印度的第三天--Varanasi

2/11/2012
0910，火車到達Varanasi，尋晚雖然係第一晚瞓火車，但一d都無唔慣，仲瞓得好好，十點已經瞓著，今朝六點就醒左喇，一直瞓響度等火車埋站(因為我瞓中層，要等下層既人起身至可以落去坐)。
我地坐左上一架tuktuk車，佢企圖游說我地去佢介紹果d hostel，但我地堅決要去返自己果間，咁佢就話我地果間tuktuk車唔入得，落左車要行十幾分鐘。我地落左車之後，好彩有個途人帶路，否則都真係幾難揾架﹗我地住響恒河邊，d巷仔多到好似迷宮咁。
我地十點去到hostel，但未有房，於是上去佢個roof top restaurant食早餐，view 好(就響恒河旁)，野食亦唔錯﹗

呢間guesthouse都裝飾得好靚架﹗

間房都好有特色


settle down又book好左boat trip同埋去sarnath既車(其實兩樣都唔洗book架，不過我地唔知點解book左，可能覺得唔太貴又費事煩啦)，成一點至出去沿住恒河d祭壇(ghat)行吓。我地由hostel(近Dasashwarnedh ghat)向Panchganga Ghat方向行。響街上間唔中都會見到呢d holy man。

周圍都係巷仔，不過只要知道邊個方向係河邊就唔難去你要去既地方，而且d路人都好好人架。

我估成個印度最興旺既零售業一定係呢類布鋪。


我地行到去Manikaranika Ghat，睇左好耐，睇人燒屍，我地坐左響藍色帳篷果度，咁啱有個阿伯坐響我隔離，原來佢係呢個燒屍場既話事人，同我地講左好多關於燒屍既野，又帶我地行左去後面果幾座停屍間既屋，又上去天台俾我地影相(呢個範圍唔俾影相，尤其是會影到條屍既地方)，又帶我地行到好埋去睇燒屍。開頭以為佢會收我地錢，點知又無喎，只係叫我地俾錢幫個無錢葬老公既女人，但一定要我地一俾就俾Rs600(每人)，我覺得一黎我唔知我係咪幫緊個女人，二黎幫人都限我俾幾多好唔like，所以我堅決唔俾。

從其中一座停屍間既天台影落去

尖頂果幾間都係停屍間，呢度每日燒二百幾條屍，唔會因為日落而停工，全日運作，後來我地響一間小店飲lassi(就係LP介紹果間blue lassi)時，見到d人不斷經過店前條巷枱屍去燒，非常頻繁，條屍同我擦身而過，都幾特別架﹗

呢個著白色衫既男仔就係剛剃頭負責做送親人一程既崗位(好似我地中國人負責「擔幡買水」果位咁)


後來三點幾行到去Sindhia Ghat，見一大班男人向河邊湧去，當然跟去睇吓啦，原來係沖涼時間。

幾多垃圾佢地都唔介意，因為呢條係聖河嘛。

行到去Panchganga Ghat附近，見到有好多捕魚桿呀﹗

之後行左上去Dharhara Mosque，一間唔係好大既廟，無咩特別。

五點左右，我地行左返去hostel(紅色果間)，飲左杯lassi，先至行過去睇祈禱會

六點幾就開始祈禱儀式，我地去到時已經人山人海，但估唔到最靚既位竟然無人坐，我膽粗粗走埋去問人可唔可以坐，收唔收錢，竟然咁正中既位係可以坐但唔收錢喎，當然坐低啦﹗

其實成個儀式似場表演多d。

大約一個鐘左右就完左個儀式喇，成個鐘都係睇幾個企響祭壇上面既靚仔(唔知係咪揀過既，幾個都特別靚仔架)，攞下呢樣搖吓，拎吓果樣轉吓。完場時，主持人每講一小段野，d人就舉晒手歡呼，好high架﹗

温馨提示：

1. Delhi--Varanasi 758km，坐火車約需14小時
2. 住Ganpati guesthouse Rs1000一晚雙人房
3. 在印度，無論早午晚餐，人均消費都係大約Rs100-Rs200 (HKD15-30)

芝士果仁紅莓卷包

用基本方法預備好麵糰，再將麵糰切開四份，每份轆成長方形，鋪上芝士果仁紅莓，卷起，切開四份，發酵十分鐘，塗上蛋漿。
放入二百度焗爐焗約十五分鐘。

大陸人

其實唔係話要歧視大陸人呀，但係有時文化差異真係令我有少少唔明白佢地既行為架﹗舉下例啦：
星期六晚我去左赤徑宿營，有一個自稱「北京大學」既團體都係當晚入住。晚飯時間，我響廚房預備緊(三個團體各自用緊三個洗滌盆)，我切左一大堆菜後，放左把刀響個洗滌盆枱面(當時枱面仲有一d用具，個狀態係「用緊，未拾枱架」)，然後我攞左d菜出去廚房外既飯堂，又響雪櫃度攞左另一d材料入廚房，所用時間可能只係一兩分鐘，但當我返到廚房時，把刀已經唔見左，好彩我要切既野已經切完。後來，我見一位大陸阿姐用緊我果把刀。其實，可能佢以為我已經用完，離開左廚房，但當我返入廚房之後，佢地又無話還返把刀俾我，又無同我講聲「唔好意思」喎。
行緊山時，我行左出一舊響山邊既石上面影風景，有兩位操普通話既阿姐路過想影相，其中一位行過黎我身邊講「可以借過嗎？」第一、我未影完，你可以等一陣嗎？周圍又無人同你爭個位。第二、我當然可以讓個位俾你，但你唔洗行咁埋，我腳下無路架大佬﹗行左半日山，聽得最多係普通話，而一般迎面而來，三五知己橫霸一條行人路又唔讓路俾你(好多時候我都係一個人行緊架)，要你一係停低，一係行出行人路讓佢地既，就係呢d人喇。
結論係：可能佢地唔霸就無生存空間架喇﹗

