旅．狂拍

響facebook見到朋友仔去完印度，佢同行既朋友仔放左d相上去，我睇完之後同我個朋友仔講，覺得佢個朋友影人影得唔錯，黑白相果然有道助力。我個朋友仔話呢個同行朋友十二日影左萬幾張相，嘩﹗

每個人既旅遊目的都唔同，不過我就唔係幾認同去旅行狂影相。我個人覺得去到景點係要用對眼去欣賞，用對耳去享受，用皮膚去感受，用嗅覺去記憶既，如果只係狂拍，就會忽略左其他野，而且，影相係要通過思想先至可以按個快門既，亂影，總有一張似樣既相出到黎架，不過，佢根本就係影相既人亂踫亂撞咁得番黎既，無左種「得到」既感覺。

如果以前，有人狂影而到得一張靚相，我會話「佢真有錢」；如果宜家，有人狂影而得到一張靚相，我會話「佢技術好屎」。

哈﹗可能我得罪緊你，不過其實我係唔識影相架，he﹗

灣仔半天遊

灣仔真係行唔少，但係今次呢度真係未去過。

我同路人甲由灣仔峽行條超斜既斜路上寶雲道，就開始今次未行過既路段喇﹗

沿住條健身道行，好快就行到去姻緣石喇﹗要行一段樓梯至上到去舊石度，樓梯口就見到呢個紅卜卜風車喇﹗

山上既姻緣石掛滿晒祈福既野。

石與石之間形成一個出口，寫住「出入平安」，幾搞笑喎﹗

寶雲道除左狗殺手出名之外，仲有香港最早期既其中一座界石。

行完左寶雲道，繼續落山，行到去跑馬地，d屋咁先叫豪宅嘛﹗睇吓d車房幾懷舊﹗

再由跑馬地叮叮總站坐去筲箕灣，車程一個鐘，超hea﹗返到屋企，叨姐夫光，食左d $25一個既貴價cup cake，睇見都知好食啦﹗

 

深圳兩日遊

星期一、二本來約好同事去華僑城，但同事唔想過夜，有d同事又唔想太趕，結果華僑城變左羅湖城。

星期二一早十點，約好響上水火車站等。第一站：聖淘沙按摩。我好少上深圳按摩，基本上都好少上深圳，因為好多年前返去買野俾人偷左響歐洲新買返黎既銀包嫌裡面既幾千蚊，所以我認為佢係一個罪惡之城，無咩事都唔好去。

講番按摩，今次做左兩個鐘大堂服務(我揀左按肩)，再兩個鐘全身按摩(按香薰油)，只係人仔158蚊+tips，我覺得好平囉﹗

按完都四點幾，肚又餓，坐的士去左東門附近既愛國路既巴蜀國食川菜，唔錯，好食又平，我地叫餸叫到好似唔洗找數咁，都係每位人仔74蚊。

食完打道回府，快過由旺角返屋企。

星期三晚，又約左個朋友去大劇院站萬象城對面有間叫品村既日本餐廳食飯。人仔148任食任叫，基本上係中日菜、甜品、冷熱菜......好多菜式，食到食唔落，而且係又抵又好食，正﹗

魚生就梗唔少得啦﹗淨係下面呢三樣野都回本啦﹗

呢個星期打破晒紀錄，一星期返左三次深圳，三次都好enjoy架﹗

 

歲月神偷．永利街

記得某日同路人甲又響中上環浮游既時候，行左入永利街，好似發現左新大陸一樣，唔捨得走。當日詳情

呢兩日聽見「歲月神偷」係響呢度拍，仲攞左獎，真開心﹗

我呢條係老餅蛇黎既，d舊野就最鍾意，好似尖沙咀個香港歷史博物館，我就最鍾意去，第一次去既時候，好似去左遊樂場咁，開心過d細路。哈哈﹗我連去到澳門都行佢個澳門歷史博物館行到唔捨得走架﹗

最搞笑係，蛇老豆（David哥，七十有五）細個時住荷理活道，佢老豆（即係我阿爺）響上環有成條街（幾巴閉，可惜打仗咩都無晒，所以我仍然係條窮蛇，烏～～～），我就叫佢帶我去睇，雖然滄海桑田，但係都係好過癮﹗

