終於到西班牙喇﹗

17/7，1600，路人甲車我出機場，等到1945至上機，坐左六個幾鐘，去到孟買，又等多兩個幾鐘至上機，轉機去倫敦，上到機又坐九個幾鐘先去到第一個目的地。

18/7，0630(英國時間)到達倫敦後，家姐黎機場攞走我大部分既行李(多數既野都係佢既)，坐吓傾吓食吓，1015坐巴士過去Gatwick機場，一個鐘就到左喇，又一路坐到1500至有得check in，check in完又坐多兩個鐘至上得飛機，仲要坐成三個鐘至去到真正既目的地—西班牙南部Malaga，真係坐到直，等到呆。不過，受過長期地獄式監考訓練既我，莫講話有得上網、食野、睇報紙，就算發呆我都頂得住(悶)架﹗

其實到左heathrow機場之後，我可以出倫敦行吓，但係一黎揹住個背囊唔想周圍走，二黎之後大把時間出倫敦，今日得四個鐘左右，費事趕出趕入啦﹗

好奇怪，我係一個唔鐘意行鋪頭既人，響d機場度就算坐響度等，我都無咩興趣周圍行吓，咁坐響度除左上網(英國機場無free wifi)同睇報紙之外，亦都係一個觀察周圍既人既好機會黎既。我發現，如同我之前睇過既書既講法一樣，英國因為移民政策既關係，宜家多左好多南亞裔、非洲或者東歐人種。響機場做野既人可能有一半(甚至大部分)係呢d人，就連make announcement既口音都唔係英國口音，真係唔相信自己係響英國既機場呀﹗

為左慳番d寄艙費，我將d野pack到一個小背囊上機，而d cream就放左入袋，放響背囊度，諗住佢過機之後會叫我攞d cream出黎就得啦，平時響其他機場都係咁既，點知，英國個關真嚴謹，佢將成個背囊既野攞晒出黎，搞到成枱都係野，驗屍咁驗，又唔俾我帶咁多cream，將我放響大透明膠袋既cream，放晒響一個更細既膠袋度，結果一支洗頭水同一支細洗面奶就咁就犧牲左喇﹗好彩都係平野﹗佢地既要求係攞晒袋cream出黎，放響d細盒仔度過機呀﹗仲有呀，佢地d英文發音原來同我地平時學既係唔同架，wait係讀成 “write”咁架，問你有無寄艙行李就問：anything in the hold?搞到我一頭霧水，總之前所未有過關過得咁樣衰啦。

去到西班牙Malaga，一出機場就得一個巴士站，但搞左一陣先知道仲有無我要搭既19號巴士，等左半個鐘，架巴士終於都到喇，得六個人上車，呢個時候，天又剛剛黑，沿路見到d街都係黑媽媽又無人既。落左車之後，行左半條街，呢度條街就熱鬧好多，我見到有一家四口，媽媽推住BB車，應該係本地人，於是走埋去問路啦，點知原來我住既hostel就係佢地屋企既對面街，咁佢地就帶左我去hostel喇﹗本來我約左個朋友響街度等既，因為唔知黑媽媽一個人有無人搶野，之前有朋友黎西班牙玩，響街度俾人偷晒d錢呀﹗但係我打唔到電話俾佢，所以問路安全d囉﹗

經過35個鐘又等又坐，終於黎到西班牙喇﹗

一個人在途上

話去英國同西班牙話左好多年架喇，自從03年去左一次英國之後，前年想話再去，又去唔成，今次一次過去晒兩度。

因為貪平，坐jetairways，要響印度轉機，宜家就響印度等緊上機喇，直航要成萬蚊，宜家平三份一，等就等啦，鬼叫我窮又要去玩咩﹗咪以為我唔洗做周圍去玩呀，我搵到盤川至起程架，路人甲無資助架，不過，佢精神上支持我去玩囉，我已經好感動啦﹗

去到倫敦仲要轉去Gatwick飛去西班牙，家陣係香港時間零晨三點喇，仲未有得瞓呀，塊面立即爆左兩粒瘡，話都無咁快呀﹗

一個人在途上，真係悶到飛起，又無人同我廢up，得部電腦，都話唔鍾意一個人去旅行架啦﹗

土耳其之行

第一次坐Aeroflot，感覺良好，價錢平，但有電視睇，個餐又好食

響土耳其穿州過省都係坐巴士，價錢由幾十港幣至二百幾港幣，視乎路程長短。巴士乾淨整齊舒服，有食水供應，有時仲有蛋糕仔，你睇，係「冰屎」呀﹗

local小巴，平，舒服度：ok

local巴士，好似坐過一次

Istanbul既電車，方便

響Antalya, 呢D無坐，應該好貴

響Bodrum既有型小巴，貫穿整個半島

旅遊巴士既行李係有專人服侍架﹗

Istanbul電車內貌

Kos島上既觀光車，非常廸廸尼﹗

由Bodrum坐去Kos既船

由Cannakkale坐去Gallipolis半島既「車船」

的士既價錢同香港差唔多

Istanbul既觀光船

Istanbul上新區既電車

新區既電車

**終於完成土耳其一戰，後日開展新既旅程--西班牙+英國

水泡口金

上次整左個和風口金俾阿Paul，英國肥師奶見到又話想要一個，用黎裝散紙，見佢會收留我，於是前兩日整好左布既部份喇，但個口金做法有少少唔同，要搞清楚之後先整埋佢。

有咩唔同呢？就係呢個位，唔係用線縫，而係用白膠漿加條紙，再用鉗鉗實，搞到我成手白膠漿，手心仲起左個水泡添呀﹗最擔心既係唔知實唔實淨囉﹗

出左喇﹗被改名喇﹗

差d忘記今日應該出版喇﹗食完晚飯，去左七仔，一睇，果然出左，不過，編輯先生幫我改左名，叫做Jasany呀﹗搞錯呀﹗

而且，編輯又係咁囉，無無謂謂咁改我d野，作為一位過氣老師，我可以話佢知，寫作有好多種手法，唔係得一種叫做寫得好架﹗仲有呀，有d地方係唔改無事，俾佢一改就出事。

呢期呀﹗

原文：

多姿多采土耳其奇石區

 

