忙中取樂

星期六，下畫就已經返左娘家，同阿媽老豆食個靚飯，然後陪兩位老人家去街市買餸，準備夜晚一屋十幾人一齊打B爐。放假喎，又唔係賣身，梗係唔返學校做野啦。

星期日，瞓到自然醒，然後響屋企hea（本年我最喜愛活動得獎者），lunch時，旅伴買埋外賣過黎我個蛇竇上網揀聖誕節旅行既hostel，又傾吓行程。一個愉快既假日。放假喎，又唔係賣身，梗係唔返學校做野啦。

星期一，響學校做到夜晚九點九至走，唔係有咩function，而係d野未做完，又要預備上堂d野，不過，大家做吓又講兩句笑，一室中文人，三分二仍死守中文房，雖苦亦樂﹗

星期二，學校活動日，適逢我被通知要去抽做陪審員，所以一早請左假，結果抽唔中，無理由返學架，於是......去左做body check，響sogo大出血，再去焗油，本來做埋facial至返歸，但book唔到，結果去左買餸返屋企煮飯（呢個動作，自從重返中文科之後就無做過喇），再租多隻blu-ray......完美假期﹗

星期三，飲過孟婆茶，放左工就唔會再諗學校野喇﹗（yeah！今日七點前走左；死﹗聽日點算呢？﹗唉﹗孟婆d茶真係要落重d料呀～～～～﹗）

題外話：宜家d後生仔真係好鬼離譜，做陪審員都遲到。個法庭書記唔知係有心定係無意，抽籤時，抽中既五個之中有兩個都係呢d人。守時咁簡單都做唔到，宜家學校d品德教育係咪有d問題呢？不過，話時話啦，連有d老師都係咁，唔守時無責任感，又點教學生呢？﹗好似當值咁吖，同我一齊當值個位老師開頭就唔到，後來就到左等如無到，一到達就企左響無咩學生個邊，d學生嘈呀玩呀，就我一條友管晒，打鐘上堂喇，我趕鬼晒d學生入課室時，佢就出現喇，仲企響個閉路電視鏡頭前面，方死樓下control度個位老師睇佢唔到咁﹗唉﹗