當然啦，我屋企d老人家講舊屎d野，我就最留心聽架喇﹗

呢齣戲就算唔攞獎我都諗住睇架喇，不過都係唔入戲院睇囉﹗

入冬最凍去行山

天文台話年初六呢日係入冬以來最凍既一日，但係我同路人甲就約好晒人去行山。

本來係上八仙嶺既，但係又落雨又凍，上去真係博大霧咩，結果由大尾督行八仙嶺後面去鶴藪，行左七個鐘，成身汗。

今日係入冬以來最暖就真。

響尤德亭遠眺深圳。

無景，唯有影吓水珠呀，花呀，草呀……

日本種杜鵑

fern，香港好少地方有咁多咁大又生得咁直既fern架

近鏡既fern

水珠落響fungus上面，好靚，不過位置好唔就手，影唔到佢個靚樣添

呢種貌似加左花奶既啫哩杯花花，唔知叫咩名呢？

南涌河

霧中八仙嶺

行左七個鐘，跟住食個「叫餸食飯」，暖晒﹗

出街暖過響屋企

屋企個室內溫度計一直都顯示響九度至十度之間。年初四，落雨又凍，留響屋企做吓d未做又要做既野，凍到一隻野咁。

年初五，見無落雨，路人甲提議返深圳書城。舊果個我去過，佢諗住帶我去新果個。

坐地鐵去到少年宮站，D出口，個書城就響側邊。

呢度有d好好既免費locker，自助既，好方便，唔知點解香港無呢。

步驟一：按「存」掣

步驟二：取有bar code既票 （取回物件時就把票上的bar code放響紅色既燈位上，門就會打開，每張票只用一次）

步驟三：locker門會自動打開，存好物件後關好門，就可以離開喇。

d書平過香港好多，平均三十蚊人仔一本，所以我同路人甲都買左唔少呀﹗

除左書，仲買左DVD同CD。

去書城之前，路人甲仲帶我去買單車頭盔同單車袋，天氣好番d就可以去踩單車lu。

初三赤口

又凍又落雨，本來去既wild camp，踩既單車，通通慳番，唯有留家消遣。消遣一，打blog：

入完camp，年三十晚當然係去食團年飯。

年初一，大休。行左過去許願樹散吓步。

年初二，同阿爸阿媽拜年，陪阿媽打麻雀，一年先打一次，連最基本既野都唔記得晒﹗再去同路人甲屋企人拜年。一日就係咁走黎走去。

年初三，陪路人甲同d舊同學拜年。原本plan左去南Y島，但天氣關係，改去飲茶再去志蓮淨苑同南蓮園池，再去食飯。

咁既天氣過年真係唔好玩呀﹗

 

虎年玩多d

又凍又落雨，本來打算去既wild camp同要踩既單車，通通都慳番喇﹗留家消費，打吓blog先：

年廿八一放工就入左camp喇，地點係西貢戶外康樂中心，政府營地，非常抵玩。

屋企人一早入左camp，玩左好多野，我入到去就已經燒緊野食喇。

$35一位，食物好ok喎，仲可以自己帶d野食入去燒添。

呢日係姐夫生日，燒完野食再食生日蛋糕。

第二朝，一早食完早餐就開始玩喇﹗足球機......(模特兒：姨甥仔)

美式桌球......(模特兒：姐夫)

攀石......(模特兒：姨甥仔)

仲有假扮蜥蝪中既家姐

打羽毛球......(模特兒：阿爸)

唱k......(模特兒：我阿爸阿媽)

穿珠仔......(模特兒：姪仔)

我既製成品，戒指

踩單車......(模特兒：姪仔姨甥仔)

收縮膠製作，呢d我整既

氣墊球......(模特兒：姨甥女姨甥仔)

第三朝，再打過，英式桌球......(模特兒：細佬姐夫)

踩roller......(模特兒：姪仔)

射箭......(模特兒：弟婦姐夫家姐姨甥女阿媽阿爸)

仲有籃球呀，繩網呀，兒童遊戲室呀......

玩足三日，借宿兩晚，食足六餐，盛惠每人二百幾。交左咁耐稅，終於都用番少少喇﹗

祝大家虎年龍精虎猛，身體健康，事事如意﹗