贏左「旅遊寫作比賽」

前一排見個旅遊網HKcities同間飲品公司(解渴誌)搞左個「遊記寫作比賽」，於是將以前寫落個d post上去，點知贏左個優異獎。

頒獎禮響一間尖沙咀既餐廳舉行，非常咁蚊型，仲俾我見識到咩叫唔專業：網主致詞講到俾個司儀cut左，只因網主講到dead air左十幾廿秒唔識收科，應該係個電車男；間PR公司響頒獎禮早四日至email黎通知我，要我響24小時之內覆佢出唔出席；頒獎俾我時，連我個名都唔識讀，點解唔問左我先呢；頒完獎，一片混亂，差d我就走左連禮物都唔知要拎，不過，結果都係攞少左本書，d工作人員唔知做咩既；於是我email問番點攞番份禮物(本書)啦，個pr答我：「乜你無攞咩，我地俾晒得獎者lu喎，我地問吓贊助者介唔介意送多本啦。」哈﹗乜份禮物唔係有本書架咩，佢地送錯書俾第二個，安排混亂，竟然要我去承擔，咩公司黎架？﹗

再加上，得獎個篇係我覺得最普通個篇，都唔知點解﹗d頒獎人又鍾意當d得獎者企晒出黎之後講d：高下立見、呼之欲出、眾望所歸......，佢地知唔知自己講咩架？﹗仲有，我唔係黎選港姐呀，真係有史以黎出席得最唔like既頒獎禮，全場最黑面既得獎者應該係我喇﹗

都話我難服侍架啦﹗