今天我這區只有八度，但明天要帶學生入camp，首先去一個超級空曠的營地活動，然後再上施樂園借宿一宵。施樂園位處大帽山接近頂點處，今天有沒血性的同事竟然笑著說：「你地就好啦，可以official leave去大帽山睇結霜﹗」我面上只能展現一個很開心的笑容，再加一句：「哈...哈...你係咪人黎架﹗」
話雖如此，我其實很喜歡與學生去camp，雖然有許多人覺得這是苦差，但對於我而言，要與那些虛偽，亂用權力，禿頭，皮囊打摺的人士打交道，免強展現燦爛笑容的差事才是苦差呢﹗跟少年人一起怎也會比與那些穿起臭皮囊的老狐狸一起開心吧﹗
當然，亦有很多人喜歡接近這堆打摺皮囊、禿頭皮囊、笑著罵人的皮囊、拿著雞毛當令箭的皮囊、自我中心的皮囊，只因這些都是擁有權力(他們自以為是啦)的皮囊。
【明報專訊】「貓也重情，不比人差。」福建福州市一隻母貓過馬路時被車撞死，另一隻公貓見狀後趴在母貓的屍體上拚命地撫摸和哀號，在馬路中央久久不願離去，此情此景也讓不少路人感到心酸。
馬路嬉戲不幸遭車撞
《海峽都市報》報道，前日下午1時，福州市三利花園附近有2隻貓在馬路邊嬉戲，一輛私家車突然開過，將母貓撞倒在路中。公貓發現後，像箭一般撲到母貓身上，先用爪子一遍又一遍地撫摸母貓，就像醫生急救一樣，但做了10幾分鐘母貓都沒反應，公貓其後還試過3、4種方式，都無法令母貓醒過來。
最後公貓絕望了，只能發出一聲淒慘的叫聲，然後就趴在母貓身上哀號，約在一小時後，公貓才起身一步一步慢慢走遠，在圍觀的女市民中，不少眼帶淚光，更有人感嘆，貓也重情，不比人差。
看過這篇報導，會想起一些爭產的人，或一些不孝子女，他們也許不能感受到公貓那份哀痛，因為他們在父母離世之後，可能會立即鬆一口氣，冷冷的說一句：「終於都死喇﹗」；或者冷淡的轉身離去，讓護士給死者打包，然後急急的跑往律師樓去辦好承受那份遺產的手續；又或者在死者病床前已經冷言冷語，與兄弟間你爭我奪了。還會有撫屍？哀哭？傷痛？
人情有時真的比動物單純的感情更冷漠，我們的表現會比動物更冷血，只因我們的感情複雜，也滲入太多計算了。
原來餐春茗d費用有一d係用黎請d校工同TA既，所以就算我要去CAMP，出席唔到，都要俾一舊水，本來都無咩問題，問題係我宜家請人食飯，我都唔知，無人問過我願唔願意(雖然大部分老師都應該會願意，但都要事先知會一聲嘛)，要俾錢先話你知「你請埋阿邊個邊個食呀」，仲要必須出席，唔係因為公事而缺席既都要俾足兩舊水，響度做，真高興。
如果根據校工幫老師做左成年野，老師要請校工食飯既理念，d校董校監係咪應該要請我地呢班前線同工食飯呢？﹗
呀，我決定抄佢條喬，叫晒d輔導組老師同輔導阿頭去食飯，埋單先話係阿頭請食飯，要佢俾錢﹗哈﹗講下姐，我未有咁無賴呀﹗
今年我班共有三個班主任，呢個時候又係入conduct分同寫comment既時間喇，於是，星期一我同同事C話上學期佢負責寫，因為佢教主科，我同另一個剛剛放完產假既同事N就下學期先寫(我地都係教半班，同堂數好少)，當時同事C沒有提出反對，我仲同佢講多次個決定，然後話「就咁話啦」。
今日同事N同佢講話自己放左產假，對D學生唔係咁認識，佢問同事C今次同事C同我一人一半寫成績表得唔得，下學期就同事N自己寫晒。咁同事C又唔話俾同事N知已經應承左我，於是同事N話我知佢地咁樣溝通過囉﹗我話我地本來既決定唔係咁，佢就再同同事C講啦，結果同事C話自己一個人寫唔到一班既comment，話唔可以自己一個人寫。哈，24個學生都話寫唔到，以前四十幾人一班得一個班主任既年代唔知佢點生存呢？﹗
