廣州四日遊之一

好多年無響香港過聖誕，今年都係要出去行一行，唔去得遠，返廣州都係一個我幾喜歡既目的地。
23/12/2011
響香港hea到十點至出發，上到深圳坐和諧號，十分方便，去到廣州都只係十二點半，其實可以再早D架，不過我地嘆慢板啫﹗等車期間，仲join左7日連鎖酒店做左會員，因為本身我地都諗住會住呢類酒店既﹗
一到廣州東站，就不斷向南行，一路都唔覺有野食，於是行到天河北路，只好走入間人和連鎖快餐，求其食個飯，唉﹗咁就無左一個食野既quota喇。所謂食在廣州，上黎廣州當然係想食好野啦﹗
食完之後行左去天河體育館，竟然有展銷會，個場地大過香港果個。

好長既腸，不過，我唔敢買。

好驚嚇既臘肉

然後，我地坐地鐵(一個站)去珠江新城站，目的地係廣東省博物館。

其實裡面好多野睇，但係我地太晏至去到，行到五點收館，我地都未行晒，唯有等下次黎既時候再行埋未行既部分啦﹗

之後響附近影吓相：

廣州電視塔(小蠻腰)

IFC

廣州大劇院

天黑之後，我地去左博物館後面間炳勝食晚飯，一行到去門口，真係有果種門高狗大既感覺。

(我好喜歡呢張石磨枱，好型，可惜買唔到﹗)

諗住豪就豪一餐啦，點知，價錢一d都唔貴，食物仲好得，而我最喜歡佢既係每張枱之間既距離都好遠，根本聽唔到隔離枱講咩。

我地叫左四個餸：南瓜蒸蘿蔔乾爽肉Y48，爽肉真係好爽同埋好入味﹗

東坡肉Y12.8，正過我響杭州食果次果d(其實果次已經好好食架喇﹗)，d肥膏入口即溶，真係第一次感受到呀﹗
豬肉魚頭炆水鬼重Y39，水鬼重即係豆腐，但呢隻豆腐好滑，滑到路人甲都讚口不絶﹗

另外一個係咸骨筒胡椒大芥菜Y38，夠晒味﹗
食得好滿足又飽到不得了之後，我地就坐地鐵去農講所站，但其實因為個地圖唔清楚，應該係去公園前站既，行左一大輪，終於揾到起義路間7日連鎖酒店，呢間響旺區，今日又係星期五，所以貴d，Y267一間房，唔係好大，不過乾淨整齊，張床夠大又舒服囉﹗