蛇竇: 三日金門單車遊(上)

出發前上網搵資料，揀定d古厝同埋睇下金門有咩景點，呢個金門旅遊網幾幫得手。然後就去中旅社買定巴士票，唔返大陸買，係因為價錢相差好少。

28/6/2012
路人甲放工後，我地就上左去深圳坐九點既大巴上廈門，巴士飛係響香港中旅社買既，夜晚車得一班九點($318)，係坐既，不過張椅可以放低瞓，都ok。
我地去到僑社個巴士站見仲有成個鐘，所以換完飛之後就響旁邊個機場候車室食左飯至上車。

29/6/2012
晨咁早五點幾就到左廈門，都唔知落車既地方實際響邊，只知係廈門中旅社，所有鋪頭都未開，想食早餐都唔得，唯有周圍行吓啦。
原來落車既地方就係步行街，都幾有懷舊風味喎﹗好多居民響呢條街跑步，好健康呀﹗

我地行向海邊，諗住睇吓個碼頭響邊，但原來要坐車去，行唔到既﹗海邊除左可以睇到鼓浪嶼外，仲見到呢班「那些年，我們一起溜過的狗」既阿伯。

我地決定都係去左買回程既巴士飛先，但去到至知只預售三天，唯有返黎先買啦，橫掂有咁多班車。

廈門有幾個長途車站，呢個至有車去深圳架﹗

又未夠鐘去碼頭，個肚又餓，當然係揾左食先啦，響車站旁邊食左個白粥油炸鬼，好食喎﹗
搭的士去碼頭過金門，都係好近咋，11蚊人仔就去到碼頭喇﹗呢個碼頭又叫東渡，但如果坐的士黎，記住一定要同司機講你要坐船去金門，係上岸既，因為呢度有好多碼頭，都係可以坐船睇吓金門，但唔可以上岸既，而東渡碼頭又其實只係運貨既碼頭，只有呢個先可以坐船去到金門又可以上岸架咋﹗

過關好快，但記住要上網辦定入台証，買船飛已經要用架喇。排隊等上船。(船飛160人仔)

一個鐘船程就去到金門喇，響遊客服務中心攞齊晒資料(d小冊子真係好用又精美架)，出左碼頭唔多覺有巴士站，就問吓阿姐，佢帶我地企響路邊，好快就有巴士喇，到宜家我都係唔知個巴士站響邊﹗上車之後問司機我地係咪應該響「水頭圓環」落車，但佢叫我地響水頭村落車。其實兩個站都ok架﹗

我地行入村，一路行一路影，好靚既小村呀﹗

仲有好多好有特色既民宿，全部都係有上百年歷史既古厝黎架﹗

行左無幾耐就去到我地打算入住既民宿：

我地無預訂，好彩黎到時，民宿主人響度，原來呢度d民宿主人唔係成日響間民宿度架，好多民宿平時都係關門架。我地本來打算響度住三晚，費事搬來搬去，但呢間只得今晚有一間房，叧外兩晚因為係星期六日，成個水頭都應該無房。民宿主人幫我地揾到兩間可以星期六日入住既，價錢都係1600台幣兩人房包早餐，一間響小徑村，一間響歐厝。我地睇過地圖之後都覺得ok，所以就咁搞掂左住既問題喇﹗呢度既古厝民宿好有特色，間間都係舊屋翻新，民宿主人又花心思裝飾，真係住得舒適架﹗呢間民宿個大廳，係比較細既一種。