一個爛攤子，各方面都需要佢去搞掂，而佢不單止響政治上下功夫，竟然留意到要響運動上下功夫。

套戲係好inspiration，唔算有咩驚喜，但係會吸引住你睇落去。恕我孤陋寡聞，對於南非既歷史，我幾乎一無所知，只知曼德拉呢個名，連佢既事跡都係從無留心過。但戲裡面既情節話我知(我相信唔會距離現實太多)，一個坐左近三十年監既人，原諒又好，政治手段又好，無響當權既時候去報復害佢既人，真係要有好大既心胸先得。我相信，三十年裡面，佢係無白過既，可能如果無呢三十年簡簡單單既生活，曼德拉未必有此大智慧，所以，我地話既「天將降大任於斯人，必先勞其筋骨，餓其體膚」係中國人一早已有既智慧黎架﹗

睇緊既時候，俾我最大感觸既係，我地香港人，真係無果種民族意識架，回歸左十年，你問對自己既身份同對祖國既感情有無增加？我相信好多人會話有，但係去到愛國lu咩？又未喎﹗運動比賽係一種團結民心既活動，所以由乒乓球政治至世界盃，都唔淨係關報紙體育版既事，係一個國家既事。你有無試過睇女排打贏大實會開心到喊呀？有無試過響奧運時見到中國國旗升起會一齊唱國歌(不過，好多香港人都未識唱晒)，會感動流淚呢？香港人只會：「yeah﹗/ 哈﹗贏左﹗ /  good! 」或者 「哦﹗係呀，好野喎﹗」就繼續上網、睇電視、炒呢炒路，有無民族感情呀？「有。」有幾多呀？一最少十最多。「呀......三啦﹗」香港人囉﹗

Inception潛行凶間

首先，改壞名，一套咁好既戲，改個咁「行」(行貨個行呀)既中文名，唔知既以為真係行貨，唔去睇添呀﹗

「周莊夢蝶，蝶夢周莊」，中國人好耐之前已經提出左啦，鬼佬宜家至諗到呀？﹗我非常同意戲裡面果班日日黎瞓幾個鐘既人既行為，因為如果響現實世界係充滿貧困、悲哀、不滿、失望既話，去發個好夢唔係更好feel咩？係假既又好，真既又好，人生都係真真假假既混合物黎架啦，夢境係假又如何？響夢裡面活得過癮，叉叉電，開心吓，醒來又再同現實搏鬥，何樂而不為呢？如果真係有呢d瞓覺吧，一定唔會再有人鍾意take野囉，生意應該好過網吧﹗

故事既結局特意留白(個駝螺不停咁轉但又好似想停)，等觀眾自己去發揮。有人話結局仍然係夢，有人話係現實，其實係咩都好啦，主角成套戲都不斷表示自己想返屋企，想見仔女，係夢又好，係現實又好，如願以償啦。但係有人認為，發夢又點算如願呀？查實，人生都係一場夢啫，大家宜家可能係發緊第四層夢，係唔會醒架，只會死架咋，死左就會見到自己瞓左覺既樣架喇﹗

CIA光碟離奇失竊案

劇情都幾無聊，但係就係想用一件咁無聊既事去串爆美國政府同所有美國城市人，有時間響屋企度hea既話，可以一睇﹗

嶺南派山水畫(第十四堂畫雙勾竹)

上個星期老師有事，無得上。今個星期畫呢張似乎好易畫，不過d佈局都係畫得差左d。不過......當助教經過我身邊時，「吓」左一聲，然後「幾靚喎」；無幾耐，老師經過，都講左聲「真係幾靚喎，可能你畫呢d好d呀﹗」我心諗「咁係咪即係話我畫其他唔掂呀？」

老師同助教都話d色調得真係好靚不過，d葉既佈局真係爭左d，要畫多兩幅練習吓喇﹗

柴嘩嘩整老婆餅

尋日去左阿david哥屋企，諗住同d細路同埋我家姐一齊整吓老婆餅，阿肥魚係咁催佢個工人姐姐快d帶佢去david哥度，但係開始整餅時就只係搞左個粉糰就徹退左喇，阿小B呢，我要佢上晝好乖，儲夠五粒星做入場券至有得一齊整，結果佢好乖呀，所以我俾佢搞左碗粉。

原來阿david哥屋企咩工具都無，得個磅，於是，我要徒手整晒全程，好彩整出黎既效果都唔錯，只係買唔到菜油用左花生油，有少少膩既感覺啫，查蛋漿又無掃，有時查多左，個面無咁靚。

味道方面，我個人覺得，超正，同街買既一樣，而細佬個肥師奶就話正過街買既﹗路人甲仲未有時間試，不過佢奄尖到爆既，唔方話讚呀﹗

一次可以整十六個，一人一個，david哥屋企咁多人，差d唔夠分呀﹗

好耐無整既馬賽克

上次為呢張枱油上紅色，已經係N年前既事喇，而自從張枱俾路人甲糟塌到成個貓樣咁之後，我一直都想整吓佢。

結果，尋日用左六個鐘幫佢化妝。

好辛苦先搵番d用具出黎

六個鐘既成果

有新枱用

首次遊南北果洲

01/08/2010，一早六點起身，出尖沙咀舒舒服服食個早餐，九點上船，首次踏足南北果洲。

大象吸水

遠觀北果洲銀瓶崖

坐駁艇上北果洲，未上岸已見六角柱石

殼仔排似隻肥豬橫臥海上

路人甲到此一遊

大灶口崖，我好驚﹗

島上石頭開花，似足響北彊見到既奇石

月球崖及魔鬼崖

朵朵石花

海上的石棺

海上小桂林

遠觀南果洲石拱門

爬呀爬，大家一齊向山上小天后廟進發

好美麗的石紋

上到小天后廟望向北奶頂，北奶頂似隻猩猩頭

在石拱門對開的沙灘上的石珊瑚

行完石拱門再行去石室，似難民嗎？

咁靚既風帆，路人甲幾時先會買到呢？

登南果洲前，先登上駁艇穿洞去，主要睇迴流洞和三叉洞

三叉洞西面的洞口

五點尖沙咀上岸，玩足八粒鐘，盛惠$140，仲送番一本價值$58既果洲群島旅遊書，抵到呢﹗

六點佐敦開飯，好好味既客家菜，最正係個榴槤露，整日行程圓滿結束﹗