一提起土耳其，大家必定會想起一大堆景點：棉花堡、人頭山、藍廟、聖蘇菲亞大教堂、奇石區、以弗所古城……。今次，我把以上的景區都遊過了，其中，景物最令我印象深刻，活動最多姿多采，住宿最特別的，是奇石區。

 

奇石區的名稱是卡帕多奇亞(Cappadocia)，位於土耳其中部。7千萬年前，火山爆發，大量熔岩噴出，覆蓋了地面，經過多年來大自然的巧手雕琢，成了今天奇岩怪石從地而起，連成一座座山谷，綿延整個地區。人們置身其中，猶如進入了另一個世界，另一個國度，就像進入了星球大戰的時代。

 

        奇石區幅員廣大，到處都是形狀有趣，看得人目瞪口呆的怪石。因為歷史的關係，岩石都被開鑿成教堂、石屋和修道院。現在石屋人去穴空，那規模龐大，設備完善，可以容納數萬人的地下城，現在空空如也，而遊人卻每天絡繹不絕。地下城的行走路線錯綜複雜，如入迷城，而通道又窄又低，很有探險的感覺。岩石洞除了讓當時的人在敵人入侵時有藏身之所外，對當時被羅馬軍隊追殺的修道士而言，複雜的地形也是他們挖鑿避難所的最好條件。整個地區都佈滿了大大小小的教堂和修道院，其中有的還漆上了色彩鮮艷的壁畫，令人喜出望外﹗

 

        走進這麼奇特的區域，我們當然不放過一嘗住進山洞的親身體驗吧﹗哥樂美(Goreme)是卡帕多奇亞北區的中心，山上的岩石洞都被改建為岩石酒店，酒店環境幽美，房間仍然保存著原始的風味，但又感覺舒適，絕對沒有想像中的簡陋感覺。

 

        在奇石區內觀賞奇石有幾種不同的方法：參加當地旅行團、健行、騎馬、開四驅車(ATV)、踏單車或坐熱氣球。我們首先參加了當地旅行團，到了哥樂美西南方約50公里的俄赫拉拉河谷(Ihlara Valley)健行。河谷長16公里，我們只行了其中的3公里，就已經感受到河谷的綠意盎然，一路綠樹成蔭，流水潺潺，令人心曠神怡。我們又選擇了開四驅車，在長滿小黃花的小道上一邊飛馳，一邊欣賞周圍的奇石，一邊四處到訪著名的景點，真是一個玩意同時可以獲得幾種享受的活動。參加熱氣球升空亦是另一個很好的選擇，在高空中從另一個角度欣賞奇特的地形，是個難得的體驗，如果遇上好天氣，風景更是加倍迷人，而且，天空上同時間有數十個熱氣球在朝陽中飄浮，場面何其壯觀﹗

 

小小世界藝術家

太古城最近有個模型展，d模型做得好細緻，其中一個藝術家(今次佢放最多作品)好似係我以前學整紙黏土既其中一個老闆，不過我無興趣學整呢d模型(成日覺得好似燒俾先人果d咁)，所以無跟佢學。

在場聽得最多係：「嘩﹗好似呀﹗」、「你睇幾得意。」、「好犀利呀﹗」我心諗：各位朋友，其實大家只要肯花心思，又肯俾時間，大家都可以整到架，唔難整架，做咩咁驚嘆呢﹗(不過我心裡面都好佩服佢地咁有耐性)

至於係咪藝術家，呢方面可以好肯定係囉，因為其實大家都係藝術家，尤其是響裝置藝術同行為藝術方面，大家日日都好落力咁做緊。如果你話：「車﹗咁都算係呀，蛇仔你無野呀﹗」咁，影相都係藝術既一種lu卦，大家影唔影相吖？宜家d相機咁勁，有部DC已經係藝術家啦，有埋部單反就成個大師級咁啦，所以，人人都係藝術家架喇﹗

平日都鬼咁多人

接受得最多傳媒訪問既呢一組模型就最唔合比例

 

和風口金

去完日本，無買到野俾阿Paul，但係買左俾David哥，於是拿拿聲整番個和風口金送俾阿Paul當手信啦﹗

剪好布料（d布都係日本運到架）

面布熨上厚棉布

面布同裡布都要縫好V位

表布同裡布（分別縫）都係面對面疊好，縫好個底（U位）

將縫好既面布套入裡布裡面（表布面對裡布面）

將袋頂縫好（表布同裡布縫），剩下大約4cm唔縫

縫好，反轉，將剩下既4cm都縫好

縫入口金，注意中間位，否則會大細邊，亦要注意線步唔可以俾人睇到（從呢個角度睇）

完成，兩面唔同架

好可惜，阿Paul一收到就話：咁的式（細個）呀﹗唉﹗不減挑剔性格﹗