今日好多事

今日放學時，我留左四個學生溫書，聽日考數學同地理。d學生落到黎，見到教佢地數學嘅後生仔，就問佢攞練習做，後生仔就攞左一份俾佢地，教左佢地兩分鐘，就返入教員室。我又跟住佢入去，諗住飲啖水啦，佢就話我知，佢去DT室，如果學生想問佢攞番個電話，就去DT室搵佢。

我：「不如你同埋佢地四個去DT室啦，佢地唔識可以問你嘛。」

H：「我驚佢地周圍走喎。」

我：「周圍走？DT室裡面喎？你響度架喎？﹗」

H：「我驚我教緊數時睇無到佢地咁多喎﹗」

我：「.....(心有D疑惑：H好似淨係教呢班咋喎....)如果佢地唔識，我唔係好識教佢地架。」

H：「我俾左份答案佢地喇。」

後來，我出去睇班學生溫習，點知佢地已經張份練習做完，咁當然係抄啦。我話佢地唔應該抄，佢地話唔識，阿SIR又走左，都無人問，咪抄囉﹗咁我唯有教佢地啦，真係識幾多教幾多架咋﹗

後來，我中途要見家長，D學生猛話溫好地理想早D走，我話我會上黎放佢地走，真係溫嘅，就可以12點走。結果，當我響12:20上黎諗住放D學生走時，我發現學生已全部俾H放走晒。H話D學生實牙實齒話我俾佢地12點走。點解連老師都咁單純，學生話咩佢都信呢？點解自己班嘅學生唔識做數，佢竟然唔肯教佢地，而走去教第二D學生呢？我真係好慶，下晝時，我張件事話番俾佢聽，佢竟然話D學生好抄數，要鬧佢地﹗哈﹗.......

後來，校長又因為一件事，無理地責怪中文阿頭，令佢情緒十分激動咁離開左學校，大家都好擔心佢會唔會有事，結果原來中文阿頭返左屋企。我同幾個同事就諗住去安慰佢啦。我拾好野後，就一條氣走去校長室藉詞請假早D走去探果位同事，實情就鬧左佢一餐。有D同事話我唔應該去鬧佢，我就覺得我鬧得佢起，有咩後果我都受得起，亦唔會令件事繁雜化，唔會令中文阿頭唔舒服，係D同事諗得繁雜左啫﹗我真係覺得我應該做，咪去做囉﹗小食部同午餐盒嘅事其實已經令我覺得校長好無公義，宜家仲要咁樣對D同事，實在要爆喇﹗