Nothing Impossible…印度 (New Delhi)

 

呢兩個月比較忙，忙住去旅行，去左十二日四川同二十三日印度，然後返港病左個幾星期，所有野都停晒。呢個blog，四月既秘魯都未寫完，又要寫四川同印度，真係有排寫呀﹗
想去印度已經係好耐之前既事，唔係因為「潮」，只係因為想知道真既印度係點既。
31/10/2012
下晝兩點幾機，結果delay左少少，但卻準時到達北京機場。點解要去北京？只因為買左應該係最平既飛印度New Delhi機票，就係國航既機票，所以要飛上北京再落印度。北京機場非常大，行到腳軟都未行到去轉機既counter，另外，北京個轉機入境counter超低B，位置好差，迫到無朋友。
響北京又係遲左起飛但準時到達New Delhi。
1/11/2012
零晨兩點，(New Delhi好大霧，之後都係好大霧)book左個司機黎接機(後來至知間hostel收貴左我地好多的士錢)，去到hostel瞓得已經三點幾喇﹗
我地住既呢間hotel Namaskar真係好似d時租酒店。




第二朝check out左之後，去左附近既main bazar既pahar ganj食早餐(Dosa, masala tea)

之後坐tuktuk去red fort，估唔到咁快就已經遇到影相黨，響呢度我同超過一百個印度人影相，厲害呀﹗

行左三粒鐘，後來去過第二d fort至發現呢個fort唔係好靚﹗
行完後，去左飲lassi，好飽，街頭既建築都好靚。

之後就行過去Jama Masjid，好似我以前去過巴基斯坦果間，但呢間細好多。走果陣仲有個阿叔話要我地件袍既錢，當然唔俾啦，入去果陣都無話要收錢。

我地沿門前既bazar行，行左一陣都覺得無咩野睇，於是早少少返去，去火車站睇吓咩情況。果然如黎過既朋友所講，真係有d火車站既人老點你去唔知邊度搞過張火車票，但係我地上左二樓去tourist information counter問，原來真係攞住張eticket就可以上車架喇﹗火車車身會貼左乘客名單，響訂左既位既車卡就會揾到自己個名架喇﹗我地返Hostel攞行李(好近，隔離街)再去火車站，響火車站影左一陣，火車好準時1855開車。等緊上車時，我響月台見有香蕉賣，打算買少少，點知有個肥仔乘客行過黎同個檔主講左一大堆野，之後就話我唔洗俾錢喇，但係佢又唔係請我食喎，即係個檔主請我食啦(其實到宜家我都搞唔清係邊個請我食架﹗)

有用資料：
1. 香港--北京  2小時30分鐘；北京--New Delhi  7小時
2. New Delhi機場去市中心大約30分鐘
3. 港幣兌印度盧比：$15.1:100Rs
4. 印度慢香港2小時30分鐘
5. 印度人對膚色比佢地白晳既亞洲人好有興趣，會好想同你影張相，如果可以就影啦佢，佢地都好Nice架﹗
6. Red Fort  Rs25；Jama Masjid  Rs300
7. New Delhi--Varanasi火車票   Rs1250  2nd Class；side upper or side lower會比較好，唔洗等人瞓至可以瞓
8. Hotel Namaskar  Rs550一晚一間雙人房
9. 印度既hostel好多雙人房都係雙人床，如果要瞓twin room就要睇清楚喇﹗

自家製麵包(不用麵包機)

舊年買左本麵包書，就整過幾次，幾次都好成功。
我無麵包機，因為屋企無地方放，而且唔會成日整，仲有係d好既麵包機都好貴﹗
呢幾個麵包都係基於一個方法做，只係有唔同既變化啫﹗

餐包

腸仔包

芝士火腿包

基本麵團製法：
1. 將2克酵母溶於温水內及拌勻，待十分鐘。
2. 將完全溶解的酵母水加入所有材料內(高筋麵粉130克、鹽1克、糖15克、蛋12克)。
3. 用手在盤內搓成粉糰，搓至麵糰光滑。
4. 放入10克牛油，繼續搓揉粉糰，直至拉開粉糰時出現薄膜。
5. 用手推圓麵糰。放在盆內蓋上保鮮紙發酵(當室温26-30度時，時間約45分鐘，如在冬天，可用蒸的方法，但放入粉糰後便熄火)，直至發至兩倍大。
6. 用搥打方法按粉糰三四次，將粉糰的空氣排出。
7. 將粉糰分割後再次搓圓，用保紙包好靜放10分鐘。