與家人遊台灣(第四天)

21/8/2013
本來櫻悅既晚上係可以睇到滿天星星，而我地間房係可以睇到日出既，但天氣唔好(一般黎講，台北既天氣都係麻麻地，宜蘭縣呢面會好d)，咩都冇得睇﹗

今日要轉房，因為訂房時四人房已俾人訂左，但其實後來知道由於打風，成間民宿得返我地一家人，其他房都退晒喇﹗不過，錢都一早俾晒，換吓環境囉﹗
食完早餐又響民宿影吓相至去玩。

因為打風，我地本來訂左果架八人車都取消左唔用，打風都去唔得遠，所以只透過民宿訂左一架六人的士，租四個小時出TWD1500)。
十一點出發，半個鐘頭後黎到一間台灣出晒名又攞埋獎既酒廠(噶瑪蘭單一麥芽威士忌)參觀。呢度係司機提議既，主要只係揾個室內既地方消磨吓時間，本來以為係d土炮酒廠，點知原來好大間，仲好有規模，而且免費。

可惜行完之後想去免費試酒時，政府宣布停工停課，無得試。

唯有去埋酒廠既蘭花園參觀，但大家對一d買唔到返屋企既植物無乜興趣，所以好快就走左喇﹗

十二點九，司機車我地去左宜蘭市一條小巷食麻醬麵，都唔錯。食完後，司機接到我地，大家諗住去下一個目的地---食蛋糕(司機介紹既)，但司機開左車一分鐘都唔夠就落左車去買野食，老媽就話司機宜家至黎買野食，我地食野果時又唔食埋，我就話可能司機係買黎請我地食架，姐夫懷疑邊有咁好。果然，司機係因為見到果檔平時排晒長龍既紅棗紅豆餅未收檔又無人排隊，所以落車買黎請我地食，真好人﹗(個餅真係好味架，不過唔記得影相)

一點三，大家仲未食飽，一心黎間cafe之類既野再食，點知原來係間蛋糕工場(亞典蛋糕密碼館)。我地行左一個圈，不斷試食，然後買左最出名既年輪蛋糕同兩個其他蛋糕，坐低飲住工場免費任飲既咖啡，食住蛋糕，正呀﹗

食飽晒，外面仲係落住大雨，我地架車又夠鐘，所以都係返民宿喇﹗

一返到去，攞左兩間新房，又係一大驚喜，同website既相一樣架，好大好靚，大家又狂影一輪﹗
最好笑係阿姨甥仔一入到房就大叫：「多謝Daddy﹗」

四點，大家玩完十輪，落去樓下同老細泡茶。因為呢度本來係種茶既，老細個老豆係茶農，老細後來開左呢間民宿，所以佢地都賣好多茶葉架﹗
我地同老細泡足兩粒鐘茶，佢泡晒所有茶種俾我地飲，超好人。

六點半，又食飯喇，都係響民宿度食。
今晚落雨，食飽飯無得出去玩，我同家姐傾吓行程，之後浸吓浴，佢地玩吓大富翁，十一點就瞓喇﹗
雖然話打風，但其實我地住呢度都唔係好感受到，只係落左半日大雨，同埋夜晚大風左少少咁咋﹗