早一個星期，被臨時拉伕通知要去埋中一個訓練營，我當然無所謂啦，尤其是呢個訓練營，有盡責嘅導師、有緊湊嘅活動、有郊外、有藍天、仲有得行吓山，結果，前兩日就入咗營喇﹗
響營入面遇到兩個人，都令我有驚喜。一個係舊朋友仔，以為都唔會有咩機會會再見，竟然又見面，雖然大家都忙著做自己野，幾乎無傾過計，但係知道佢嘅新去向係一個踏實嘅計劃，都放心d，因為之前聽佢講會去讀書，但係又響個camp度遇到佢，即是無讀啦。希望佢今次真係搵到一份自己鍾意嘅又比較穩定嘅又有發展嘅工作啦。我始終覺得廿幾歲仲part-time咁返工，唔係幾好。雖然我同佢唔係太熟，但係佢點都係好得我鍾意嘅朋友仔之一，所以真係希望佢嘅發展會好d啦﹗
另一個係個十四歲嘅小朋友，但係佢唔係我d學生，佢係果度d導師trainee，非常幸運嘅一個小朋友。佢本來係個好差嘅學生，但響機緣巧合之下認識一位好好嘅madam，仲介紹佢入呢間訓練中心返學，唔洗再響學校度浪費生命。而家見佢好積極，擔擔抬抬都肯做，做事亦好認真有禮，我相信佢嘅轉變非常大。最得意嘅地方係，佢響學生面前，真係好似一個導師，但係佢只係大d學生一年，佢響我地面前就十足一個細路，非常可愛，成隻bear咁得意。佢真係一個好幸運嘅人，因為響我間學校裡面好似佢咁差嘅有成籮，但係佢地有d唔俾人幫，有d無人幫，有d人影都唔見埋，而呢位小朋友有咁好嘅際遇，應該要珍惜。我見佢都真係好珍惜而家嘅野呀，希望佢有好好嘅前途啦﹗
沒有留言:
張貼留言