拮個花師奶

24年後做番24年前成日做既野：去同學屋企玩﹗

以前讀書時同呢位同學好close，成日去佢屋企或者佢附近d朋友仔屋企呀、社區中心呀咁一齊讀書，一齊玩，好開心﹗

眨吓眼24年過去，前日約左佢去佢屋企玩拮公仔。見到當年好靚既伯母老了，阿世伯仍然大大聲，慶幸兩位都很精神，當然亦很懷念同學個嫲嫲煮既蒸肉餅啦，可惜嫲嫲離開已經有成廿年咯﹗

拮左d咩？一個好好身材既花師奶：

佢係一個flash memory（手指）既套黎既﹗

嶺南派山水畫（第十堂畫跳舞蘭）

不經不覺又到左最後一堂喇，呢幅試畫時都ok既，但到畫上正式既紙時，d位預得唔好，搞到支花太直太置中，失敗﹗

今堂老師無咩野講，只係話d花唔夠密叫我加多幾筆，呢幅係加左花架喇，我都係唔滿意﹗老師仲話d字寫得細，唉﹗都唔知點樣先叫適中﹗

自製腰帶

N年前同d布碎整左呢條腰帶，但甚少用，呢排將佢出土，又幾好用喎﹗

個面用patchwork，個底用左麖皮，車到衣車針都斷埋。

雨後彩虹，double rainbow﹗

星期三放早，去左探路人甲媽咪，順便去幫架車換油。

我陪左媽咪上樓之後，路人甲去左換油，無幾耐，佢打電話黎叫我睇彩虹。嘩﹗係double rainbow呀﹗響新彊第一次見到，以為響香港無咩機會睇到架喇，點知都睇到。後來post左張相上facebook，姨甥仔仲好開心咁話係「歲月神偷」裡面個哥哥講果種彩虹，佢好鍾意呢套戲架﹗

第二幅窗簾

記得N年前幫過舊時個男朋友車窗簾，車完俾人嫌唔夠好......

08年去新彊時，買左兩幅布，幫自己屋企車左幅窗簾，路人甲讚口不絕......

分別就係響有無心欣賞，同埋識唔識欣賞囉﹗路人甲真係好叻架，因為佢好識欣賞我架﹗

嶺南派山水畫(第七、八堂畫山茶花)

話咁快又畫到第九堂喇，上一堂已經畫緊山茶花，老師話呢幅難畫d，所以要畫兩堂，但係我覺得唔係真係咁難，所以都畫左好幾幅，呢幅畫得最似樣：

不過畫完時，老師整緊其他野，所以未俾評語我，不過都唔好期望咁大﹗

端午再遊海下

尋日趁路人甲放假，我又放端午節，又遇啱下晝大退潮，決定入海下尋寶。

咁既然有好野玩，就梗係搵埋我家姐同佢d細路啦﹗上晝潮未退，食個糭再游一游龍舟水先，做個應節下水禮﹗

上面呢度唔係海下，係個私人泳池，好正架﹗

游完水，再揸車入海下，時間啱啱好，去片：

有無人知呢種花叫咩名？好靚呀﹗

寄居蟹

小小紫海葵同大大條海參(各位師奶，唔攞得架，呢度係海岸公園黎架，差人拉架)

馬糞海刺

另一種我唔記得叫咩名既海刺

海馬呀

海星呀，交配中，勿擾，多謝﹗

白色海葵

海下灘大潮退一景

呢日因為係大退，所以我地可以行到出去平時水位過頭既海中心，成地都係海星。我記得海星係聚居既，係一個family咁住埋一齊既，所以一發現就好容易會搵到好多，當然亦有零零星星一隻兩隻既獨行海星既。呢日都係我見得最多海星既一次喇，不過搵唔到d大既，上次果d好大隻架。

攞海星上手睇絕對唔係問題，但記住千祈唔好只攞佢其中一隻觸手，因為佢覺得危險，會啟動保命機制，即係壯士斷臂，即係寧願唔要一隻觸手都要逃走。所以，睇還睇，唔好搞到d海星斷晒手呀﹗

呢隻係萬中無一既六手海星，即係畸胎﹗

搞吓攝影先﹗

彩蛤

天快黑，出西貢食埋個意大利大餐就回航搵周公喇﹗

金句

除左黎明，人人都會有金句。

金句一：

「羸唔到都唔好輸吖嘛﹗」世界杯旁述員說。

 