於是，我直接問佢啦，佢話無應承過我佢會寫晒一班既comment，佢以為我係話佢負責寫conduct。咁好啦，誤會左都解釋到啦，但係同事C教我班主科，同事N教得幾堂，有咩理由要人地寫一個學期既comment呢？同事C仲話：「我無迫同事N架﹗咁，今個學期我同你一人寫一半囉，下個學期我地三個一齊寫囉﹗」(妖﹗三個人寫？一人寫八個學生呀？洗唔洗分得咁清呀？)我話：「我唔會同你一半，就算你寫上學期，我一個人寫下學期，我都唔洗同事N一條友寫晒一班。」結果，同事C好唔願意咁話自己一個人寫晒一班，我就寫下學期。
係呀﹗我死都唔俾佢搵人著數呀﹗寫得點多都係得個24個學生，有幾多野呀？﹗慌死會做死咁，仲要喊，係呀，喊下就人人都以為我蝦佢啦，仲好呀，等全世界都以為我好惡，唔敢蝦我添呀﹗
大佬，叫佢幫下我手，下下都計住晒，叫佢代我監一節半個鐘既考節，都要用班主任堂黎同佢換，我以往兩個鐘兩個鐘咁去安慰佢呀，唔知好唔好收番佢錢呢？
唉﹗其他同事就幫佢解釋話佢轉數慢，聽唔清楚我講野，唔明白我既意思，唔係想搵人著數...........咁返屋企湊仔啦，出黎做野無人得閒等你轉得咁慢架﹗妖﹗
**呢個同事C唔同上一篇既同事C架。
同事c升職升到以為自己係皇帝，又想繼續升，又唔想做。阿二老細本來同佢好friend(因為唔知佢d手段嘛)，聽講私底下同佢協議好，俾條路佢升多一級，結果當然係同事c嫌多野做。於是佢嘅做法係：分晒所有野俾under佢嘅同事做，自己就有一個名不副實嘅i/c虛名，一條好好嘅升職路。
所有under佢嘅同事都做到媽媽聲，結果其中一位去同二老細細說前因後果。與此同時，同事c自己身為負責人，但要讀嘅課程自己唔去讀，叫晒自己d組員去讀，一副「我都唔識架喎﹗你唔識呀？去讀書啦，你要做嘛」，對外嘅文件又唔寫自己名，變相要組員負責晒，仲去同人地個panel head投訴，話果位同事唔肯做野。最頂癮嘅係，同事c又出眼淚喇，俾佢搞到做到死果d，篤晒背脊果d都未喊，真係唔知就以為佢好可憐﹗知就覺得簡直係妖.....
四個朋友，四種不同的經歷，四種不同的想法，各有得失，誰的結局最好並不重要，重要的是誰會開心﹗
甲認為錢最重要，沒有錢便等如沒有快樂，所以拼命賺錢，經營的生意愈來愈大，生意額的多少直接操控著她的快樂指數。甲其實很能幹，生意也做得有聲有色，但每天真的營營役役，日夜顛倒，說不定有一日連健康也被這種生活影響了﹗
乙認為事業上的成功很重要，權力很重要，錢，現在有了，所以沒有放到首位。她認為在事業上不望高處的人是沒大志的，當然，她的終極目標是公司內最高高在上那個位置吧﹗乙也是個能幹的人，但有點心高氣傲，不過以她的際遇與本事，她確實有條件這樣的﹗
丙認為家庭最重要，工作只是生活的一部分，努力工作之餘，更努力去教育兒子，愛護丈夫，孝順父母。丙做事很認真，工作了這麼多年仍原地踏步也沒埋怨，只每天默默耕耘﹗
丁最沒大志(可能乙會這樣認為)，終日想著過多兩年便要提早退休，背起背包環遊世界，體驗生活。她認為錢重要、家庭重要、工作重要、遊戲重要、健康重要，每天努力地過著平衡的生活，所有她認為重要的事情上，也沒有做得特別出色的地方。每天哈哈哈的又過一天﹗
究竟誰會最開心呢？我沒法估計或衡量，我只知道我們本是世上的客旅，到頭來原是空，重要的是我們想經歷些什麼。除了經歷與感受之外，一切得到的，其實都會失去﹗
**開心指數原來是這樣計算的：
天生的性格(40%)+思考的方式(40%)+際遇(20%)
