英國生活

雖然成日都去旅行﹐但始終無響外地生活過既經驗，今次響英國總算係真正咁生活過，見識過好多英國式生活，對英國了解左好多。

其中，我發現超級市場對英國人黎講簡直係不可缺少既「設備」，而且，你可以響超級市場睇盡人生百態。

我地隔兩日就會去超級市場入貨，主要係買餸，毎樣貨品都真係好多選擇，以下係其中一餐：

另外，英國人家家戶戶都有塊草地，香港人好羨慕，但要打理又真係要有時間，有心機。好似我家姐屋企塊草地，之前生滿晒weeds，要除weeds，真係要好有心機。d weeds條根長到好似人蔘咁，最長有成五六吋咁長，要掘好耐至可以掘晒出黎。我掘左兩日，對手生左兩大個水泡。大家睇吓d窿就知個工程係幾咁浩大架喇﹗

辛苦左一大輪，當然要享受吓啦，英國既天氣比女人既心情更難預計，所以BBC weather forecast係毎三個鐘咁樣去預測天氣既，真係好準架。踏入九月，天黑得早，有藍天白雲25度既日子已經幾乎係無架喇，不過，今年既九月有兩個星期係Indian Summer，所以天氣唔錯。

抵食倫敦

因為家姐個朋友介紹，我地上網買左響倫敦dine out既coupon，地點響Trafalgar square，非常方便。我地出倫敦前，去左影吓秋色，好多樹都已經變晒色喇﹗

坐地鐵去到covent garden，個地鐵站有條百幾級既樓梯，行上去當然無問題啦。

仲有唔夠一年就倫敦奧運喇，時間過得真係快﹗

餐廳係一間主打蘇格蘭菜既餐廳，食食吓仲見到有個著tartan kilt既阿伯入黎食野添﹗埋單毎人30磅，有頭盆、主菜、甜品、紅酒、咖啡，食物整得好食又大碟。呢個係頭盆：青口，一碟有成四打咁多，食完都有d飽。

主菜：牛扒。靚野，好味﹗

餐廳既環境都好好架，不過就有少少嘈。

甜品：雪糕蘋果批，好薄既批，好正﹗