金句二：

「化作春泥更護春」（原文：化作春泥更護花《花潮》）同事Y響晚宴上亂拋書包時說。

金句三：

「我老細係個女人，鬧人唔係人咁品﹗」（原曲：女王辦公室）卜卜脆個學生俾卜卜脆鬧完之後係咁重覆咁細細聲唱。

金句四：

「宜家d新聞真係咩都有架，時時都有d丈夫打老公架﹗」（原稿：丈夫打老婆）大隻搞gap同事響討論時事時講出。

金句五：

「哈哈，我d學生都話我上堂好搞笑，成日搞爛gap架﹗」（應該讀開口音gag）大隻搞gap同事響教員室不斷話自己d gap好爛﹗

豬姑娘事件簿

終於有閒情講吓我去緬甸時既partner－－豬姑娘，喇﹗

因咩佢叫做豬姑娘呢？呢個名係去緬甸之前改既，今年我同佢同房（同一個工作間），目擊佢唔少「事蹟」，所以幫佢收左呢個名，至於深層意義係咩呢，咁要睇過以下少少響緬甸發生既小事，就應該會明白喇﹗（以下片段，一早同左當事人講會post響呢度架喇，d多事既人唔好話我唱人呀﹗）

事件一：

出發前，我身為領隊兼行程策劃師，當然一早幫我既團友（得一個，豬姑娘）訂晒所有機票及住宿啦。於是，我印好左一疊有齊所有flight既coupon，跟晒日期排好晒釘好埋，送到豬枱上。但係，佢無帶住去旅行，結果去到緬甸坐內陸機時要買過張機票（airasia既coupon有齊我地兩個個名，佢唔帶都上到機），然後要走去搵間網吧，上網搵番我個email出黎，print番跟住個幾程機。如果只係咁樣，都唔係好麻煩，但果度d網絡慢過我阿婆行路，等到我頭都痛埋。然後，回程時返仰光，要去間airlines個office度睇吓有無得搞refund。結果係無既，要返香港搵番幫我地訂機票間agency幫手搞。唉﹗豬﹗

事件二：

豬借左佢細佬支腳架（豬係用單反既，不過我覺得係「眼反反」個反囉），佢話佢細佬教左佢用，教左一次，之後，豬無練習吓就響大庭廣眾下攞出黎用，搞左好耐，都放唔到部單反上去支腳架度，當時，我一條友周圍行，見d鬼全部向住佢個方向眼望望，我心諗：「部機好靚架咩？」，然後又行左一輪又再去到豬既附近，見d鬼都仲係一模一樣既狀態，當我開始懷疑既時候，有個鬼佬出聲：「Lady, can I help you?」，我心諗：「唔係fa，溝佢呀？」（呀……粗左少少添，不過真係咁諗，第一時間，哈哈），但係見豬好惡死咁「NO」左一野，繼續努力搞機，哈哈，我就知咩事喇﹗唉﹗豬﹗

事件三：

我無寄艙行李，所以回程去曼谷時，我地買左支大水，我俾左豬放左響佢度，諗住佢識得放響個寄艙既背囊度啦，點知，一過x-ray，佢響個hand carry既背囊度攞支水出黎交俾個關員，果一刻，我真係有d暈，雖然一支水唔值錢，但係「唔到你唔服」個吓令我頭暈吖嘛﹗唉﹗豬﹗

事件四：

最後一晚，我地響仰光住左間全程最貴既酒店（其實都只不過係USD20），當豬沖完涼出黎時，我例牌問一句：「d水熱唔熱？（其實我覺得間酒店好ok，熱水應該夠熱），但豬答我：「唔凍既凍水囉﹗」我深信唔會係咁既，就問佢：「你開左門口個熱水掣架拿？」豬：「吓？﹗」唉﹗豬﹗

講住咁多先啦，好多都唔記得喇。不過，（等我補吓飛先）阿豬又勤力又克苦，笑佢又唔嬲鬼咁大方，最啱我呢d得罪人多稱呼人少既人架喇，同佢去旅行，佢又捱得，從無公主病，係唔錯既朋友仔黎架﹗

馬賽克杯墊

早幾個月跟黏土學會個miss學整左呢個馬賽克。與其話整，不如話我走去搵人著數啦，因為我根本就識架喇，不過無材料，哈哈，有人俾埋材料我用，就梗係整啦﹗

但係因為d粉會褪，所以遲d要搵David哥幫幫手，整番個膠套上去。

唉﹗之後有幾堂唔得閒，都無去整野lu，有個小掛畫，整左之後一路都未上色，等多一陣，我一得閒d又有心情就會搞掂佢架喇﹗

貼布繡毛巾掛

貼布繡係上堂時既課題，我每班每堂示範少少，就整好左一個喇﹗成份野最主要係要識用「毛氈針步」就得架喇﹗EASY﹗

我個人黎講幾鍾意呢隻七彩蜻蜓架﹗

嶺南派山水畫（第七堂畫桃花）

今堂學畫桃花，學識桃花就識埋畫梅花喇，好著數﹗

生命投資

生活中，任何一項事情都可以算是一種投資，有時，眼光獨到，獲利不少；有時，雖然看勢不準，卻會獲利甚豐；有時，用心投入時間及心血，但一無所獲。

「世事多變，豈可盡如人意﹗」、「知否世事常變，變幻才是永恆﹗」步入不惑之年，經驗和經歷告訴我，這些雖然只是歌詞，卻所言非虛﹗論到我自己的投資，幾乎可以用一敗塗地來形容。讀書，投資不多，收獲不豐，理所當然；工作，投資甚巨、用心、投入，卻幾乎破產收場，只怪自己眼光差，投資在一隻垃圾股上；真正金錢上的投資，不能說破敗，但未賺過一分錢。就只有感情，我獲了厚利。

論交友，我從來是個懶人，也怕煩，並不會主動關心他們，但我卻有一班很要好的朋友，雖然為數不多，但貴精；與家人的感情，我也沒有刻意經營，卻有兩個和諧的家，一個在娘家，一個在夫家，家人對我都很好。至於丈夫，只有這項投資，我可說自己獨具慧眼。他不是什麼精明能幹的人，也不是什麼成功人士，更不要說有什麼獨特之處，但他確是一位好丈夫。

五月三十一日，我終於把投資最失敗的一個戶口關閉了----我交了辭職信，也申請了「自願提早退休計劃」，即是，以後都不會再執教鞭了。我沒有感到什麼哀傷或失望，反而，我很高興，我終於可以離開一個令我感到挫敗，令我懷疑自己能力的地方。我認真深究過這項投資的失敗原因：是我太認真，是我不懂得什麼叫人事關係，是我不識時務，當然，這個結局也是運氣使然﹗

我知道把原因推卸給「運氣」是何等不負責任，但我見過「運氣」讓一些無能之士變得位高權重，也見過「運氣」使一些有能之士只默默耕耘而沒有收穫。

作為老師，我很重視學生的品德培養，但這裡不重視；我也很重視學生的成績，自問很用心去教，同儕觀課時，我也常取得甚高的分數，但又如何？我教是我教，他們肯學嗎？高層認為：教學是很好了，也很認真，但不懂得跟家長和高層抬槓，太過有己見，不肯苟同校政，罪大惡極﹗

既然，天空海闊，為什麼還要留在一條破船上去消磨生命？

很高興自己肯作出一個別人覺得我傻的決定，但是，活出生命是有很多方法的，既然已無心去收拾這項失利的投資，便應該為自己開通另一道門，再出發﹗生命不一定是七十、八十或九十才是盡頭，趁還有力氣，好應該做一些讓自己感到很快樂和很滿足的事。

恭喜自己﹗

福建霞蒲三天遊

霞蒲係近年攝影界既當紅阿姑，人人有支長鏡既都話去霞蒲影相，我就去睇吓係咩料，雖然我得部LX3

瞓左12個鐘巴士，再轉兩個幾鐘小巴，終於都到左，可惜天氣好差，不過，當大半個中國響度落緊雨既時候，天陰已經係好好天囉﹗

先去左間特殊學校度探吓d小朋友：

跟住去影吓野，但，一個字－－灰，形容埋個心情﹗（地點：好似叫石麗下）

「如果這是晴，個境應好醒」，請用黎明腔唱出。

第二日，去左北岐松山（尋日條馬路對岸）

北岐係條小漁村，幾有趣架﹗

然後去左沙唐，響馬路邊影吓相：

跟住去左沙江，上左人地間中學個天台影相：

又去埋海帶廠影相，學到點樣整海帶，非常有教育意味：

霞蒲近海，海產非常豐富，餐餐食海鮮，但每餐都係30蚊人仔左右。

第三日，都唔知係咪鹽田：

應該係漁塘lu啩：

又坐返十幾個鐘返香港，無瞓到就返工喇﹗